രാഹുലിന്റെ നിര്‍ബന്ധ പ്രകാരം അശാസ്ത്രീയ ഭ്രൂണഹത്യ നടത്തുമ്പോള്‍ ഗര്‍ഭസ്ഥ ശിശുവിനു മൂന്നുമാസത്തെ വളര്‍ച്ച; പരാതിക്കാരിക്കെതിരെ സൈബര്‍ ആക്രമണം; ആ പരാതിയിലും പോലീസ് അന്വേഷണം തുടങ്ങി; മാങ്കൂട്ടത്തില്‍ ഒളിവില്‍ കഴിയുന്നത് കോയമ്പത്തൂരെന്ന് നിഗമനം; തമിഴ്‌നാട്ടിലേക്കും അന്വേഷണം; പാലക്കാട്ടെ എംഎല്‍ ബംഗ്ലൂരുവില്‍ എത്താതിരിക്കാന്‍ കരുതല്‍
തിരുവനന്തപുരം: രാഹുല്‍ മാങ്കൂട്ടത്തില്‍ എംഎല്‍എ ലൈംഗികമായി അതിക്രമിച്ചുവെന്ന് മുഖ്യമന്ത്രിക്ക് പരാതി നല്‍കിയതിന് പിന്നാലെ യുവതിക്ക് നേരെ വ്യാപക സൈബര്‍ ആക്രമണം എന്ന് പരാകി. സൈബര്‍ ആക്രമണത്തില്‍ യുവതി പരാതി നല്‍കി. ഇതിന്റെ അടിസ്ഥാനത്തില്‍ ഓരോ ജില്ലകളിലും ഇത്തരം പ്രവര്‍ത്തനങ്ങള്‍ കണ്ടെത്തിയാല്‍ കേസെടുക്കാന്‍ എഡിജിപി എച്ച് വെങ്കിടേഷ് നിര്‍ദേശം നല്‍കി. കോണ്‍ഗ്രസ് നേതാക്കളടക്കം പെണ്‍കുട്ടിയുടെ ചിത്രവും വിവരങ്ങളും സാമൂഹിക മാധ്യമങ്ങളില്‍ പ്രചരിപ്പിച്ചിരുന്നു. തുടര്‍ന്ന് വിവാദമായതോടെ പിന്‍വലിക്കുകയായിരുന്നു. അതേസമയം, രാഹുല്‍ കോയമ്പത്തൂരില്‍ ഒളിച്ചുകഴിയുന്നതായാണ് സൂചന. തമിഴ്നാട് കേന്ദ്രീകരിച്ചും പൊലീസ് അന്വേഷണം നടക്കുന്നുണ്ട്.
പരാതി നല്‍കാന്‍ ധൈര്യം കാണിച്ച യുവതിയുടെ സ്വകാര്യതയെ ഹനിക്കുന്നുവെന്ന് വിമര്‍ശനമുയര്‍ന്നതോടെയാണ് പലരും പോസ്റ്റുകള്‍ പിന്‍വലിച്ചത്. രാഹുല്‍ അനുകൂലികളായ സൈബര്‍ പോരാളികളുടെ ഹാന്‍ഡിലുകളാണ് ഇത്തരം ചിത്രങ്ങളും വിവരങ്ങളും പ്രചരിപ്പിച്ചത്. യുവതിയെ പിന്തുണയ്ക്കുന്നവര്‍ക്കെതിരെയും സൈബര്‍ ആക്രമണമുണ്ടായി. ഇത്തരം പ്രവര്‍ത്തനങ്ങള്‍ക്കെതിരെ ശക്തമായ നടപടികളെടുക്കണമെന്നാണ് നിര്‍ദേശം. കേസില്‍ രാഹുല്‍ മാങ്കൂട്ടത്തിലിനെ വേഗത്തില്‍ അറസ്റ്റ് ചെയ്യാനാണ് നീക്കം. നിലവില്‍ രാഹുല്‍ ഒളിവിലാണ്. എഡിജിപി എച്ച് വെങ്കിടേഷിന്റെ നേതൃത്വത്തില്‍ യോഗം ചേര്‍ന്നു. രാഹുലിനായി സംസ്ഥാന വ്യാപകമായി പൊലീസ് അന്വേഷണം നടത്തുന്നുണ്ട്. രാഹുലിന്റെ ബന്ധുക്കളും സുഹൃത്തുക്കളും നിരീക്ഷണത്തിലാണ്. ബന്ധുക്കളില്‍ ചിലരെ ചോദ്യം ചെയ്‌തേക്കും.
യുവതിയുടെ മൊഴി ആശുപത്രി അധികൃതര്‍ സ്ഥിരീകരിച്ചിട്ടുണ്ട്. ഗുരുതര രക്തസ്രാവത്തിന് സ്വകാര്യ ആശുപത്രിയില്‍ യുവതി ചികിത്സ തേടിയിരുന്നുവെന്ന് കണ്ടെത്തി. ഗര്‍ഭാവസ്ഥയിലിരിക്കുമ്പോള്‍ ഏഴ് ആഴ്ച വരെ കഴിക്കാവുന്ന മരുന്നുകളാണ് യുവതിയെക്കൊണ്ട് നിര്‍ബന്ധിച്ച് കഴിപ്പിച്ചത്. ഈ മരുന്നുകള്‍ ജീവന്‍ നഷ്ടപ്പെടുത്താന്‍ വരെ സാധ്യതയുള്ള മരുന്നുകളായിരുന്നുവെന്ന് ഡോക്ടര്‍മാര്‍ പറയുന്നു. എംഎല്‍എയെ തേടി അന്വേഷണ സംഘം പാലക്കാട്ടെ രാഹുലിന്റെ ഫ്‌ലാറ്റില്‍ എത്തിയിരുന്നു. തെളിവെടുപ്പിനായി എഡിജിപിയുടെ നിര്‍ദേശത്തെ തുടര്‍ന്നാണ് അന്വേഷണസംഘം പാലക്കാട്ട് എത്തിയത്. ജില്ലയിലെ പൊലീസ് ഉദ്യോഗസ്ഥരുമായി അന്വേഷണസംഘം കൂടിക്കാഴ്ച നടത്തി. രാഹുലിന്റെ ബന്ധുക്കളും സുഹൃത്തുക്കളും പൊലീസ് നിരീക്ഷണത്തിലാണ്. ഇവരെ ആരെയും തന്റെ ഫോണ്‍ നമ്പറില്‍ നിന്ന് രാഹുല്‍ ബന്ധപ്പെട്ടിട്ടില്ല. രാഹുല്‍ ബംഗ്ലൂരുവിലേക്ക് കടക്കാന്‍ സാധ്യതയുണ്ട്.
രാഹുല്‍ കോയമ്പത്തൂരില്‍ ഒളിച്ചുകഴിയുന്നതായുള്ള സംശയത്തെ തുടര്‍ന്ന് പൊലീസിന്റെ ഒരു സംഘം തമിഴ്നാട് കേന്ദ്രീകരിച്ചും അന്വേഷണം നടത്തുന്നുണ്ട്. ഇതുമായി ബന്ധപ്പെട്ട ഇന്റലിജന്‍സ് വിവരങ്ങളെല്ലാം അന്വേണ സംഘം ശേഖരിച്ചിട്ടുണ്ട്. കോയമ്പത്തൂര്‍ കേന്ദ്രീകരിച്ച് വ്യാപകമായി പരിശോധന നടത്തുകയാണ് പൊലീസ്. ബംഗ്ലൂരുവിലേക്ക് രാഹുല്‍ കടക്കുന്നത് തടയാനാണ് നീക്കം. അതേ സമയം, ഡോക്ടറുടെ മാര്‍ഗനിര്‍ദേശം ഇല്ലാതെ കഴിച്ചാല്‍ ജീവന്‍ പോലും അപകടത്തിലാക്കാവുന്ന മരുന്നുകളാണ് രാഹുല്‍ മാങ്കൂട്ടത്തില്‍ തനിക്കു നല്‍കിയതെന്നാണ് യുവതിയുടെ മൊഴി. മൈഫിപ്രിസ്റ്റോണ്‍, മൈസോപ്രോസ്റ്റോള്‍ എന്നീ മരുന്നുകളാണ് രാഹുലിന്റെ സുഹൃത്ത് ജോബി യുവതിയ്ക്ക് നല്‍കിയത്. ട്യൂബല്‍ പ്രഗ്‌നന്‍സിയാണെങ്കില്‍ ട്യൂബ് പൊട്ടി മരണം വരെ സംഭവിച്ചേക്കാമെന്ന് ഡോക്ടര്‍ പറഞ്ഞതായും യുവതി പൊലീസിനു മൊഴി നല്‍കി. മരുന്നു കഴിച്ചതിനു പിന്നാലെ ഗുരുതര രക്തസ്രാവമാണ് യുവതിക്കുണ്ടായത്. ഇതോടെ സ്വകാര്യ ആശുപത്രിയില്‍ ചികില്‍സയും തേടി. ഇതിന്റെ മെഡിക്കല്‍ രേഖകളും യുവതി പൊലീസിനു കൈമാറി. ഇതെല്ലാം പോലീസ് സ്ഥിരീകരിച്ചു.
രാഹുലിന്റെ നിര്‍ബന്ധ പ്രകാരം അശാസ്ത്രീയ ഭ്രൂണഹത്യ നടത്തുമ്പോള്‍ ഗര്‍ഭസ്ഥ ശിശുവിനു മൂന്നുമാസത്തെ വളര്‍ച്ചയാണ് ഉണ്ടായിരുന്നത്. ഭ്രൂണഹത്യയ്ക്ക് ശേഷം യുവതി മാനസികമായി തകരുകയും ജീവനൊടുക്കാന്‍ ശ്രമിക്കുകയും ചെയ്തിരുന്നു. ഗുരുതരമായ ആരോഗ്യപ്രശ്‌നങ്ങളും യുവതിക്കുണ്ടായി. ഇതിന്റെ രേഖകള്‍ പൊലീസ് ശേഖരിച്ചു കഴിഞ്ഞു.
