വർക്കലയിൽ ഞെട്ടിക്കുന്ന സംഭവം; ട്രെയിനിൽ നിന്ന് യുവതിയെ ട്രാക്കിലേക്ക് തള്ളിയിട്ടു; നില അതീവ ഗുരുതരം; ആശുപത്രിയിൽ പ്രവേശിപ്പിച്ചു; സഹയാത്രികനായ അക്രമി പോലീസ് കസ്റ്റഡിയിൽ; അതിക്രമം നടന്നത് കേരള എക്സ്പ്രസിലെ കോച്ചിൽ; ഇയാൾ മദ്യലഹരിയിലായിരുന്നുവെന്ന് യാത്രക്കാർ
വര്‍ക്കല: വര്‍ക്കലയില്‍ കേരള എക്സ്പ്രസ് ട്രെയിനില്‍ നിന്ന് യുവതിയെ ട്രാക്കിലേക്ക് തള്ളിയിട്ടു. യുവതിയുടെ നില അതീവ ഗുരുതരമായി തുടരുന്നു. വര്‍ക്കലയിലെ സ്വകാര്യ ആശുപത്രിയിലാണ് യുവതിയെ പ്രവേശിപ്പിച്ചിരിക്കുന്നത്. സംഭവവുമായി ബന്ധപ്പെട്ട് സുരേഷ് കുമാര്‍ എന്നയാളെ റെയില്‍വേ പോലീസ് കസ്റ്റഡിയിലെടുത്തു. ഇയാള്‍ മദ്യലഹരിയിലായിരുന്നുവെന്ന് പ്രാഥമികാന്വേഷണത്തില്‍ കണ്ടെത്തിയിട്ടുണ്ട്.
തിരുവനന്തപുരത്തേക്കുള്ള കേരള എക്സ്പ്രസ് ട്രെയിനില്‍ യാത്ര ചെയ്യുകയായിരുന്ന യുവതിയെ അയന്തി മേല്‍പ്പാലത്തിനു സമീപത്തുവെച്ചാണ് ട്രെയിനില്‍ നിന്ന് ട്രാക്കിലേക്ക് തള്ളിയിട്ടത്. ട്രാക്കില്‍ വീണ യുവതിയെ കണ്ട് അപ്രതീക്ഷിതമായി എതിരെ വന്ന മെമു ട്രെയിന്‍ നിര്‍ത്തുകയും, യാത്രക്കാര്‍ സഹായത്തിനെത്തി അവരെ മെമു ട്രെയിനില്‍ കയറ്റി വര്‍ക്കല റെയില്‍വേ സ്റ്റേഷനില്‍ എത്തിക്കുകയുമായിരുന്നു.
സംഭവത്തെക്കുറിച്ച് റെയില്‍വേ പോലീസിന് ലഭിച്ച വിവരങ്ങളെ തുടര്‍ന്നാണ് അന്വേഷണം ആരംഭിച്ചത്. ട്രാക്കില്‍ വീണുകിടന്ന യുവതിയെ ആരെങ്കിലും തള്ളിയിട്ടതാണെന്ന സംശയം പോലീസിനുണ്ടായിരുന്നു. തുടര്‍ന്നുള്ള അന്വേഷണത്തിലാണ് കൊച്ചുവേളിയില്‍ നിന്ന് പ്രതിയായ സുരേഷ് കുമാറിനെ പോലീസ് കസ്റ്റഡിയിലെടുത്തത്. ഇയാള്‍ മദ്യലഹരിയിലായിരുന്നുവെന്നും, യുവതിയെ തള്ളിയിട്ടതിന്റെ കാരണം വ്യക്തമല്ലെന്നും പോലീസ് അറിയിച്ചു.
യുവതിയുടെ നില അതീവ ഗുരുതരമായതിനാല്‍ കൂടുതല്‍ വിവരങ്ങള്‍ ലഭ്യമായിട്ടില്ല. യുവതിയെ തിരിച്ചറിയാനുള്ള ശ്രമങ്ങളും പുരോഗമിക്കുകയാണ്. സംഭവത്തെക്കുറിച്ച് വിശദമായ അന്വേഷണം നടത്തുമെന്നും, പിന്നില്‍ മറ്റാരെങ്കിലും ഉണ്ടോയെന്ന് കണ്ടെത്തുമെന്നും റെയില്‍വേ പോലീസ് അറിയിച്ചു. വര്‍ക്കല റെയില്‍വേ സ്റ്റേഷനിലെയും പരിസരത്തെയും സി.സി.ടി.വി ദൃശ്യങ്ങള്‍ പോലീസ് ശേഖരിച്ചുവരികയാണ്.
