'മികച്ച ഷോട്ടുകൾ, ഒരിക്കൽ പോലും അനാവശ്യമായി വേഗത കൂട്ടാൻ ശ്രമിച്ചില്ല'; സഞ്ജു ലോകോത്തര താരം, ഇത് അവന്റെ യഥാർത്ഥ പ്രതിഭ; മലയാളി താരത്തിലുള്ള വിശ്വാസം ആവർത്തിച്ച് ഗൗതം ഗംഭീർ
ന്യൂഡൽഹി: സഞ്ജു സാംസണിന്റെ ബാറ്റിംഗ് മികവിൽ ഇന്ത്യ ട്വന്റി-20 ലോകകപ്പ് സെമിഫൈനലിൽ പ്രവേശിച്ചതിന് പിന്നാലെ താരത്തെ പ്രശംസിച്ചുകൊണ്ട് ഇന്ത്യൻ മുഖ്യ പരിശീലകൻ ഗൗതം ഗംഭീർ. ഈ ഇന്നിംഗ്സ് സഞ്ജുവിന്റെ 'യഥാർത്ഥ പ്രതിഭയുടെ' തെളിവാണ് എന്നും ടീം മാനേജ്മെന്റ് എല്ലായ്പ്പോഴും സഞ്ജുവിൽ വിശ്വസിച്ചിരുന്നുവെന്നും ഗംഭീർ പറഞ്ഞു.
ഈഡൻ ഗാർഡൻസിൽ നടന്ന നിർണായകമായ സൂപ്പർ എയിറ്റ് പോരാട്ടത്തിൽ സഞ്ജുവിന്റെ പുറത്താകാതെയുള്ള 97* റൺസ് പ്രകടനമാണ് വെസ്റ്റ് ഇൻഡീസിനെതിരെ ഇന്ത്യക്ക് അഞ്ച് വിക്കറ്റ് ജയം സമ്മാനിച്ചത്. ഇതോടെ സ്വന്തം മണ്ണിൽ കിരീടം നിലനിർത്താനുള്ള ഇന്ത്യയുടെ പോരാട്ടം സെമിഫൈനലിലേക്ക് കടന്നു. സഞ്ജുവിന്റെ ബാറ്റിംഗ് മികവിനെ ടീമിന്റെ വിജയശില്പിയായിട്ടാണ് ഗംഭീർ വിശേഷിപ്പിച്ചത്.
"സഞ്ജു ഒരു ലോകോത്തര താരമാണ്, അവൻ എത്രത്തോളം മികച്ച കളിക്കാരനാണെന്ന് നമുക്കെല്ലാവർക്കും അറിയാം. അവന് പിന്തുണ നൽകുക എന്നത് മാത്രമായിരുന്നു പ്രധാനം. ടീമിന് ഏറ്റവും കൂടുതൽ ആവശ്യം വന്ന ഘട്ടത്തിൽ, തന്റെ യഥാർത്ഥ പ്രതിഭ എന്താണെന്ന് തെളിയിച്ചു. സഞ്ജുവിന് ഇതൊരു മികച്ച തുടക്കമാകുമെന്ന് കരുതുന്നു, ഇനി രണ്ട് മത്സരങ്ങൾ കൂടി ബാക്കിയുണ്ട്."
ടൂർണമെന്റിന് മുൻപുള്ള മോശം ഫോമും ന്യൂസിലൻഡിനെതിരായ പ്രയാസമേറിയ പരമ്പരയും സഞ്ജുവിനെ വലിയ വിമർശനങ്ങൾക്ക് വിധേയനാക്കിയിരുന്നു, എന്നാൽ ഇതിനെല്ലാം അത്യുജ്ജ്വലമായ രീതിയിലാണ് അദ്ദേഹം മറുപടി നൽകിയത്. 196 റൺസ് വിജയലക്ഷ്യം പിന്തുടർന്ന ഇന്ത്യ തുടക്കത്തിൽ പതറിയെങ്കിലും, ശാന്തതയോടെ ഇന്നിംഗ്സ് നയിച്ച സഞ്ജു പുറത്താകാതെ നിന്ന് ടീമിനെ വിജയത്തിലെത്തിച്ചു. സഞ്ജു ഇന്നിംഗ്സ് കൈകാര്യം ചെയ്ത രീതി ഗംഭീറിനെ ഏറെ ആകർഷിച്ചു. ''നോക്കൂ, അവൻ ഒരിക്കൽ പോലും ഇന്നിംഗ്സിന്റെ വേഗത അനാവശ്യമായി വർദ്ധിപ്പിക്കാൻ ശ്രമിച്ചതായി എനിക്ക് തോന്നിയില്ല," ഗംഭീർ പറഞ്ഞു.
"സഞ്ജു തികച്ചും സ്വാഭാവികമായ ക്രിക്കറ്റിംഗ് ഷോട്ടുകളാണ് കളിച്ചത്. പന്ത് ശക്തിയായി അടിക്കാൻ ശ്രമിക്കുന്നതായി ഒരിടത്തും കണ്ടില്ല, അതാണ് അവന്റെ പ്രതിഭ. കളി തന്റെ നിയന്ത്രണത്തിലാണെന്നും ആത്മവിശ്വാസമുണ്ടെന്നും ബോധ്യപ്പെട്ടാൽ ബാറ്റിംഗ് അനായാസമാകും. നെറ്റ്സിൽ അവൻ വളരെ മികച്ച രീതിയിലാണ് പന്ത് നേരിട്ടിരുന്നത്. അവിടെ പ്രകടിപ്പിച്ച അതേ മികവ് മൈതാനത്ത് പുറത്തെടുക്കുക എന്നതായിരുന്നു പ്രധാനം," അദ്ദേഹം പറഞ്ഞു. മികച്ച ബാറ്റിംഗ് പിച്ചിലും വേഗമേറിയ ഔട്ട്ഫീൽഡിലും സഞ്ജു പുലർത്തിയ സംയമനത്തെ എടുത്തുപറഞ്ഞ ഗംഭീർ, താരത്തിലുള്ള തന്റെ ദീർഘകാലത്തെ വിശ്വാസം ആവർത്തിച്ചു.
"അവൻ ഒരു ലോകോത്തര താരമാണെന്ന് ഞാൻ എപ്പോഴും പറയാറുണ്ട്, മികച്ച പ്രതിഭയുമാണ്. താരത്തിന് ഇനി ഇവിടുന്ന് മുന്നോട്ട് കുതിക്കാൻ സാധിക്കുമെന്നും ഇത്തരത്തിലുള്ള കൂടുതൽ ഇന്നിംഗ്സുകൾ കാണാൻ കഴിയുമെന്നും പ്രതീക്ഷിക്കുന്നു." മുൻപത്തെ കുറഞ്ഞ സ്കോറുകളെ ചൊല്ലിയുള്ള വിമർശനങ്ങളെ അദ്ദേഹം തള്ളിക്കളഞ്ഞു. "ആളുകൾ അവന്റെ സ്കോറുകളെയും മറ്റും നോക്കിക്കൊണ്ടിരിക്കും, എന്നാൽ ടീമിലേക്ക് തിരിച്ചെത്തിയ ശേഷം ഇത്തരമൊരു ഇന്നിംഗ്സ് കളിക്കുന്നത് അവന് വലിയ ആത്മവിശ്വാസം നൽകും. ന്യൂസിലൻഡിനെതിരെ അദ്ദേഹത്തിന് കഠിനമായ ഒരു പരമ്പരയായിരുന്നു എന്ന് വ്യക്തമാണ്. എങ്കിലും സഞ്ജുവിന്റെ കഴിവ് എത്രത്തോളമുണ്ടെന്ന് ഞങ്ങൾക്ക് എപ്പോഴും അറിയാമായിരുന്നു."
