- HOME
- NEWS
- POLITICS
- SPORTS
- CINEMA
- CHANNEL
- MONEY
- RELIGION
- INTERVIEW
- SCITECH
- OPINION
- FEATURE
- MORE
ക്യാപ്റ്റന് സഞ്ജു തിരിച്ചെത്തുന്നു! രാജസ്ഥാന് റോയല്സിന് ആശ്വാസം; വിക്കറ്റ് കീപ്പറാകാന് അനുമതി നല്കി ബിസിസിഐ; എന്സിഎയിലെ അവസാന ഫിറ്റ്നസ് പരിശോധനയില് ജയിച്ചതോടെ തീരുമാനം; ശനിയാഴ്ച പഞ്ചാബിനെതിരായ മത്സരത്തില് ടീമിനെ നയിക്കാന് മലയാളി താരം
വിക്കറ്റ് കീപ്പറാകാന് അനുമതി നല്കി ബിസിസിഐ, സഞ്ജു ക്യാപ്റ്റനായി തിരിച്ചെത്തും
ബെംഗളൂരു: കൈവിരലിനു പരുക്കേറ്റ് ശസ്ത്രക്രിയയ്ക്കു വിധേയനായ മലയാളി താരം സഞ്ജു സാംസണിന് വിക്കറ്റ് കീപ്പിങ്ങിന് ബിസിസിഐ അനുമതി നല്കി. ഇതോടെ ഐപിഎല്ലില് ശേഷിക്കുന്ന മത്സരങ്ങളില് രാജസ്ഥാന് റോയില്സിനെ നയിക്കാന് മലയാളി താരത്തിനാകും. സീസണിലെ ആദ്യ മൂന്ന് മത്സരങ്ങളില് രണ്ടിലും പരാജയപ്പെട്ട് പോയിന്റ് പട്ടികയില് ഒന്പതാം സ്ഥാനത്തേക്ക് പിന്തള്ളപ്പെട്ട ടീമിന് ആശ്വാസമാണ് ബിസിസിഐയുടെ തീരുമാനം. ശനിയാഴ്ച പഞ്ചാബ് കിംഗ്സിനെതിരെ നടക്കുന്ന മത്സരത്തില് രാജസ്ഥാന്റെ ക്യാപ്റ്റന് സ്ഥാനം സഞ്ജു ഏറ്റെടുക്കും.
ഗുവാഹത്തിയില് നടന്ന ചെന്നൈ സൂപ്പര് കിങ്സിനെതിരായ മത്സരത്തിനു പിന്നാലെയാണ്, ബെംഗളൂരുവിലെ ബിസിസിഐ സെന്റര് ഓഫ് എക്സലന്സിലേക്ക് സഞ്ജു പറന്നത്. ഐപിഎലിന്റെ ആദ്യ ഘട്ടത്തില് ബാറ്റിങ്ങിന് അനുമതി ലഭിച്ചിരുന്നെങ്കിലും, വിക്കറ്റ് കീപ്പര് ജോലിയില്നിന്ന് താരത്തെ വിലക്കിയിരുന്നു. ഇതോടെ ആദ്യ മൂന്നു മത്സരങ്ങളിലും ഇംപാക്ട് പ്ലെയറായി കളത്തിലിറങ്ങിയ സഞ്ജു, രാജസ്ഥാന് റോയല്സിന്റെ നായകസ്ഥാനം റിയാന് പരാഗിന് കൈമാറുകയും ചെയ്തിരുന്നു. എന്നാല് യുവതാരത്തിന് മികച്ച രീതിയില് ക്യാപ്റ്റന്സി വിനിയോഗിക്കാന് കഴിഞ്ഞിരുന്നില്ല.
ബെംഗളൂരുവിലെ ബിസിസിഐ സെന്റര് ഓഫ് എക്സലന്സില് കൂടുതല് പരിശോധനകള്ക്ക് വിധേയനായ സഞ്ജു, സമ്പൂര്ണ ഫിറ്റ്നസ് വീണ്ടെടുത്തെന്ന് തെളിഞ്ഞതോടെയാണ് ബിസിസിഐ അനുമതി നല്കിയത്. സഞ്ജുവിന്റെ അഭാവത്തില് ആദ്യ മൂന്നു മത്സരങ്ങളില് യുവതാരം ധ്രുവ് ജുറേലാണ് രാജസ്ഥാനായി വിക്കറ്റ് കീപ്പറായത്. ആദ്യ മൂന്നു മത്സരങ്ങളില്നിന്ന് ഒരേയൊരു ജയം സഹിതം 2 പോയിന്റുമായി പട്ടികയില് ഒന്പതാം സ്ഥാനത്താണ് രാജസ്ഥാന്. മൂന്നു മത്സരങ്ങളിലും രാജസ്ഥാനായി ഇന്നിങ്സ് ഓപ്പണ് ചെയ്ത സഞ്ജു, ഫീല്ഡിങ്ങിന് ഇറങ്ങിയിരുന്നില്ല.
ആദ്യ മത്സരത്തില് സണ്റൈസേഴ്സ് ഹൈദരാബാദിനെതിരെ അര്ധസെഞ്ചറിയുമായി (66) സീസണിന് തുടക്കമിട്ട സഞ്ജു, അടുത്ത മത്സരത്തില് കൊല്ക്കത്ത നൈറ്റ് റൈഡേഴ്സിനെതിരെ 13 റണ്സെടുത്ത് പുറത്തായി. ചെന്നൈ സൂപ്പര് കിങ്സിനെതിരെ രാജസ്ഥാന് ജയിച്ച മത്സരത്തില് 20 റണ്സായിരുന്നു സഞ്ജുവിന്റെ സമ്പാദ്യം. ഇനി ഏപ്രില് അഞ്ചിന് ചണ്ഡിഗഡില് പഞ്ചാബ് കിങ്സിനെതിരെയാണ് രാജസ്ഥാന് റോയല്സിന്റെ അടുത്ത മത്സരം.
മുംബൈയില് ഇംഗ്ലണ്ടിനെതിരായ ട്വന്റി20 മത്സരത്തിനിടെ ജോഫ്ര ആര്ച്ചറുടെ പന്തുകൊണ്ടാണ് സഞ്ജു സാംസന്റെ കൈവിരലിനു പരുക്കേറ്റത്. ബെംഗളൂരുവിലെ ബിസിസിഐ സെന്റര് ഓഫ് എക്സലന്സില് മൈനര് ശസ്ത്രക്രിയയ്ക്കു വിധേയനായ സഞ്ജുവിന്റെ റിക്കവറി നടപടികള് പൂര്ണമാകാത്ത സാഹചര്യത്തിലാണ് ഐപിഎലിനു മുന്നോടിയായി വിക്കറ്റ് കീപ്പര് ജോലി ചെയ്യുന്നത് വിലക്കിയത്. ബാറ്റിങ്ങിന് അനുമതി നല്കിയെങ്കിലും വിക്കറ്റ് കീപ്പിങ്ങിനും ഫീല്ഡിങ്ങിനും ഇറങ്ങുന്നതിനു മുന്പു വിരലുകള്ക്കു കുറച്ചു വിശ്രമംകൂടി വേണമെന്ന നിലപാടിലായിരുന്നു ബിസിസിഐ.