ഇനി ഇതുപോലൊരു വർഷം എന്റെ ജീവിതത്തിൽ വരാതിരിക്കട്ടെ..; കുറെ അനുഭവിച്ചു..പലതും ഉള്ളിൽ ഒതുക്കിയാണ് ഞാൻ ചിരിച്ചത്; ചർച്ചയായി അപ്സരയുടെ വാക്കുകൾ

മിനിസ്ക്രീൻ പ്രേക്ഷകരുടെ പ്രിയതാരവും ബിഗ് ബോസ് മലയാളം സീസൺ 6 മത്സരാർത്ഥിയുമായിരുന്ന അപ്സരയുടെ പുതുവർഷ പോസ്റ്റ് സമൂഹമാധ്യമങ്ങളിൽ വലിയ ശ്രദ്ധ നേടുന്നു. കഴിഞ്ഞ വർഷം മാനസികവും ശാരീരികവും സാമ്പത്തികവുമായ നിരവധി പോരാട്ടങ്ങളാൽ നിറഞ്ഞതായിരുന്നുവെന്ന് അപ്സര ഇൻസ്റ്റഗ്രാമിൽ കുറിച്ചു. കടന്നുപോയ വർഷം ജീവിതത്തെക്കുറിച്ച് ഒരുപാട് പഠിപ്പിച്ചുവെന്നും, തന്നെ "പിന്നിൽ നിന്ന് കുത്തിയവർക്ക്" നന്ദിയുണ്ടെന്നും താരം തുറന്നുപറഞ്ഞു.

"ഒരു പുതിയ തുടക്കം. ഇനി വരാനിരിക്കുന്നതെല്ലാം നല്ലതാകട്ടെ, 2025 പോലെ ഒരു വർഷം ഇനി എന്റെ ജീവിതത്തിൽ വരാതിരിക്കട്ടെ," എന്നാണ് അപ്സരയുടെ കുറിപ്പ് ആരംഭിക്കുന്നത്. "മാനസികമായും, ശാരീരികമായും, സാമ്പത്തികമായും നേരിടേണ്ടി വന്ന ഒട്ടേറെ പോരാട്ടങ്ങളും അനുഭവങ്ങളുമായി ജീവിതം എന്താണെന്ന് എന്നെ പഠിപ്പിച്ച വർഷം. എന്നിലെ നന്മയും തിന്മയും തിരിച്ചറിയാൻ സഹായിച്ച വർഷം... മനുഷ്യൻ യഥാർത്ഥത്തിൽ എന്താണെന്ന് മനസ്സിലാക്കി തന്ന വർഷം," താരം കുറിച്ചു.

തുറന്ന മനസ്സിനേക്കാൾ ഉള്ളിൽ പലതും ഒതുക്കി പുറത്തേക്ക് ചിരിക്കുന്നതാണ് നല്ലതെന്ന് തനിക്ക് ബോധ്യപ്പെട്ടെന്നും അപ്സര പറയുന്നു. "ഒരു പരിധിക്കു മീതെ ആരെയും സ്നേഹിക്കുകയോ വിശ്വസിക്കുകയോ ചെയ്യരുത് എന്ന് പഠിപ്പിച്ച വർഷം. കാണുന്നതെല്ലാം നല്ലതല്ലെന്ന് ബോധ്യപ്പെടുത്തിയ വർഷം. ഓരോ കാര്യത്തിന്റെയും മൂല്യവും, നല്ലതും മോശവും തിരിച്ചറിയാനുള്ള കഴിവ് നൽകി തന്ന വർഷം," എന്നും പോസ്റ്റിൽ വിശദീകരിക്കുന്നു.