പ്രിയ സുഹൃത്തുക്കള്‍ വീണ്ടും കണ്ടുമുട്ടും; മോദി-ട്രംപ് കൂടിക്കാഴ്ച ഫെബ്രുവരിയില്‍; ഇന്ത്യന്‍ പ്രധാനമന്ത്രി അടുത്ത മാസം വൈറ്റ് ഹൗസില്‍ എത്തുമെന്ന് എയര്‍ഫോഴ്‌സ് വണ്ണില്‍ വച്ച് സ്ഥിരീകരിച്ച് യുഎസ് പ്രസിഡന്റ്; അനധികൃത കുടിയേറ്റ വിഷയത്തില്‍ മോദി ഉചിതമായത് ചെയ്യുമെന്നും ട്രംപ്
മോദി-ട്രംപ് കൂടിക്കാഴ്ച ഫെബ്രുവരിയില്‍
വാഷിങ്ടണ്‍ ഡിസി: പ്രധാനമന്ത്രി നരേന്ദ്ര മോദി അടുത്ത മാസം യുഎസ് പ്രസിഡന്റ് ഡൊണള്‍ഡ് ട്രംപുമായി കൂടിക്കാഴ്ച നടത്തും. നരേന്ദ്ര മോദിയുമായി ഇന്നലെ ടെലിഫോണില്‍ സംസാരിച്ചതിന് പിന്നാലെ ട്രംപ് മാധ്യമ പ്രവര്‍ത്തകരെ അറിയിച്ചതാണിക്കാര്യം. ' ഞാന്‍ തിങ്കളാഴ്ച അദ്ദേവുമായി ദീര്‍ഘമായി സംസാരിച്ചു. അദ്ദേഹം അടുത്ത മാസം, മിക്കവാറും ഫെബ്രുവരിയില്‍ വൈറ്റ്ഹൗസിലെത്തും. ഇന്ത്യയുമായി യുഎസിന് നല്ല ബന്ധമാണുള്ളത്'- പ്രസിഡന്റിന്റെ എയര്‍ ഫോഴ്‌സ് വണ്ണില്‍ വച്ച് ട്രംപ് പറഞ്ഞു.
ഉഭയകക്ഷി സഹകരണം വിപുലവും ആഴത്തിലാക്കുകയും ചെയ്യുന്നതിന് പുറമേ ഇന്തോ-പസഫിക്കിലെയും, പശ്ചിമേഷ്യയിലെയും യൂറോപ്പിലെയും സുരക്ഷാ പ്രശ്‌നങ്ങളും ഇരുനേതാക്കളും ചര്‍ച്ച ചെയ്തു. അനധികൃത കുടിയേറ്റ വിഷയം മോദിയുമായി ചര്‍ച്ച ചെയ്‌തെന്ന് ട്രംപ് വ്യക്തമാക്കി. യുഎസിലേക്ക് അനധികൃതമായി കുടിയേറിയ ഇന്ത്യക്കാരെ തിരിച്ചെടുക്കുന്നതില്‍ മോദി ഉചിതമായ കാര്യം ചെയ്യുമെന്നും ട്രംപ് ആത്മവിശ്വാസം പ്രകടിപ്പിച്ചു.
ഇരുനേതാക്കളും തമ്മിലുള്ള കൂടിക്കാഴ്ചയ്ക്ക് ഇന്ത്യന്‍ വിദേശകാര്യമന്ത്രാലയം ഒരുക്കങ്ങള്‍ നടത്തുന്നതിനിടയാണ് ഫോണ്‍ കോളില്‍ ഇരുനേതാക്കളും സംസാരിച്ചത്്. ട്രംപ് പ്രസിഡന്റായുള്ള ആദ്യകാലയാളവില്‍ ഇരുനേതാക്കളും തമ്മില്‍ ഊഷ്മളമായ ബന്ധമാണ് കാത്തുസൂക്ഷിച്ചത്്.
2019 സെപ്റ്റംബറില്‍ യുഎസിലെ ഹൂസ്റ്റണിലും 2020 ഫെബ്രുവരിയില്‍ ഗുജറാത്തിലെ അഹമ്മദാബാദിലും നടന്ന രണ്ട് റാലികളില്‍ ഇരുവരും ഒന്നിച്ച് പങ്കെടുത്ത് ജനങ്ങളെ അഭിസംബോധന ചെയ്തിരുന്നു
എന്നാല്‍, തന്റെ രണ്ടാമൂഴത്തിനായുള്ള തിരഞ്ഞെടുപ്പ് പ്രചാരണത്തിനിടെ, ഉയര്‍ന്ന താരിഫുകളുടെ പേരില്‍ ട്രംപ് ഇന്ത്യയെ രൂക്ഷമായി വിമര്‍ശിച്ചിരുന്നു. ഇന്ത്യ കൂടി അംഗമായ ബ്രിക്‌സ് ഗ്രൂപ്പ് ഡോളറിന് ബദലായി പുതിയ കറന്‍സി രൂപീകരിക്കാന്‍ തയ്യാറെടുക്കുന്നതും ട്രംപിനെ പ്രകോപിപ്പിച്ചു.
തിങ്കളാഴ്ചയാണ്് ഡോണള്‍ഡ് ട്രംപുമായി, മോദി ടെലിഫോണിലൂടെ സംസാരിച്ചത്. ട്രംപ് അധികാരമേറ്റ ശേഷം ഇതാദ്യമായാണ് മോദി സംസാരിച്ചത്. ഫോണിലൂടെ ആശംസകളും അഭിനന്ദനങ്ങളും കൈമാറി.
പ്രസിഡന്റായി അധികാരമേറ്റെടുത്ത് ഒരാഴ്ചയ്ക്കുശേഷം ട്രംപുമായി നടത്തിയ ടെലിഫോണ്‍ സംഭാഷണത്തിലാണ് പ്രിയസ്‌നേഹിതന് മോദി അഭിനന്ദനം അറിയിച്ചത്. ഇരുരാഷ്ട്രങ്ങള്‍ക്കും ഗുണകരമായതും വിശ്വസനീയവുമായ പങ്കാളിത്തത്തിന് ഇന്ത്യ എപ്പോഴും സന്നദ്ധമാണെന്നും മോദി സംഭാഷണത്തില്‍ ഊന്നിപ്പറഞ്ഞു.
'എന്റെ പ്രിയസുഹൃത്ത് പ്രസിഡന്റ് ഡൊണാള്‍ഡ് ട്രംപുമായ സംസാരിക്കാനായതില്‍ അതിയായ സന്തോഷമുണ്ട്. അധികാരത്തിലെത്തിയ ചരിത്രപരമായ രണ്ടാമൂഴത്തിന് അദ്ദേഹത്തെ അഭിനന്ദനമറിയിച്ചു. ഇരുരാജ്യങ്ങള്‍ക്കും ഗുണകരമായതും വിശ്വസനീയവുമായ പങ്കാളിത്തത്തിനായി ഇരുരാജ്യങ്ങളും സന്നദ്ധമാണ്. ഞങ്ങളുടെ ജനതയുടെ ക്ഷേമത്തിനായും ലോകസമാധാനം, ആഗോള അഭിവൃദ്ധി, ആഗോളസുരക്ഷ തുടങ്ങിയവയ്ക്കായും ഞങ്ങള്‍ സഹവര്‍ത്തിത്വത്തോടെ പ്രവര്‍ത്തിക്കും'. പ്രധാനമന്ത്രി എക്‌സ് പോസ്റ്റില്‍ കുറിച്ചു.
ട്രംപ് അധികാരത്തില്‍ തിരിച്ചെത്തിയതിനുശേഷം അനധികൃതകുടിയേറ്റക്കാരെ രാജ്യത്തുനിന്ന് ഒഴിപ്പിക്കുന്നതുള്‍പ്പെടെ നിരവധി നിര്‍ണായക ബില്ലുകളിലും് ഒപ്പുവെച്ചു. അനധികൃതമായി യു.എസ് ഉള്‍പ്പെടെയുള്ള രാജ്യങ്ങളില്‍ കഴിയുന്ന ഇന്ത്യക്കാരെ തിരികെയെത്തിക്കാന്‍ ഒരുക്കമാണെന്ന് ഇന്ത്യ വ്യക്തമാക്കുകയും ചെയ്തിരുന്നു.
അമേരിക്കന്‍ പ്രസിഡന്റ് സ്ഥാനത്തേക്ക് തിരിച്ചെത്തി ഒരാഴ്ചയാകുമ്പോഴേക്കും നിരവധി വിവാദ തിരുമാനങ്ങളാണ് ഡോണള്‍ഡ് ട്രംപ് കൈക്കൊണ്ടത്. കുടിയേറ്റത്തിലും വിദേശ സഹായത്തിലുമെല്ലാം കടുത്ത തീരുമാനങ്ങള്‍ സ്വീകരിച്ച ട്രംപ് ഇപ്പോള്‍ അമേരിക്കന്‍ ഭരണ നിര്‍വഹണത്തിലും പൊളിച്ചെഴുത്ത് നടത്തുകയാണ്. ഇതിന്റെ ആദ്യ പടിയായി 12 ഫെഡറല്‍ നിരീക്ഷക സമിതികള്‍ പിരിച്ചുവിട്ടു. 12 ഫെഡറല്‍ ഇന്‍സ്പെക്ടര്‍ ജനറല്‍മാരുടെ സമിതികളാണ് ഒറ്റയടിക്ക് പ്രസിഡന്റ് ഡോണള്‍ഡ് ട്രംപ് പിരിച്ചുവിട്ടത്.
നാലു വര്‍ഷം കൊണ്ട് ബൈഡന്‍ സര്‍ക്കാരിന് ചെയ്യാന്‍ കഴിയാത്തത് താന്‍ ഒരാഴ്ച കൊണ്ട് ചെയ്‌തെന്ന് പറഞ്ഞുകൊണ്ടാണ് ട്രംപ് തീരുമാനം അറിയിച്ചത്. താന്‍ കാര്യങ്ങള്‍ ചെയ്യാന്‍ തുടങ്ങിയിട്ടേ ഉള്ളൂ എന്ന പ്രഖ്യാപനവും ട്രംപ് നടത്തി. എന്നാല്‍ ട്രംപിന്റെ ഈ നടപടി ഉദ്യോഗസ്ഥരുടെ രോഷത്തിനും നിയമപരമായ ആശങ്കകള്‍ക്കും കാരണമായിട്ടുണ്ട്. വിമര്‍ശകര്‍ ഇതിനെ 'ചില്ലിംഗ് ശുദ്ധീകരണം' എന്നാണ് വിശേഷിപ്പിച്ചത്. ഇത്തരം പിരിച്ചുവിടലുകള്‍ക്ക് മുമ്പ് 30 ദിവസത്തെ നോട്ടീസ് നല്‍കണമെന്നാണ് നിയമമെന്നും വിമര്‍ശകര്‍ ചൂണ്ടികാട്ടി. എന്നാല്‍ ഒറ്റ ദിവസത്തിലാണ് ട്രംപ് നടപടി കൈക്കൊണ്ടത്. ഇത് നിയമപരമായി തെറ്റാണെന്നാണ് വിമര്‍ശകര്‍ പറയുന്നത്. ട്രംപിന്റെ ആദ്യ ടേമിലാണ് ഇപ്പോള്‍ പിരിച്ചുവിട്ട ഇന്‍സ്പെക്ടര്‍ ജനറലുമാരില്‍ മിക്കവാറുമെല്ലാവരെയും നിയമിച്ചതെന്നാണ് വിവരം
