സ്റ്റൈലിഷ് ലുക്കിൽ വിശാഖ് നായർ; 'ചത്താ പച്ച'യിലെ ക്യാരക്ടർ പോസ്റ്റർ പുറത്ത്

കൊച്ചി: റീൽ വേൾഡ് എന്റർടൈൻമെന്റിന്റെ ബാനറിൽ അദ്വൈത് നായർ സംവിധാനം ചെയ്യുന്ന 'ചത്താ പച്ച: ദ റിങ് ഓഫ് റൗഡീസ്' എന്ന ചിത്രത്തിലെ നടൻ വിശാഖ് നായർ അവതരിപ്പിക്കുന്ന കഥാപാത്രത്തിന്റെ ക്യാരക്ടർ പോസ്റ്റർ പുറത്തിറങ്ങി. 'ചെറിയാൻ' എന്ന പേരിൽ അതിരുകടന്ന ആത്മവിശ്വാസമുള്ള കഥാപാത്രത്തെയാണ് വിശാഖ് നായർ ചിത്രത്തിൽ അവതരിപ്പിക്കുന്നത്. 2026 ജനുവരി 22-ന് ചിത്രം തിയേറ്ററുകളിലെത്തും.

തന്റെ ലോകത്ത് താൻ മാത്രമാണ് കേന്ദ്രബിന്ദു എന്ന് വിശ്വസിക്കുന്ന ഒരു കഥാപാത്രമായാണ് ചെറിയാൻ എത്തുന്നത് എന്ന് പോസ്റ്റർ സൂചന നൽകുന്നു. ഈ പോസ്റ്ററിന്റെ പ്രധാന പ്രത്യേകത, സാങ്കേതിക പ്രവർത്തകരുടെ പേരുകൾക്ക് പകരം, സംവിധാനം, നിർമ്മാണം, ഛായാഗ്രഹണം, സംഗീതം തുടങ്ങി എല്ലാ വിഭാഗങ്ങളിലും 'ചെറിയാൻ നായർ', 'ചെറിയാൻ ഷൗക്കത്ത്', 'ചെറിയാൻ എഹ്സാൻ ലോയ്' എന്നിങ്ങനെ ചെറിയാന്റെ വിവിധ രൂപങ്ങളിൽ പേരുകൾ നൽകിയിരിക്കുന്നു എന്നതാണ്. യഥാർത്ഥ അണിയറപ്രവർത്തകർ താൽക്കാലികമായി മാറിനിൽക്കുകയും, കഥാപാത്രം തന്നെ പോസ്റ്ററിന്റെ പൂർണ്ണ ശ്രദ്ധ പിടിച്ചുപറ്റുകയും ചെയ്യുന്ന ഈ വേറിട്ട അവതരണ ശൈലി സിനിമയോടുള്ള പ്രേക്ഷകരുടെ ആകാംഷ വർദ്ധിപ്പിക്കുന്നു.

നിറപ്പകിട്ടാർന്ന വസ്ത്രധാരണവും കൂളിംഗ് ഗ്ലാസും സ്വർണ്ണ വാച്ചുമണിഞ്ഞ്, ഗുസ്തി ഗോദയുടെ പശ്ചാത്തലത്തിൽ സ്റ്റൈലിഷ് ലുക്കിലാണ് വിശാഖ് നായർ പോസ്റ്ററിൽ പ്രത്യക്ഷപ്പെടുന്നത്. പറക്കുന്ന കറൻസി നോട്ടുകളും സ്പാർക്കുകളും ഗുസ്തി ചിഹ്നങ്ങളും ചേർന്ന് ചെറിയാന്റെ ആഡംബരപൂർണ്ണമായ ജീവിതശൈലിയും ഊർജ്ജസ്വല സ്വഭാവവും അടയാളപ്പെടുത്തുന്നു. മുൻപ് അർജുൻ അശോകൻ, റോഷൻ മാത്യു എന്നിവരുടെ കാരക്ടർ പോസ്റ്ററുകൾ പുറത്തിറങ്ങിയിരുന്നു.

മലയാളത്തിൽ 'ആനന്ദം', 'ഓഫീസർ ഓൺ ഡ്യൂട്ടി', 'ഫൂട്ടേജ്' തുടങ്ങിയ ചിത്രങ്ങളിലൂടെയും ഹിന്ദിയിൽ 'എമർജൻസി' ഉൾപ്പെടെയുള്ള സിനിമകളിലൂടെയും ശ്രദ്ധ നേടിയ വിശാഖ് നായരുടെ കരിയറിലെ ഏറ്റവും ശ്രദ്ധേയമായ കഥാപാത്രങ്ങളിലൊന്നായിരിക്കും 'ചെറിയാൻ' എന്ന് പോസ്റ്റർ വ്യക്തമാക്കുന്നു. ഫോർട്ട് കൊച്ചിയിലെ ഗുസ്തി സംസ്കാരത്തെ പശ്ചാത്തലമാക്കി ഒരുക്കുന്ന ഈ ചിത്രത്തിൽ മലയാള സിനിമയിലെ മികച്ച സാങ്കേതിക പ്രവർത്തകരാണ് അണിനിരക്കുന്നത്. ധർമ്മ പ്രൊഡക്ഷൻസ്, മൈത്രി മൂവി മേക്കേഴ്സ്, വേഫെറർ ഫിലിംസ്, പി.വി.ആർ ഐനോക്സ് പിക്ചേഴ്സ്, ദ പ്ലോട്ട് പിക്ചേഴ്സ് എന്നിവരാണ് ചിത്രത്തിന്റെ മറ്റ് വിതരണക്കാർ. ഛായാഗ്രഹണം ആനന്ദ് സി. ചന്ദ്രനാണ്.