ദേശീയഗാനം ആലപിക്കുമ്പോള്‍ സഞ്ജുവിന് മുന്നില്‍ കൈകൂപ്പി പ്രാര്‍ത്ഥിച്ച് 'പിഞ്ചോമന'; കുരുന്നിന്റെ പ്രത്യേക പ്രാര്‍ഥന ഫലം കണ്ടെന്ന് സോഷ്യല്‍ മീഡിയ

മുംബൈ: ടി20 ലോകകപ്പില്‍ ഇംഗ്ലണ്ടിനെതിരെ ഇന്ത്യന്‍ ജയം മലയാളി താരം സഞ്ജു സാംസണിന്റെ മികച്ച ഇന്നിങ്സിന്റെ കൂടി കരുത്തിലായിരുന്നു. 42 പന്തില്‍ 89 റണ്‍സെടുത്ത താരം മത്സരത്തിലെ താരവുമായി. മത്സര ശേഷം ഒരു വീഡിയോ സോഷ്യല്‍ മീഡിയയില്‍ വൈറലാണ്. ഇംഗ്ലണ്ടിനെതിരായ മത്സരത്തിന് തൊട്ടുമുമ്പുള്ള ദൃശ്യമാണ് ഇപ്പോള്‍ വൈറലാകുന്നത്. മത്സരത്തിന് മുന്‍പ് ഒരു പെണ്‍കുട്ടി സഞ്ജുവിന് മുന്നില്‍ നിന്ന് പ്രാര്‍ഥിക്കുന്നതാണ് ചിത്രമാണിത്.

മത്സരത്തിന് മുന്‍പായി ദേശീയ ഗാനം ആലപിക്കുന്ന സമയത്തെ ചിത്രവും വിഡിയോയുമാണ് പ്രചരിക്കുന്നത്. സഞ്ജുവുള്‍പ്പെടെ ഇന്ത്യന്‍ താരങ്ങളെല്ലാം മൈതാനത്ത് നിരനിരയായി നിന്നു. ആ സമയം സഞ്ജുവിന്റെ കൂടെ വന്ന കുട്ടി കൈകൂപ്പി പ്രാര്‍ഥിക്കുകയായിരുന്നു.

ഈ ചിത്രങ്ങള്‍ നിമിഷനേരം കൊണ്ട് വൈറലായി. മത്സരത്തില്‍ സഞ്ജു തകര്‍പ്പന്‍ പ്രകടനം കൂടി പുറത്തെടുത്തതോടെ ഈ ചിത്രങ്ങള്‍ വ്യാപകമായി വൈറലാകുകയായിരുന്നു. ആ പ്രാര്‍ഥനയുടെ ഫലം സഞ്ജുവിന് കിട്ടിയെന്നാണ് സോഷ്യല്‍ മീഡിയയിലെ കമിന്റുകള്‍. ഇന്റര്‍നെറ്റില്‍ ഇന്ന് കാണാവുന്ന ഏറ്റവും മനോഹരമായ ചിത്രമെന്നും ഹീറോയ്ക്കുവേണ്ടിയുള്ള പ്രാര്‍ഥനയാണിതെന്നും കമന്റുകള്‍ വന്നു.

മത്സരത്തില്‍ പേസര്‍ ജോഫ്ര ആര്‍ച്ചറിന്റെ ആദ്യ ഓവറില്‍ ഫോറും സിക്സും നേടിയാണ് സഞ്ജു തുടങ്ങിയത്. ആര്‍ച്ചറിന്റെ പന്തില്‍ സഞ്ജുവിന്റെ ഷോട്ട് മിഡ് ഓണില്‍ ഇംഗ്ലണ്ട് ക്യാപ്റ്റന്‍ ഹാരി ബ്രൂക്ക് കൈവിട്ടു. ആ സമയം താരത്തിന്റെ വ്യക്തിഗത സ്‌കോര്‍ 15-ലെത്തിയിരുന്നതേയുള്ളൂ. പിന്നീട് സഞ്ജു പിഴവൊന്നും വരുത്തിയില്ല. ഏഴ് സിക്‌സും എട്ട് ഫോറും നേടിയ താരം 42 പന്തില്‍ നിന്ന് 89 റണ്‍സെടുത്താണ് പുറത്തായത്.