അർജുൻ സർജ സംവിധാനം ചെയ്യുന്ന 'സീതാ പയനം'; നായികയായി മകൾ ഐശ്വര്യ അർജുൻ; ചിത്രം ഫെബ്രുവരി 14ന് തീയേറ്ററുകളിൽ എത്തും

ബെംഗളൂരു: അർജുൻ സർജ സംവിധാനം ചെയ്യുന്ന പുതിയ ചിത്രം 'സീതാ പയനം' 2026 ഫെബ്രുവരി 14-ന് തിയറ്ററുകളിലെത്തും. പ്രണയദിനത്തിൽ റിലീസ് ചെയ്യുന്ന ഈ ബഹുഭാഷാ ചിത്രത്തിൽ അർജുൻ സർജയുടെ മകളും അഭിനേത്രിയുമായ ഐശ്വര്യ അർജുനാണ് നായികയായി എത്തുന്നത്. നിരഞ്ജൻ സുധീന്ദ്രനാണ് ചിത്രത്തിലെ നായകൻ. അച്ഛനും മകളും ഒരുമിച്ച് അഭിനയിക്കുന്നു എന്ന പ്രത്യേകതയും ഈ ചിത്രത്തിനുണ്ട്.

പുതുവർഷത്തോടനുബന്ധിച്ച് പുറത്തിറക്കിയ ഫസ്റ്റ് ലുക്ക് പോസ്റ്ററിലൂടെയാണ് ചിത്രത്തിൻ്റെ റിലീസ് തീയതി അണിയറ പ്രവർത്തകർ ഔദ്യോഗികമായി പ്രഖ്യാപിച്ചത്. ഗോകുലം ഗോപാലൻ്റെ ശ്രീ ഗോകുലം മൂവീസാണ് ചിത്രത്തിൻ്റെ കേരളത്തിലെ വിതരണാവകാശം നേടിയിരിക്കുന്നത്. ശ്രീ ഗോകുലം മൂവീസിൻ്റെ ഔദ്യോഗിക ഡിസ്ട്രിബ്യൂഷൻ പങ്കാളികളായ ഡ്രീം ബിഗ് ഫിലിംസ് ചിത്രം കേരളത്തിലെ തിയറ്ററുകളിലേക്ക് എത്തിക്കും. ഒരു റൊമാന്റിക് ഡ്രാമ പശ്ചാത്തലത്തിലാണ് 'സീതാ പയനം' ഒരുങ്ങുന്നത്.

കന്നഡ ആക്ഷൻ സൂപ്പർ സ്റ്റാർ ധ്രുവ സർജയും ചിത്രത്തിൽ ശ്രദ്ധേയമായ കഥാപാത്രത്തെ അവതരിപ്പിക്കുന്നുണ്ട്. പ്രകാശ് രാജ്, സത്യരാജ്, കോവൈ സരള, ബിത്തിരി സതി, സരൺ, സിരി ഹനുമന്ത്, മണി ചന്ദന, സുമിത്ര, പോസാനി കൃഷ്ണ മൂർത്തി, ജബർദസ്ത് ഫണി, നര്ര ശ്രീനു, ഫിഷ് വെങ്കട്ട് തുടങ്ങിയ വലിയൊരു സഹതാരനിരയും ചിത്രത്തിലുണ്ട്. അർജുൻ സർജ തന്നെയാണ് 'സീതാ പയനം' എന്ന ചിത്രത്തിൻ്റെ തിരക്കഥയും സംവിധാനവും നിർവഹിച്ചിരിക്കുന്നത്.

സംഗീതം അനൂപ് റൂബൻസും എഡിറ്റിംഗ് അയൂബ് ഖാനും ഛായാഗ്രഹണം ജി. ബാലമുരുകനും കൈകാര്യം ചെയ്യുന്നു. 'പട്ടത്ത് യാനൈ', 'പ്രേമ ബാരാഹ' തുടങ്ങിയ ചിത്രങ്ങളിലൂടെ ശ്രദ്ധ നേടിയ ഐശ്വര്യ അർജുൻ ഏറെ നാളുകൾക്ക് ശേഷം വെള്ളിത്തിരയിൽ തിരിച്ചെത്തുന്ന ചിത്രം എന്ന നിലയിലും 'സീതാ പയനം' പ്രേക്ഷകർ ആകാംക്ഷയോടെ കാത്തിരിക്കുന്ന ഒന്നാണ്.