വിസ്മയ 'തുടക്കം'; മോഹൻലാലിന്റെ മകളുടെ അരങ്ങേറ്റ ചിത്രം; ജൂഡ് ആന്റണി ജോസഫ് ഒരുക്കുന്ന സിനിമയുടെ ഫസ്റ്റ് ലുക്ക് പോസ്റ്റർ പുറത്ത്
കൊച്ചി: വിസ്മയ മോഹൻലാൽ നായികയായി അരങ്ങേറ്റം കുറിക്കുന്ന 'തുടക്കം' എന്ന ചിത്രത്തിന്റെ ഫസ്റ്റ് ലുക്ക് പോസ്റ്റർ പുറത്തുവിട്ടു. മോഹൻലാൽ തന്റെ ഔദ്യോഗിക ഫേസ്ബുക്ക് പേജിലൂടെയാണ് പോസ്റ്റർ പങ്കുവെച്ചത്. ജൂഡ് ആന്റണി ജോസഫ് സംവിധാനം ചെയ്യുന്ന ഈ ചിത്രത്തിൽ മോഹൻലാലിന്റെ മുഖം അവ്യക്തമായി നൽകിയിട്ടുള്ളത് അദ്ദേഹം അതിഥി വേഷത്തിലെത്തുമെന്ന അഭ്യൂഹങ്ങൾക്ക് ബലം നൽകുന്നു. ആന്റണി പെരുമ്പാവൂർ ആശിർവാദ് സിനിമാസിന്റെ ബാനറിൽ നിർമ്മിക്കുന്ന ഈ ചിത്രം ചലച്ചിത്രലോകത്ത് വലിയ പ്രതീക്ഷയോടെയാണ് ഉറ്റുനോക്കുന്നത്.
'2018' എന്ന മെഗാഹിറ്റിന് ശേഷം ജൂഡ് ആന്റണി ജോസഫ് ഒരുക്കുന്ന ചിത്രമെന്ന നിലയിലും 'തുടക്ക'ത്തിന് വലിയ പ്രാധാന്യമുണ്ട്. വിസ്മയ മോഹൻലാലിനൊപ്പം നിർമ്മാതാവ് ആന്റണി പെരുമ്പാവൂരിന്റെ മകൻ ആശിഷ് ജോ ആന്റണിയും ചിത്രത്തിൽ പ്രധാന വേഷത്തിലെത്തുന്നുണ്ട്. 'എമ്പുരാൻ' എന്ന ചിത്രത്തിലെ ചെറിയ വേഷത്തിലൂടെ അഭിനയ രംഗത്ത് തുടക്കം കുറിച്ച ആശിഷിന്റെ മെയിൻ സ്ട്രീം സിനിമയിലെ സുപ്രധാന കഥാപാത്രമാണിത്. ഒരു കൊച്ചു കുടുംബചിത്രമെന്ന് സംവിധായകൻ നേരത്തെ വിശേഷിപ്പിച്ച 'തുടക്ക'ത്തിന്റെ ചിത്രീകരണം കഴിഞ്ഞ വർഷം നവംബറിലായിരുന്നു ആരംഭിച്ചത്. ചിത്രത്തിന്റെ ഔദ്യോഗിക ലോഞ്ചിംഗ് ഒക്ടോബർ മുപ്പതിന് കൊച്ചിയിൽ വെച്ച് നടന്നിരുന്നു.
ഡോ. എമിൽ ആന്റണിയും ഡോ. അനീഷ ആന്റണിയുമാണ് ചിത്രത്തിന്റെ എക്സിക്യൂട്ടീവ് പ്രൊഡ്യൂസർമാർ. ലിനീഷ് നെല്ലിക്കൽ, അഖിൽ കൃഷ്ണ, ജൂഡ് ആന്റണി ജോസഫ് എന്നിവർ ചേർന്നാണ് തിരക്കഥ ഒരുക്കിയിരിക്കുന്നത്. ജെയ്ക്ക് ബിജോയ് സംഗീതവും ജോമോൻ ടി ജോൺ ഛായാഗ്രഹണവും നിർവഹിക്കുന്നു. ചമൻ ചാക്കോ എഡിറ്റിംഗും സന്തോഷ് രാമൻ പ്രൊഡക്ഷൻ ഡിസൈനും ജിതേഷ് പൊയ്യ മേക്കപ്പും അരുൺ മനോഹർ വസ്ത്രാലങ്കാരവും നിർവഹിച്ചിരിക്കുന്നു. സൈലക്സ് ഏബ്രഹാം ചീഫ് അസ്സോസ്സിയേറ്റ് ഡയറക്ടറും മനോഹരൻ' കെ. പയ്യന്നൂർ ഫിനാൻസ് കൺട്രോളറുമാണ്. വിനോദ് ശേഖർ, ശ്രീക്കുട്ടൻ എന്നിവർ പ്രൊഡക്ഷൻ എക്സിക്യൂട്ടീവ്സും ബിജു തോമസ് പ്രൊഡക്ഷൻ കൺട്രോളറും വാഴൂർ ജോസ് പിആർഒയുമാണ്.