പ്രണയദിനത്തിൽ അവർ ഒന്നിക്കുന്നു; നടി മൃണാൾ താക്കൂറും ധനുഷും വിവാഹിതരാകുന്നുവെന്ന് റിപ്പോർട്ട്; കല്യാണം ഫെബ്രുവരി 14ന് നടക്കും?; പ്രചരിക്കുന്ന വാർത്തകളിലെ സത്യമെന്ത്?

ബോളിവുഡ് താരം മൃണാൾ താക്കൂറും തെന്നിന്ത്യൻ നടൻ ധനുഷും വിവാഹിതരാകുന്നുവെന്ന് റിപ്പോർട്ട്. വാലന്റൈൻസ് ദിനമായ ഫെബ്രുവരി 14ന് ഇരുവരുടെയും വിവാഹം നടക്കുമെന്നാണ് അഭ്യൂഹങ്ങൾ. എന്നാൽ, ഈ വിഷയത്തിൽ ഇതുവരെ ഔദ്യോഗിക സ്ഥിരീകരണമൊന്നും ഉണ്ടായിട്ടില്ല.

സോഷ്യൽ മീഡിയയിലൂടെയാണ് ഇരുവരുടെയും വിവാഹത്തെക്കുറിച്ചുള്ള വ്യാപകമായ ചർച്ചകൾ നടക്കുന്നത്. വളരെ സ്വകാര്യമായ ഒരു ചടങ്ങായിരിക്കും വിവാഹമെന്നും അടുത്ത ബന്ധുക്കളും സുഹൃത്തുക്കളും മാത്രമാകും ഇതിൽ പങ്കെടുക്കുകയെന്നും റിപ്പോർട്ടുകൾ സൂചിപ്പിക്കുന്നു.

മൃണാളും ധനുഷും പ്രണയത്തിലാണെന്ന അഭ്യൂഹങ്ങൾ കഴിഞ്ഞ കുറച്ച് നാളുകളായി പ്രചരിക്കുന്നുണ്ട്. അജയ് ദേവ്‌ഗണും മൃണാളും പ്രധാന വേഷങ്ങളിലെത്തിയ ബോളിവുഡ് ചിത്രം 'സൺ ഓഫ് സർദാർ 2' ന്റെ പ്രീമിയർ ചടങ്ങിൽ ഇരുവരും ആലിംഗനം ചെയ്ത് നിൽക്കുന്ന ചിത്രം നേരത്തെ സമൂഹ മാധ്യമങ്ങളിൽ പ്രചരിച്ചിരുന്നു. ഈ ചിത്രത്തോടെയാണ് പ്രണയ അഭ്യൂഹങ്ങൾക്ക് തുടക്കമായത്. മൃണാളിന്റെ പിറന്നാൾ ആഘോഷത്തിലും ധനുഷ് പങ്കെടുത്തിരുന്നു. എന്നാൽ, അജയ് ദേവ്‌ഗണാണ് ധനുഷിനെ ക്ഷണിച്ചതെന്നായിരുന്നു മൃണാൾ അന്ന് പ്രതികരിച്ചത്.

പിന്നീട്, ധനുഷിന്റെ മൂന്ന് സഹോദരിമാരെയും മൃണാൾ ഇൻസ്റ്റഗ്രാമിൽ പിന്തുടരുന്നതായി സമൂഹ മാധ്യമങ്ങളിൽ പോസ്റ്റുകൾ വന്നിരുന്നു. ധനുഷ് ചിത്രം 'തേരെ ഇഷ്‌ക് മേ'യുടെ നിർമാതാവ് കനികാ ധില്ലൻ ഒരുക്കിയ പാർട്ടിയിലും ഇരുവരും ഒരുമിച്ച് പങ്കെടുത്തതിന്റെ ചിത്രങ്ങളും പുറത്തുവന്നിരുന്നു. കൂടാതെ, സ്പോട്ടിഫൈയിൽ ധനുഷും മൃണാളും ഒരേ പ്ലേലിസ്റ്റ് പങ്കുവയ്ക്കുന്നതായും ആരാധകർ കണ്ടെത്തിയിരുന്നു. മൃണാളിന്റെ സോഷ്യൽ മീഡിയ പോസ്റ്റുകൾക്ക് ധനുഷ് കമന്റ് ചെയ്യാറുമുണ്ട്. ഈ വിഷയത്തിൽ ഔദ്യോഗിക പ്രതികരണത്തിനായി സിനിമാ ലോകവും ആരാധകരും ആകാംക്ഷയോടെ കാത്തിരിക്കുകയാണ്.