നിയന്ത്രണം വിട്ടെത്തിയ കാർ ബൈക്കുകളിലിടിച്ച് വഴിയോര കച്ചവടക്കാരിലേക്ക് ഇടിച്ചുകയറി അപകടം; മൂന്ന് പേർക്ക് പരിക്ക്; സംഭവം കൊല്ലത്ത്

കൊല്ലം: നിയന്ത്രണം വിട്ടെത്തിയ കാർ ബൈക്കുകളിലേക്ക് ഇടിച്ച ശേഷം വഴിയോര കച്ചവടക്കാരിലേക്ക് പാഞ്ഞു കയറി മൂന്ന് പേർക്ക് പരിക്ക്. പാരിപ്പള്ളി മുക്കട ജംഗ്ഷനിൽ ഇന്നലെ ഉച്ചയോടെയാണ് സംഭവം നടന്നത്.

വർക്കല ഭാഗത്തേക്ക് തിരിയുന്നതിനിടെ കാർ നിയന്ത്രണം വിടുകയായിരുന്നു. ആദ്യം ബൈക്ക് യാത്രക്കാരെ കാറിടിക്കുകയും ഇവർ താഴെ വീഴുകയും ചെയ്തു. പിന്നീട് നിയന്ത്രണം വിട്ട് കാർ വഴിയോര കച്ചവടക്കാരുടെ ദേഹത്തേക്ക് പാഞ്ഞു കയറുകയായിരുന്നു. അപകടത്തിൽ കച്ചവടക്കാരന് കാലിന് ​പരിക്കേൽക്കുകയും ചെയ്തു.

അപകടം നടന്നപ്പോൾ തന്നെ നാട്ടുകാർ ഓടിയെത്തി രക്ഷാപ്രവർത്തനം നടത്തി. അപകടത്തിൽ മൂന്നുപേർക്ക് പരിക്കേറ്റിട്ടുണ്ട്. പരിക്കേറ്റവർ പാരിപ്പള്ളി മെഡിക്കൽ കോളജിൽ ചികിത്സയിൽ കഴിയുകയാണ്. കാറിൻ്റെ നിയന്ത്രണം നഷ്ടപ്പെട്ടതാണ് അപകടകാരണമെന്ന് പോലീസ് വ്യക്തമാക്കി.