ആ മദ്യം വാങ്ങിയത് ഞാന്‍ തന്നെ, പക്ഷേ എനിക്ക് വേണ്ടിയായിരുന്നില്ല, എന്റെ സുഹൃത്തിന് വേണ്ടി; സുഹൃത്ത് ആരെന്ന ആകാംഷയില്‍ ആരാധകര്‍; വീഡിയോ പങ്കുവെച്ച് അല്ലു അര്‍ജുന്‍
പുഷ്പ 2 വിന്റെ വരവിനായി കാത്തിരിക്കുകയാണ് തെന്നിന്ത്യന്‍ സിനിമാ പ്രേക്ഷകര്‍. ക്രിസ്മസ് റിലീസായി ഡിസംബര്‍ 5 നാണ് ചിത്രം തിയറ്ററുകളിലെത്തുക. പുഷ്പയുടെ പ്രൊമോഷന്‍ പരിപാടികളും അല്ലു അര്‍ജുന്‍ തുടങ്ങിക്കഴിഞ്ഞു. അടുത്തിടെ നടന്‍ നന്ദമൂരി ബാലകൃഷ്ണയുടെ അണ്‍സ്റ്റോപ്പബിള്‍ വിത്ത് എന്‍ബികെ സീസണ്‍ 4 എന്ന ടോക്ക് ഷോയിലും അല്ലു അര്‍ജുന്‍ എത്തിയിരുന്നു. ഷോയുടെ പ്രൊമോ വിഡിയോയാണിപ്പോള്‍ അല്ലു ആരാധകര്‍ക്കിടയിലും സോഷ്യല്‍ മീഡിയയിലും വൈറലാകുന്നത്.
ഏഴ് വര്‍ഷം മുന്‍പ് വൈറലായി മാറിയ തന്റെയൊരു വിഡിയോയെക്കുറിച്ചും അല്ലു അര്‍ജുന്‍ ഷോയില്‍ സംസാരിക്കുന്നുണ്ട്. ഗോവയിലെ ഒരു വൈന്‍ ഷോപ്പില്‍ നിന്നും മദ്യം വാങ്ങുന്ന അല്ലു അര്‍ജുന്റെ വിഡിയോ 2017 ല്‍ പുറത്തുവന്നിരുന്നു. ഇതിന് പിന്നാലെ താരത്തെ അനുകൂലിച്ചും വിമര്‍ശിച്ചുമൊക്കെ നിരവധി പേര് രംഗത്തെത്തുകയും ചെയ്തു. ഈ വിഡിയോയെക്കുറിച്ചാണ് അല്ലുവിനോട് ബാല്ലയ്യ ചോദിച്ചത്. ആ വിഡിയോയില്‍ ഉള്ളത് താന്‍ തന്നെയാണെന്നും മദ്യം വാങ്ങുകയായിരുന്നുവെന്നും അല്ലു അര്‍ജുന്‍ സമ്മതിച്ചിരിക്കുകയാണിപ്പോള്‍.
മദ്യം വാങ്ങിയത് തന്റെയൊരു സുഹൃത്തിന് വേണ്ടിയായിരുന്നുവെന്നും അല്ലു വ്യക്തമാക്കി. താന്‍ പറഞ്ഞ സുഹൃത്ത് ചാറ്റ് ഷോയില്‍ വരുമെന്നും അല്ലു അര്‍ജുന്‍ കൂട്ടിച്ചേര്‍ത്തു. എന്നാല്‍ അല്ലുവിന്റെ ആ സുഹൃത്ത് ആരാണെന്നറിയാനുള്ള ആകാംക്ഷയിലാണിപ്പോള്‍ ആരാധകര്‍. സൂപ്പര്‍ താരങ്ങളാരെങ്കിലും ആയിരിക്കുമോ ആ സുഹൃത്ത് എന്നാണ് സോഷ്യല്‍ മീഡിയ ചോദിക്കുന്നത്.
അല്ലു അര്‍ജുനൊപ്പം അമ്മ നിര്‍മലയും ടോക്ക് ഷോയിലെത്തുന്നുണ്ട്. ഇന്ന് വൈകുന്നേരമാണ് വിഡിയോ പുറത്തുവരിക. സുകുമാര്‍ സംവിധാനം ചെയ്യുന്ന പുഷ്പ 2 വില്‍ അല്ലു അര്‍ജുനൊപ്പം ഫഹദ് ഫാസിലും പ്രധാന വേഷത്തിലെത്തുന്നുണ്ട്. രശ്മിക മന്ദാനയാണ് നായിക.