എന്താണ് ബ്രോ..നുമ്മ സീനാണ്..; മദ്യലഹരിയിൽ നടുറോഡിൽ വാഹനം നിർത്തി യുവാക്കളുടെ 'ഷോ'; ചോദ്യം ചെയ്ത പോലീസിനുനേരെ തിരിഞ്ഞ് ആക്രമണം; കൊച്ചിയിൽ ഏഴ് പേർ അറസ്റ്റിൽ

കൊച്ചി: തൃപ്പൂണിത്തുറ പനങ്ങാട് പോലീസിന് നേരെ അതിക്രമം. ഇന്നലെ രാത്രിയാണ് സംഭവം നടന്നത്. മദ്യലഹരിയിലായിരുന്ന സംഘം പോലീസിനെ ആക്രമിച്ചത്. മദ്യപിച്ച് വാഹനത്തിന് മുകളിൽ കയറിയുള്ള അഭ്യാസ പ്രകടനം ചോദ്യം ചെയ്തതാണ് പ്രകോപനം ഉണ്ടായത്. ഏഴ് പേരെ പോലീസ് അറസ്റ്റ് ചെയ്തു. ആലപ്പുഴ സ്വദേശികൾ ആണ് പ്രതികൾ.

പുലർച്ചെ 1.45ഓടെ കുമ്പളം പാലത്തിന് സമീപം റോഡിന് നടുവിൽ വാഹനം നിർത്തിയായിരുന്നു അഭ്യാസ പ്രകടനം. അതുവഴി വന്ന പട്രോളിംഗ് സംഘം ഇവരോട് മാറാൻ ആവശ്യപ്പെട്ടപ്പോൾ അസഭ്യം പറഞ്ഞു.

തുടർന്ന് ഷർട്ടിന് കുത്തിപ്പിടിക്കുകയും മർദിക്കുകയും ചെയ്തെന്ന് പൊലീസ് പറയുന്നു. തുടർന്ന് കൂടുതൽ പോലീസെത്തി പ്രതികളെ അറസ്റ്റ് ചെയ്തു. ഇവരെ ഇന്ന് കോടതിയിൽ ഹാജരാക്കുമെന്ന് പോലീസ് വ്യക്തമാക്കി.