തിരുവനന്തപുരത്ത് പട്ടാപകൽ മോഷണശ്രമം; കള്ളൻ ഉന്നം വച്ചത് പേഴ്സിൽ പിന്നീട് ലക്ഷ്യം മാറി; പെൺകുട്ടിയുടെ മാലപൊട്ടിച്ച് കടന്നുകളയാൻ ശ്രമം; ഒടുവിൽ കള്ളനെ നാട്ടുകാർ പിടികൂടി പോലീസിൽ ഏൽപ്പിച്ചു

തിരുവനന്തപുരം: പട്ടാപകൽ മോഷണശ്രമം നടത്തിയ കള്ളനെ നാട്ടുകാർ പിടികൂടി പോലീസിൽ ഏൽപ്പിച്ചു. തിരുവനന്തപുരം ബാലരാമപുരത്താണ് സംഭവം നടന്നത്. പെൺകുട്ടി ബാങ്കിലെ എടിഎം ൽ നിന്ന് പണം പിൻവലിച്ച് പുറത്ത് ഇറങ്ങിയപ്പോളാണ് സംഭവങ്ങളുടെ തുടക്കം. ആദ്യം പേഴ്സിൽ പ്രതി ഉന്നം വയ്ക്കുകയായിരുന്നു.

പക്ഷെ പെൺകുട്ടി പേഴ്സിന്റെ പിടിവിട്ടില്ല. ശേഷം പ്രതി ലക്ഷ്യം മാറ്റി മാല പൊട്ടിച്ച് ഓടാൻ ശ്രമിക്കുകയായിരിന്നു. ഉടനെ പെൺകുട്ടി നിലവിളിച്ച് നാട്ടുകാരെ വിവരം അറിയിച്ചു.

തുടർന്ന് നാട്ടുകാരും യൂണിയൻ തൊഴിലാളികളും ചേർന്ന് പ്രതിയെ ഓടിച്ചിട്ട് പിടികൂടി തൊണ്ടി മുതൽ സഹിതം പോലീസിൽ ഏൽപ്പിച്ചു. സംഭവത്തിൽ പോലീസ് നാട്ടുകാരെ അഭിനന്ദിക്കുകയും ചെയ്തു.