കേരള ജംഇയ്യത്തുല്‍ ഖുതുബയുടെ ജനറല്‍ സെക്രട്ടറി സ്ഥാനം രാജിവച്ച് നാസര്‍ ഫൈസി കൂടത്തായി; രാജി ജനറല്‍ സെക്രട്ടറി സ്ഥാനത്തുനിന്ന് നീക്കണമെന്ന് സമസ്തയിലെ ലീഗ് വിരുദ്ധര്‍ പ്രമേയം അവതരിപ്പിച്ചതിന് പിന്നാലെ

കോഴിക്കോട്: സമസ്തയില്‍ ഭിന്നത രൂക്ഷമായതോടെ കേരള ജംഇയ്യത്തുല്‍ ഖുതുബയുടെ ജനറല്‍ സെക്രട്ടറി സ്ഥാനം രാജിവച്ച് നാസര്‍ ഫൈസി കൂടത്തായി. സംസ്ഥാന പ്രസിഡന്റ് കൊയ്യോട് ഉമര്‍ മുസ്ലിയാര്‍ക്കാണ് നാസര്‍ ഫൈസി രാജിക്കത്ത് സമര്‍പ്പിച്ചു. ജനറല്‍ സെക്രട്ടറി സ്ഥാനത്തുനിന്ന് നീക്കണമെന്ന് സമസ്തയിലെ ലീഗ് വിരുദ്ധര്‍ പ്രമേയം അവതരിപ്പിച്ചിരുന്നു. ഇതിന് പിന്നാലെയാണ് ഫൈസിയുടെ രാജി.

സംഘടനയെ ചലിപ്പിക്കാതെ മനഃപൂര്‍വ്വം നിര്‍ജീവമാക്കുന്ന ഇടപെടലുകള്‍ നാസര്‍ ഫൈസിയുടെ ഭാഗന്നുനിന്ന് ഉണ്ടാകുന്നുവെന്നാണ് പ്രമേയത്തില്‍ പറയുന്നത്. നിരന്തരം സമസ്താ നേതാക്കളെയും പണ്ഡിതരെയും അപമാനിക്കുന്നുവെന്നും പ്രമേയത്തിലുണ്ട്. നിരന്തരമായ ഖത്തീബ് ഉസ്താദുമാര്‍ ഉള്‍പ്പടെയുള്ള ഉസ്താദുമാരെ നിസാരമാക്കുന്ന വിധത്തിലുള്ള പ്രഭാഷണങ്ങളും പ്രസ്താവനകളും നടത്തിയെന്ന് നാസര്‍ ഫൈസിക്കെതിരായ പ്രമേയത്തില്‍ പറയുന്നുണ്ട്.

സമസ്ത കേരള ജംഇയ്യത്തുല്‍ ഉലമയേയും അതിന്റെ നേതാക്കളെയും അവമതിക്കുകയും നിസാരവത്കരിക്കുകയും ചെയ്തു. അദ്ദേഹം വഹിക്കുന്ന സ്ഥാനത്തിന് ഒരുനിലയിലും യോഗ്യന്‍ അല്ലെന്ന് ആവര്‍ത്തിച്ച് തെളിയിക്കുന്നതാണ് ഈ കാരണങ്ങളെല്ലാം. അദ്ദേഹത്തെ പൂര്‍ണമായും സംഘടനാ ചുമതലകളില്‍നിന്നും നീക്കണമെന്നും പ്രമേയത്തില്‍ പറയുന്നുണ്ട്.