20 കോടിയുടെ വിജയ് സേതുപതി ചിത്രം ബോക്‌സ് ഓഫിസില്‍ തകര്‍ന്നടിഞ്ഞു: ഒ.ടി.ടിയിലെത്തിയതും ആരും അറിഞ്ഞില്ല; 'എയ്‌സ്' തമിഴകത്തില്‍ ദുരന്തമായപ്പോള്‍
20 കോടിയുടെ വിജയ് സേതുപതി ചിത്രം ബോക്‌സ് ഓഫിസില്‍ തകര്‍ന്നടിഞ്ഞു
ചെന്നൈ: തെന്നിന്ത്യന്‍ സൂപ്പര്‍താരം വിജയ് സേതുപതിയുടെ പുതിയ ചിത്രം ബോക്‌സ് ഓഫിസില്‍ ദുരന്തമായി മാറിയതിന് പിന്നാലെ ആരോരും അറിയാതെ ഒ.ടി.ടി.യിലും എത്തി. മഹാരാജ, 96 അടക്കമുള്ള സൂപ്പര്‍ ഹിറ്റ് ചിത്രങ്ങള്‍ വിജയ് സേതുപതിയുടെ ഹിറ്റ് ചാര്‍ട്ടില്‍ ഉണ്ടെങ്കിലും മെയ് മാസം 23 ന് റിലീസായ എയ്‌സ് എന്ന ചിത്രം ബോക്‌സ് ഓഫിസില്‍ തകര്‍ന്നടിഞ്ഞിരുന്നു. ഇതിന് പിന്നാലെയാണ് ആരോരുമറിയാതെ ചിത്രം ഒ.ടി.ടിയിലെത്തിയത്.
അറുമുഖ കുമാര്‍ രചനയും സംവിധാനവും നിര്‍മ്മാണവും നിര്‍വ്വഹിച്ചിരിക്കുന്ന എയ്‌സ് റൊമാന്റിക് ക്രൈം കോമഡി വിഭാഗത്തില്‍ പെടുന്ന ചിത്രമാണ്. 'ബോള്‍ഡ് കണ്ണന്‍' എന്ന വിജയ് സേതുപതി അവതരിപ്പിക്കുന്ന കഥാപാത്രവും അയാള്‍ക്ക് ചുറ്റും സംഭവിക്കുന്ന ക്രൈമും കോമഡിയും നിറഞ്ഞ സംഭവങ്ങളുമാണ് സിനിമയുടെ ഇതിവൃത്തം. പ്രൈം വിഡിയോസിലാണ് ചിത്രം സ്ട്രീം ചെയ്യുന്നത്.
തുടക്കത്തില്‍ ഏകദേശം ഒരു കോടി രൂപയോളം നേടിയ സിനിമക്ക് തുടര്‍ന്നുള്ള ദിവസങ്ങളില്‍ കളക്ഷന്‍ വര്‍ധിപ്പിക്കാനായില്ല. മോശം പ്രതികരണങ്ങളും പ്രൊമോഷന്റെ കുറവും സിനിമയുടെ പ്രകടനത്തെ സാരമായി ബാധിച്ചു. 20 കോടിക്ക് മുകളില്‍ ബജറ്റില്‍ ഒരുക്കിയ ചിത്രം തീയറ്ററില്‍ നിന്നും 9.40 കോടി രൂപ മാത്രമാണ് നേടിയിരിക്കുന്നത്. രുക്മിണി വസന്ത് നായികയാവുന്ന ചിത്രത്തില്‍ യോഗി ബാബു, ബി.എസ് അവിനാഷ്, ബബ്ലൂ പൃഥ്വിരാജ്, ദിവ്യ പിള്ള, രമേശ് തിലക് തുടങ്ങിയവരാണ് മറ്റ് കഥാപാത്രങ്ങളെ അവതരിപ്പിച്ചിരിക്കുന്നത്.