വിവിധ രാജ്യങ്ങങ്ങള്ക്കെതിരെ ചുമത്തിയ പകരച്ചുങ്കം റദ്ദാക്കിയ യുഎസ് സുപ്രീം കോടതി നടപടിക്ക് പിന്നാലെ 150 ദിവസത്തേക്ക് ആഗോളതലത്തില് 10% പകരച്ചുങ്കം ഏര്പ്പെടുത്തി; സുപ്രീംകോടതിയുടെ നിയമപരമായ വിലക്കുകളെ 'താത്കാലിക അധികാരം' എന്ന സാങ്കേതികത ഉപയോഗിച്ച് മറികടക്കാന് ട്രംപ്; അമേരിക്കയില് ജ്യൂഡീഷ്യറിയെ വെല്ലുവിളിച്ച് ട്രംപിസം
വാഷിംഗ്ടണ് ഡി.സി: അമേരിക്കന് ഭരണഘടനാ ചരിത്രത്തിലെ തന്നെ സവിശേഷമായ ഒരു അധികാര വടംവലിക്കാണ് ആഗോള സാമ്പത്തിക ലോകം ഇപ്പോള് സാക്ഷ്യം വഹിക്കുന്നത്. പ്രസിഡന്റിന്റെ അധികാരാതിര്ത്തികളെ സംബന്ധിച്ചുള്ള യുഎസ് സുപ്രീംകോടതിയുടെ നിര്ണായക വിധിയെയും കടുത്ത വിമര്ശനങ്ങളെയും പൂര്ണമായും തള്ളിക്കൊണ്ട് ഡോണാള്ഡ് ട്രംപ് പുതിയ വിജ്ഞാപനത്തില് ഒപ്പുവെച്ചതോടെ അമേരിക്കന് രാഷ്ട്രീയത്തില് പുതിയൊരു പ്രതിസന്ധി രൂപപ്പെടുകയാണ്. വിദേശ രാജ്യങ്ങളില് നിന്നുള്ള എല്ലാ ഇറക്കുമതികള്ക്കും നിലവിലുള്ളതിനും പുറമേ പത്ത് ശതമാനം ആഗോള നികുതി ഏര്പ്പെടുത്തിക്കൊണ്ടുള്ള ഉത്തരവാണ് കോടതി വിധി വന്ന് മണിക്കൂറുകള്ക്കകം ട്രംപ് പുറത്തിറക്കിയിരിക്കുന്നത്. ജനാധിപത്യത്തിലെ അധികാര വികേന്ദ്രീകരണത്തെക്കുറിച്ചുള്ള അടിസ്ഥാന സങ്കല്പ്പങ്ങളെപ്പോലും വെല്ലുവിളിക്കുന്നതാണ് ഈ അസാധാരണ നീക്കം.
പ്രസിഡന്റിന്റെ അടിയന്തരാധികാരം ഉപയോഗിച്ച് വ്യാപാര നികുതികള് ചുമത്തുന്നത് നിയമവിരുദ്ധമാണെന്നും, ഇത്തരം നികുതികള് തീരുമാനിക്കാനുള്ള ഭരണഘടനാപരമായ പരമാധികാരം ജനപ്രതിനിധി സഭയ്ക്ക് (യുഎസ് കോണ്ഗ്രസ്) മാത്രമാണെന്നും സുപ്രീംകോടതി 6-3 ഭൂരിപക്ഷത്തില് അസന്ദിഗ്ധമായി വ്യക്തമാക്കിയിരുന്നു. തീരുവകള് പ്രഖ്യാപിക്കാനായി 1977-ലെ ഇന്റര്നാഷണല് എമര്ജന്സി ഇക്കണോമിക് പവേഴ്സ് ആക്ട് പ്രയോഗിച്ചതിലൂടെ ട്രംപ് അധികാരപരിധി ലംഘിച്ചെന്ന യുഎസ് കോര്ട്ട് ഓഫ് ഇന്റര്നാഷണല് ട്രേഡിന്റെ വിധിയാണ് സുപ്രീംകോടതി ശരിവെച്ചത്. എന്നാല്, കോടതിയുടെ ഈ നിരീക്ഷണത്തെ കേവലം 'അസംബന്ധം' എന്നും 'ഭയാനകം' എന്നും വിശേഷിപ്പിച്ച ട്രംപ്, അമേരിക്കന് ഭരണഘടനയിലെ മറ്റൊരു നിയമപ്പഴുത് സമര്ത്ഥമായി ഉപയോഗിച്ചാണ് ഇപ്പോള് സുപ്രീംകോടതിക്ക് മറുപടി നല്കിയിരിക്കുന്നത്.
പഴയ നിയമത്തിന് പകരം, 1974-ലെ ട്രേഡ് ആക്റ്റിലെ സെക്ഷന് 122 എന്ന പുതിയ ആയുധമാണ് അദ്ദേഹം പുറത്തെടുത്തിരിക്കുന്നത്. രാജ്യത്തിന്റെ വ്യാപാരക്കമ്മി പരിഹരിക്കുന്നതിനായി 150 ദിവസത്തേക്ക് 15 ശതമാനം വരെ നികുതി ചുമത്താന് പ്രസിഡന്റിന് ഈ നിയമം സവിശേഷ അധികാരം നല്കുന്നുണ്ട്. സുപ്രീംകോടതിയുടെ നിയമപരമായ വിലക്കുകളെ ഈ 'താത്കാലിക അധികാരം' എന്ന സാങ്കേതികത ഉപയോഗിച്ച് മറികടക്കുക എന്നതാണ് ഭരണകൂടത്തിന്റെ തന്ത്രം.
ഈ സാമ്പത്തിക-നിയമ പോരാട്ടം ഇന്ത്യയുള്പ്പെടെയുള്ള രാജ്യങ്ങളുടെ സമ്പദ്വ്യവസ്ഥയില് വലിയ പ്രത്യാഘാതങ്ങള് സൃഷ്ടിക്കാന് പോന്നതാണ്. ആഗോളതലത്തില് ഏര്പ്പെടുത്തിയ പുതിയ പത്ത് ശതമാനം നികുതിക്ക് പുറമേ, ഇന്ത്യയ്ക്ക് മേലുള്ള പകരച്ചുങ്കം നിലവിലെ 18 ശതമാനമായി തന്നെ തുടരുമെന്ന ട്രംപിന്റെ പ്രഖ്യാപനം വരാനിരിക്കുന്ന ഇന്ത്യ-യുഎസ് വ്യാപാര ചര്ച്ചകളെ പ്രതികൂലമായി ബാധിച്ചേക്കാം.
കേവലമൊരു സാമ്പത്തിക തീരുമാനത്തിനപ്പുറം, നീതിന്യായ വ്യവസ്ഥയും ഭരണനിര്വ്വഹണ വിഭാഗവും തമ്മിലുള്ള തുറന്ന പോരിനാണ് ഇത് തിരികൊളുത്തിയിരിക്കുന്നത്. തനിക്കെതിരെ വോട്ട് ചെയ്ത ജഡ്ജിമാര് രാജ്യസ്നേഹമില്ലാത്തവരും ഭരണഘടനയോട് കൂറില്ലാത്തവരുമാണെന്ന ട്രംപിന്റെ അസാധാരണമായ അധിക്ഷേപം അമേരിക്കന് ജുഡീഷ്യറിയുടെ സ്വതന്ത്ര സ്വഭാവത്തിന് മേലുള്ള കടന്നുകയറ്റമായാണ് നിയമവിദഗ്ധര് വിലയിരുത്തുന്നത്.
മറ്റു രാജ്യങ്ങളുടെ അന്യായമായ വ്യാപാര രീതികളില്നിന്ന് അമേരിക്കയെ സംരക്ഷിക്കാന് അന്വേഷണം പ്രഖ്യാപിച്ചിരിക്കുന്ന ട്രംപിന്റെ നടപടി, വരും നാളുകളില് ആഗോള സാമ്പത്തിക രംഗത്ത് കടുത്ത വ്യാപാര യുദ്ധങ്ങള്ക്ക് വഴിവെച്ചേക്കാം. ചുരുക്കത്തില്, തീവ്രമായ സാമ്പത്തിക ദേശീയതയും അധികാര പ്രയോഗവും സമന്വയിപ്പിച്ചുകൊണ്ട്, കോടതികള് തീര്ക്കുന്ന നിയമപരമായ തടസ്സങ്ങളെപ്പോലും തന്റെ സംരക്ഷണവാദ അജണ്ട നടപ്പിലാക്കാനുള്ള രാഷ്ട്രീയ അവസരമാക്കി മാറ്റുകയാണ് ഡൊണാള്ഡ് ട്രംപ്. ഇന്ത്യയ്ക്കു മേലുള്ള പകരച്ചുങ്കം 18 ശതമാനമായി തുടരുമെന്ന് ട്രംപ് വ്യക്തമാക്കി. വന് തീരുവ ചുമത്തുമെന്നു മുന്നറിയിപ്പു നല്കി ഇന്ത്യപാക്ക് യുദ്ധം ഉള്പ്പെടെ 5 യുദ്ധങ്ങള് നിര്ത്തിച്ചെന്ന വാദം ട്രംപ് ആവര്ത്തിച്ചു. ഇന്ത്യയുമായും നരേന്ദ്ര മോദിയുമായും തനിക്കു നല്ല ബന്ധമാണെന്നും പറഞ്ഞു.
നികുതികളും തീരുവകളും തീരുമാനിക്കാന് ഭരണഘടന നല്കുന്ന അധികാരം യുഎസ് കോണ്ഗ്രസിനാണെന്നും പ്രസിഡന്റിനല്ലെന്നും ചൂണ്ടിക്കാട്ടിയാണ് സുപ്രീം കോടതി പകരച്ചുങ്കം റദ്ദാക്കിയത്. തീരുവകള് പ്രഖ്യാപിക്കാനായി 1977ലെ ഇന്റര്നാഷനല് എമര്ജന്സി ഇക്കണോമിക് പവേഴ്സ് ആക്ട് പ്രയോഗിച്ചതില് ട്രംപ് അധികാരപരിധി ലംഘിച്ചെന്ന യുഎസ് കോര്ട്ട് ഓഫ് ഇന്റര്നാഷനല് ട്രേഡിന്റെ വിധി സുപ്രീം കോടതി ശരിവച്ചു.
