മതസൗഹാർദം തകർക്കുന്നു; ക്രൈസ്തവരെയും താമരശ്ശേരി ബിഷപ്പിനെയും അപമാനിക്കുന്നു; ഹൈക്കോടതി ഉത്തരവിനെതിരെ അപ്പീലുമായി കത്തോലിക്ക കോൺഗ്രസ്; 'ഹാൽ' ഹൈക്കോടതി വീണ്ടും കാണും

കൊച്ചി: ഷെയ്ൻ നിഗം നായകനാകുന്ന 'ഹാൽ' സിനിമ ഹൈക്കോടതി വീണ്ടും കാണും. സിനിമ മതസൗഹാർദം തകർക്കുന്നതാണെന്നും ക്രൈസ്തവരെയും താമരശ്ശേരി ബിഷപ്പിനെയും അപമാനിക്കുന്ന രംഗങ്ങൾ ഉൾക്കൊള്ളുന്നുവെന്നും ആരോപിച്ച് കത്തോലിക്ക കോൺഗ്രസ് സമർപ്പിച്ച അപ്പീലിലാണ് ഹൈക്കോടതിയുടെ നിർണായക നടപടി. സിനിമയ്ക്ക് പ്രദർശനാനുമതി നൽകിയ സിംഗിൾ ബെഞ്ചിന്റെ ഉത്തരവ് റദ്ദാക്കണമെന്നാണ് കത്തോലിക്ക കോൺഗ്രസിന്റെ പ്രധാന ആവശ്യം.

വീര സംവിധാനം ചെയ്ത ‘ഹാൽ’ സിനിമ പ്രദർശിപ്പിക്കാൻ സിംഗിൾ ബെഞ്ച് നേരത്തെ അനുമതി നൽകിയിരുന്നു. എന്നാൽ, സിനിമയിൽ 16 ഭാഗങ്ങളിൽ മാറ്റങ്ങൾ വേണമെന്ന് സെൻസർ ബോർഡ് നിർദേശിച്ചിരുന്നു. ഇത് പരിഗണിക്കാതെ, സിനിമ ആദ്യം കണ്ട സിംഗിൾ ബെഞ്ച് ജസ്റ്റിസ് വി.ജി. അരുൺ രണ്ട് ഭാഗങ്ങൾ മാത്രം മ്യൂട്ട് ചെയ്താൽ മതിയെന്ന് ഉത്തരവിടുകയായിരുന്നു. സംഭാഷണത്തിലെ 'ധ്വജ പ്രണാമത്തിലെ ധ്വജം' എന്ന വാക്കും, മതാടിസ്ഥാനത്തിലുള്ള വിവാഹത്തിന്റെ കണക്കുകൾ പരാമർശിക്കുന്ന ഭാഗവുമാണ് മ്യൂട്ട് ചെയ്യാൻ കോടതി നിർദേശിച്ചത്. ഈ ഉത്തരവിനെതിരെയാണ് കത്തോലിക്ക കോൺഗ്രസ് ഡിവിഷൻ ബെഞ്ചിനെ സമീപിച്ചത്.

സെൻസർ ബോർഡിന്റെ നിബന്ധനകൾ ഏകപക്ഷീയവും യുക്തിരഹിതവുമാണെന്നും സിനിമയുടെ ഉള്ളടക്കത്തിലേക്കുള്ള അനാവശ്യ കടന്നുകയറ്റം അഭിപ്രായസ്വാതന്ത്ര്യത്തെ ഹനിക്കുന്നതാണെന്നും സിംഗിൾ ബെഞ്ച് അന്ന് നിരീക്ഷിച്ചിരുന്നു. ഭരണഘടനയുടെ അടിസ്ഥാന തത്വങ്ങളായ മതനിരപേക്ഷതയും സാഹോദര്യവും അവഗണിച്ചാകരുത് നിയന്ത്രണങ്ങളെന്നും കോടതി ഉത്തരവിൽ വ്യക്തമാക്കിയിരുന്നു. ജെവിജെ പ്രൊഡക്ഷൻസ് വലിയ മുതൽമുടക്കിൽ നിർമ്മിച്ച ഈ ചിത്രത്തിന്റെ തിരക്കഥ നിഷാദ് കോയയുടേതാണ്. രാജ് സാഗർ ഫിലിംസാണ് ചിത്രം പ്രദർശനത്തിനെത്തിക്കുന്നത്.