മമ്മൂട്ടിയും വിനായകനും പ്രധാന വേഷങ്ങളിലെത്തുന്ന 'കളങ്കാവല്‍'; 'റെഡ്ബാക്ക്' ഗാനം പുറത്ത്; ചിത്രം ഡിസംബര്‍ അഞ്ചിന് തിയറ്ററുകളിൽ
കൊച്ചി: മമ്മൂട്ടിയും വിനായകനും കേന്ദ്രകഥാപാത്രങ്ങളെ അവതരിപ്പിക്കുന്ന 'കളങ്കാവല്‍' എന്ന ചിത്രത്തിലെ 'റെഡ്ബാക്ക്' ഗാനം പുറത്തിറങ്ങി. ജിതിന്‍ കെ. ജോസ് സംവിധാനം ചെയ്യുന്ന ഈ ചിത്രം ഡിസംബര്‍ അഞ്ചിന് ആഗോളതലത്തില്‍ റിലീസ് ചെയ്യും. സിനിമയുടെ റിലീസ് തീയതി അടുത്തിരിക്കെ പുറത്തുവന്ന പുതിയ ഗാനം ആരാധക ശ്രദ്ധ നേടുകയാണ്.
ചിത്രത്തിന്റെ സംവിധായകനായ ജിതിന്‍ കെ. ജോസ് തന്നെയാണ് 'റെഡ്ബാക്ക്' ഗാനത്തിന് വരികളെഴുതി ഈണം പകര്‍ന്നിരിക്കുന്നത്. അദ്യാന്‍ സയീദാണ് ഗാനം ആലപിച്ചിരിക്കുന്നത്. ക്രൈം ഡ്രാമ ത്രില്ലര്‍ വിഭാഗത്തില്‍ പെടുന്ന ചിത്രത്തിന്റെ നിഗൂഢതയും ഉദ്വേഗവും പ്രേക്ഷകരിലേക്ക് എത്തിക്കുന്ന രീതിയിലാണ് ഇംഗ്ലീഷിലുള്ള ഈ ഗാനം ഒരുക്കിയിരിക്കുന്നത്. മമ്മൂട്ടി കമ്പനിയുടെ ബാനറില്‍ നിര്‍മ്മിക്കുന്ന ഏഴാമത്തെ ചിത്രമാണ് 'കളങ്കാവല്‍'. വേഫെറര്‍ ഫിലിംസാണ് കേരളത്തിലെ വിതരണക്കാര്‍.
ജിഷ്ണു ശ്രീകുമാറും ജിതിന്‍ കെ. ജോസും ചേര്‍ന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. മുജീബ് മജീദ് സംഗീതം നല്‍കിയ ചിത്രത്തിലെ മറ്റ് ഗാനങ്ങള്‍ നേരത്തെ സ്പോട്ടിഫൈ പ്ലാറ്റ്‌ഫോമിലൂടെ ഓഡിയോ ജൂക്ബോക്സായി പുറത്തിറങ്ങി മികച്ച പ്രതികരണം നേടിയിരുന്നു. റെട്രോ തമിഴ് ശൈലിയിലൊരുക്കിയ ഗാനങ്ങളും ഇതിനോടകം സാമൂഹിക മാധ്യമങ്ങളില്‍ ചര്‍ച്ചയായിട്ടുണ്ട്. ദുല്‍ഖര്‍ സല്‍മാന്‍ നായകനായ 'കുറുപ്പ്' എന്ന ഹിറ്റ് ചിത്രത്തിന്റെ കഥയെഴുതി ശ്രദ്ധേയനായ ജിതിന്‍ കെ. ജോസ് ആദ്യമായി സംവിധാനം ചെയ്യുന്ന ചിത്രം കൂടിയാണ് 'കളങ്കാവല്‍'.
എട്ടു മാസത്തെ ഇടവേളയ്ക്ക് ശേഷം തിയേറ്ററുകളിലെത്തുന്ന മമ്മൂട്ടി ചിത്രമെന്ന നിലയില്‍ കളങ്കാവലിനായി പ്രേക്ഷകര്‍ വലിയ ആകാംഷയോടെയാണ് കാത്തിരിക്കുന്നത്. ചിത്രത്തിന്റെ ടീസറും ട്രെയ്‌ലറും മികച്ച പ്രേക്ഷക സ്വീകാര്യത നേടിയിരുന്നു. 'നിലാ കായും' എന്ന വരികളോടെ ആരംഭിക്കുന്ന ഗാനത്തിന്റെ ലിറിക്കൽ വീഡിയോയും വിനായകന്റെ അഭിമുഖവും മുമ്പ് പുറത്തുവിട്ടിരുന്നു.