പ്രധാനമന്ത്രിയുടെ കസേര വളഞ്ഞ് വനിതാ എംപിമാര്; 'ശരിയായത് ചെയ്യൂ' എന്ന് ബാനര്; മോദിയുടെ നന്ദിപ്രമേയ മറുപടി മുടങ്ങി; പ്രധാനമന്ത്രിയെ ശാരീരികമായി ആക്രമിക്കാന് ശ്രമിച്ചെന്ന് ബിജെപി; എട്ട് എംപിമാരുടെ സസ്പെന്ഷനില് പ്രക്ഷുബ്ധമായി ലോക്സഭ; അരങ്ങേറിയത് അസാധാരണമായ പ്രതിഷേധ നാടകങ്ങള്
ലോക്സഭയില് പ്രധാനമന്ത്രിയുടെ കസേര വളഞ്ഞ് വനിതാ എംപിമാര്
ന്യൂഡല്ഹി: പാര്ലമെന്റില് അസാധാരണമായ പ്രതിഷേധ നാടകങ്ങള്ക്കൊടുവില് പ്രധാനമന്ത്രി നരേന്ദ്ര മോദിയുടെ നന്ദിപ്രമേയ മറുപടി പ്രസംഗം തടസ്സപ്പെട്ടു. പ്രതിപക്ഷ വനിതാ എംപിമാര് പ്രധാനമന്ത്രിയുടെ ഇരിപ്പിടത്തിന് സമീപമെത്തി പ്രതിഷേധിച്ചതോടെയാണ് സഭ സ്തംഭിച്ചത്. എട്ട് പ്രതിപക്ഷ എംപിമാരെ സസ്പെന്ഡ് ചെയ്ത നടപടിയിലും, മുന് കരസേനാ മേധാവി എം.എം. നരവനെയുടെ പുസ്തകത്തിലെ പരാമര്ശങ്ങള് സഭയില് ഉന്നയിക്കാന് രാഹുല് ഗാന്ധിക്ക് അനുമതി നിഷേധിച്ചതിലും പ്രതിഷേധിച്ചായിരുന്നു പ്രതിപക്ഷത്തിന്റെ നീക്കം.
പ്രധാനമന്ത്രിയുടെ വഴി തടഞ്ഞ് വനിതാ എംപിമാര്
വൈകുന്നേരം അഞ്ച് മണിക്ക് സഭ ചേര്ന്നപ്പോഴാണ് ലോക്സഭയെ മുള്മുനയില് നിര്ത്തിയ സംഭവങ്ങള് അരങ്ങേറിയത്. കോണ്ഗ്രസ് എംപിമാരായ വര്ഷ ഗെയ്ക്വാദ്, ജ്യോതിമണി എന്നിവര് പ്രധാനമന്ത്രിയടക്കമുള്ള ഭരണപക്ഷ അംഗങ്ങളുടെ കസേരകളിലേക്ക് കയറുന്ന വഴി തടസ്സപ്പെടുത്തി. 'ശരിയായത് ചെയ്യൂ' (Do the Right Thing) എന്നെഴുതിയ ബാനറുകള് ഉയര്ത്തിയായിരുന്നു ഇവരുടെ പ്രതിഷേധം. എട്ട് പ്രതിപക്ഷ അംഗങ്ങളുടെ സസ്പെന്ഷന് പിന്വലിക്കണമെന്ന് ആവശ്യപ്പെട്ടായിരുന്നു ഈ നാടകീയ നീക്കം.
ആസൂത്രിത ആക്രമണമെന്ന് ബിജെപി
വനിതാ എംപിമാരുടെ പ്രതിഷേധത്തെ ഭരണപക്ഷം അതിരൂക്ഷമായാണ് വിമര്ശിച്ചത്. പ്രധാനമന്ത്രിയെ ശാരീരികമായി ആക്രമിക്കാനാണ് ഇവര് ശ്രമിച്ചതെന്ന് ബിജെപി എംപി മനോജ് തിവാരി ആരോപിച്ചു. മുന്കൂട്ടി നിശ്ചയിച്ച പ്രകാരം വനിതാ എംപിമാര് പ്രധാനമന്ത്രിയുടെ ഇരിപ്പിടത്തിന് ചുറ്റും തമ്പടിക്കുകയായിരുന്നുവെന്നും, കേന്ദ്രമന്ത്രി കിരണ് റിജിജുവിന്റെ സമയോചിതമായ ഇടപെടല് മൂലമാണ് വലിയൊരു സംഘര്ഷം ഒഴിവായതെന്നും അദ്ദേഹം പറഞ്ഞു.
നരവനെയുടെ പുസ്തകവും ചൈനീസ് തര്ക്കവും
നേരത്തെ, സഭയില് ചൈന-ഇന്ത്യ അതിര്ത്തി തര്ക്കം ചര്ച്ച ചെയ്യണമെന്ന പ്രതിപക്ഷത്തിന്റെ ആവശ്യം ബഹളത്തില് കലാശിച്ചിരുന്നു. മുന് കരസേനാ മേധാവി എം.എം. നരവനെയുടെ പ്രസിദ്ധീകരിക്കാത്ത ഓര്മ്മക്കുറിപ്പിലെ ഭാഗങ്ങള് വായിക്കാന് രാഹുല് ഗാന്ധി ശ്രമിച്ചതും സ്പീക്കര് തടഞ്ഞു. ഇതോടെ സഭ പ്രക്ഷുബ്ധമാവുകയും പലതവണ നിര്ത്തിവെക്കേണ്ടി വരികയും ചെയ്തു.
നന്ദിപ്രമേയം പാസായില്ല
ബഹളം നിയന്ത്രണാതീതമായതോടെ സ്പീക്കറുടെ ചുമതലയിലുണ്ടായിരുന്ന സന്ധ്യ റായ് സഭാ നടപടികള് നിര്ത്തിവെച്ചു. ഇതോടെ പ്രധാനമന്ത്രിക്ക് നന്ദിപ്രമേയ ചര്ച്ചയ്ക്ക് മറുപടി നല്കാന് സാധിച്ചില്ല. ഇതുവരെ നന്ദിപ്രമേയം സഭ പാസാക്കിയിട്ടില്ല. നാളെ വീണ്ടും സഭ ചേരുമ്പോള് പ്രമേയം പാസാക്കാനാണ് ഭരണപക്ഷത്തിന്റെ നീക്കം.
