'ഒളിവില്‍ പോകുന്നത് നല്ലതാണെന്ന് ഞാന്‍ പറയില്ല; എല്ലാ തൊഴിലിടങ്ങളിലും മാറ്റം വരണം'; നവ്യ നായര്‍ പറയുന്നു
'ഒളിവില്‍ പോകുന്നത് നല്ലതാണെന്ന് ഞാന്‍ പറയില്ല
കൊച്ചി: സിനിമയില്‍ മാത്രമല്ല എല്ലാ തൊഴിലിടങ്ങളിലും കാലാനുസൃതമായ മാറ്റങ്ങള്‍ വരണമെന്ന് നടി നവ്യ നായര്‍. ഹേമ കമ്മിറ്റി റിപ്പോര്‍ട്ടിനെ സംബന്ധിച്ച് മാധ്യമങ്ങളുടെ ചോദ്യങ്ങളോട് പ്രതികരിക്കുകയായിരുന്നു നവ്യ. താരത്തിന്റെ നൃത്തവിദ്യാലയമായ മാതംഗി ഡാന്‍സ് സ്‌കൂളിന്റെ മാതംഗി ഫെസ്റ്റുമായി ബന്ധപ്പെട്ട കാര്യങ്ങള്‍ മാധ്യമങ്ങളുമായി പങ്കുവെയ്ക്കുന്നതിനിടെയായിരുന്നു നവ്യയുടെ മറുപടി.
ഒളിവില്‍ പോകുന്നത് നല്ലതാണെന്ന് താന്‍ പറയില്ലെന്നും കോടതിയും പൊലീസും ഇടപെട്ട കേസില്‍ അതിന്റേതായ തീരുമാനങ്ങളല്ലേ വരേണ്ടതെന്നും താരം പറഞ്ഞു. നടന്‍ സിദ്ദിഖ് ഒളിവില്‍ പോയതിനേക്കുറിച്ച് ചോദിച്ചപ്പോഴായിരുന്നു നവ്യയുടെ ഈ മറുപടി.
'എല്ലാ നിയമങ്ങളിലും കാലാനുസൃതമായ മാറ്റങ്ങള്‍ എപ്പോഴും വരണം. നൃത്തത്തിന്റെ കാര്യമെടുത്താല്‍ കലാക്ഷേത്രയിലൊക്കെ പ്രശ്‌നങ്ങളുണ്ടായിട്ടുണ്ട്. അതൊക്കെ നമ്മള്‍ പത്രങ്ങളില്‍ വായിച്ചതുമാണ്. സിനിമ, നൃത്തം എന്നു മാത്രമല്ല എല്ലായിടത്തും മാറ്റങ്ങള്‍ വരണം.
ചോദ്യങ്ങളില്‍ നിന്ന് ഒളിച്ചോടി പോകാനൊന്നും ഞാന്‍ ഉദ്ദേശിക്കുന്നില്ല, നിങ്ങള്‍ക്കൊക്കെ എന്താണോ മനസില്‍ തോന്നുന്നത് അത് തന്നെയാണ് എനിക്കും തോന്നുന്നത് എന്ന് മനസിലാക്കിയാല്‍ മതി'- നവ്യ പറഞ്ഞു.