യുവതിയുടെ ഇഷ്ടപ്രകാരമുള്ള ഗര്‍ഭഛിദ്രമെന്ന് രാഹുലിന്റെ അഭിഭാഷകന്‍; പരാതി വ്യാജമെന്ന ഡിജിറ്റല്‍ തെളിവുകള്‍ കോടതിയില്‍ സമര്‍പ്പിച്ചു; രാഹുല്‍ വക്കാലത്ത് ഒപ്പിടാന്‍ തിരുവനന്തപുരത്ത് എത്തിയെന്നും അവകാശവാദം; ഒളിവിലല്ലെന്ന് വരുത്തി, മുന്‍കൂര്‍ ജാമ്യാപേക്ഷയില്‍ അനുകൂല വിധി നേടാനുള്ള തന്ത്രമെന്ന് സംശയിച്ച് പൊലീസ്; എല്ലാ ജില്ലകളിലും വല വിരിച്ച് ഷാഡോ പൊലീസ്
യുവതിയുടെ ഇഷ്ടപ്രകാരമുള്ള ഗര്‍ഭഛിദ്രമെന്ന് രാഹുലിന്റെ അഭിഭാഷകന്‍
കൊച്ചി: ലൈംഗിക പീഡനാരോപണ കേസില്‍, രാഹുല്‍ മാങ്കൂട്ടത്തിലിനായുള്ള തിരച്ചില്‍ പോലീസ് ശക്തമാക്കിയതിനിടെ, നിര്‍ണ്ണായകമായ വെളിപ്പെടുത്തലുമായി പ്രതിയുടെ അഭിഭാഷകന്‍. കേസില്‍ യുവതി ഗര്‍ഭഛിദ്രം നടത്തിയത് സ്വന്തം ഇഷ്ടപ്രകാരമാണെന്ന തെളിവുകള്‍ ഉണ്ടെന്ന് രാഹുലിന്റെ അഭിഭാഷകന്‍ പറഞ്ഞു.
ഗര്‍ഭഛിദ്രവുമായി ബന്ധപ്പെട്ട് ഉയരുന്ന ആരോപണങ്ങളെ പ്രതിരോധിക്കുന്നതാണ് അഭിഭാഷകന്റെ നിലപാട്. ഗര്‍ഭഛിദ്രം നടത്തിയത് യുവതിയുടെ ഇഷ്ടപ്രകാരമായിരുന്നു എന്ന് തെളിയിക്കുന്ന രേഖകള്‍ കേസില്‍ ഹാജരാക്കാന്‍ കഴിയും. രാഹുല്‍ ഇന്നലെ വക്കാലത്ത് ഒപ്പിടാനായി തിരുവനന്തപുരത്തെത്തിയെന്ന് അഭിഭാഷകന്‍ പറഞ്ഞു.
യുവതിയുടെ വാദങ്ങള്‍ കള്ളമെന്ന് തെളിയിക്കുന്ന ഡിജിറ്റല്‍ തെളിവുകള്‍ മുദ്രവെച്ച കവറില്‍ കോടതിയിലെത്തിച്ചതായി അഭിഭാഷകന്‍ അവകാശപ്പെട്ടു. ശബ്ദരേഖകളും വാട്‌സപ് ചാറ്റുകളും ഇതിലുണ്ടെന്നും ഗര്‍ഭഛിദ്രം നടത്തിയത് യുവതിയുടെ ഇഷ്ടപ്രകാരമാണെന്ന് ഇതിലൂടെ ബോധ്യപ്പെടുമെന്നുമാണ് അവകാശവാദം.മുന്‍കൂര്‍ ജാമ്യാപേക്ഷ ബുധനാഴ്ച പരിഗണിക്കും.
ഒളിച്ചുകളി തുടരുന്നു
അതേസമയം, രാഹുല്‍ പോലീസിനെ വെട്ടിച്ചുള്ള 'ഒളിച്ചുകളി' തുടരുന്നു. യുവതി പരാതി നല്‍കിയതിന് പിന്നാലെ ഇന്‍സ്റ്റഗ്രാമില്‍ 'സത്യമേവ ജയതേ' എന്ന് പോസ്റ്റ് ചെയ്ത ശേഷമാണ് രാഹുല്‍ പൊതുസമൂഹത്തില്‍നിന്ന് അപ്രത്യക്ഷനായത്.
ഒളിവില്‍ കഴിയുന്നതിനിടെ രാഹുല്‍ മുന്‍കൂര്‍ ജാമ്യത്തിനായി അഭിഭാഷകന്‍ മുഖേന ശ്രമം ശക്തമാക്കിയതിലാണ് ഇപ്പോള്‍ ദുരൂഹത ഉയര്‍ന്നിരിക്കുന്നത്. ഇന്നലെ ഉച്ചയോടെ വക്കാലത്ത് ഒപ്പിടാനായി രാഹുല്‍ തിരുവനന്തപുരത്തെത്തിയെന്ന് അദ്ദേഹത്തിന്റെ അഭിഭാഷകന്‍ അവകാശപ്പെട്ടു. ഒപ്പിടല്‍ നടന്നത് വഞ്ചിയൂരിലെ വക്കീല്‍ ഓഫീസിലാണോ, അതോ കിളിമാനൂരിലെ ബന്ധുവീട്ടില്‍വെച്ചാണോ എന്നതില്‍ വ്യക്തതയില്ല.
ഒളിവിലല്ലെന്ന് വരുത്തി, മുന്‍കൂര്‍ ജാമ്യാപേക്ഷയില്‍ കോടതിയില്‍നിന്ന് അനുകൂല വിധി നേടാനായി രാഹുലും അഭിഭാഷകനും ചേര്‍ന്ന് മെനയുന്ന കള്ളക്കഥയാണ് തിരുവനന്തപുരത്തെ ഈ 'പ്രത്യക്ഷപ്പെടല്‍' എന്നാണ് പോലീസ് സംശയിക്കുന്നത്.
രാഹുല്‍ എവിടെയെന്ന അന്വേഷണം പോലീസ് വ്യാപകമാക്കിയിട്ടുണ്ട്. എല്ലാ ജില്ലകളിലെയും ഷാഡോ പോലീസ് സംഘത്തോട് രാഹുല്‍ നിരീക്ഷണത്തിലുണ്ടെന്ന് ഉറപ്പാക്കാന്‍ നിര്‍ദ്ദേശം നല്‍കിയിട്ടുണ്ട്. രാഹുലിനെ കൈയില്‍ കിട്ടിയാല്‍ ഉടന്‍ അറസ്റ്റ് ചെയ്യാനാണ് പോലീസിന്റെ നിര്‍ദ്ദേശം. രാഹുലിന്റെ പാലക്കാട്ടെ എം.എല്‍.എ ഓഫീസ് ശനിയാഴ്ച തുറന്നു പ്രവര്‍ത്തിച്ചു. ഇന്നലെ വരാതിരുന്ന ഡ്രൈവര്‍ ആല്‍വിന്‍, പേഴ്‌സണല്‍ അസിസ്റ്റന്റ് ഫസല്‍ എന്നിവര്‍ ഓഫീസിലെത്തി.
