ഗോകുലം ഗോപാലൻ, കാർത്തിക് ശങ്കർ പ്രധാന വേഷങ്ങളിൽ; 'പാൽപ്പായസം അറ്റ് ഗുരുവായൂർ' ചിത്രീകരണം ആരംഭിച്ചു

ഗുരുവായൂർ: കാർത്തിക് ശങ്കറും ഗോകുലം ഗോപാലനും പ്രധാന വേഷങ്ങളിലെത്തുന്ന 'പാൽപ്പായസം അറ്റ് ഗുരുവായൂർ' എന്ന സിനിമയുടെ ചിത്രീകരണം ശ്രീകൃഷ്ണ ജയന്തി ദിനത്തിൽ ഗുരുവായൂരിൽ ആരംഭിച്ചു. വിജീഷ് മണിയാണ് ചിത്രത്തിൻ്റെ രചനയും സംവിധാനവും നിർവഹിക്കുന്നത്.

ഗുരുവായൂർ ഗോകുലം വനമാലയിൽ നടന്ന പൂജയോടുകൂടിയാണ് ചിത്രീകരണത്തിന് തുടക്കമിട്ടത്. നിർമ്മാതാവും നടനുമായ ഗോകുലം ഗോപാലനും ജലജ ഗോപാലനും ചേർന്ന് ഭദ്രദീപം തെളിയിച്ചു. ഗുരുവായൂർ ദേവസ്വം മെമ്പർ മനോജ് ബി നായർ പൂജിച്ച സ്ക്രിപ്റ്റ് സംവിധായകൻ വിജീഷ് മണിക്ക് കൈമാറി. ഗുരുവായൂർ ദേവസ്വം ചെയർമാൻ ഡോ. വി.കെ. വിജയൻ ആദ്യ ക്ലാപ്പ് അടിച്ചു.

ചടങ്ങിൽ മൗനയോഗി ഹരിനാരായൺ സ്വാമി അനുഗ്രഹ പ്രഭാഷണം നടത്തി. ഗുരുവായൂർ മുൻസിപ്പൽ ചെയർമാൻ കൃഷ്ണദാസ്, രതീഷ് വേഗ, കാർത്തിക് ശങ്കർ, ജയരാജ് വാര്യർ, ഗിരീഷ് കൊടുങ്ങല്ലൂർ, സുരേന്ദ്രൻ, ഉദയശങ്കരൻ, സുജിത്ത് മട്ടന്നൂർ, ശ്രീജിത്ത് ഗുരുവായൂർ, ബാബു ഗുരുവായൂർ, സജീവൻ നമ്പിയത്ത്, രവിചങ്കത്ത്, കമാൽ, ശോഭാ ഹരിനാരായൺ, ലൈന നായർ, മുകേഷ് ലാൽ ഗുരുവായൂർ, ഷഫീഖ്, അച്ചുതൻ, പ്രാർത്ഥന പ്രശാന്ത് എന്നിവർ ആശംസകളറിയിച്ചു. എ.എസ്. ദിനേശാണ് ചിത്രത്തിൻ്റെ പിആർഒ.