കേരളത്തിലെത്തിയാൽ ഏറ്റവും ഇഷ്ടമുള്ളത് എന്ത്?; ഇവിടെ വരുന്നത് ആദ്യമായല്ലെന്നും മറുപടി; വേദിയിൽ മനസ്സ് തുറന്ന് സണ്ണി ലിയോൺ

വയനാട്: ബോളിവുഡ് താരം സണ്ണി ലിയോൺ ഏറെ നാളത്തെ ഇടവേളക്ക് ശേഷം മലയാള സിനിമയിലേക്ക് തിരിച്ചെത്തുന്നു. ദേശീയ അവാർഡ് ജേതാവ് പാമ്പള്ളി സംവിധാനം ചെയ്യുന്ന 'വിസ്റ്റാ വില്ലേജ്' എന്ന ചിത്രത്തിലൂടെയാണ് അവരുടെ തിരിച്ചുവരവ്. കഴിഞ്ഞ ദിവസം വൈത്തിരിയിൽ വെച്ച് ചിത്രത്തിന്റെ ടൈറ്റിൽ പ്രഖ്യാപന ചടങ്ങ് നടന്നു.

ചടങ്ങിൽ സണ്ണി ലിയോൺ, നടൻ അശോകൻ, ബാലതാരം വൃദ്ധി വിശാൽ എന്നിവർ ഉൾപ്പെടെ നിരവധി പേർ പങ്കെടുത്തു. സണ്ണി ലിയോണിനൊപ്പം എടുത്ത ചിത്രം വൃദ്ധി വിശാൽ സോഷ്യൽ മീഡിയയിൽ പങ്കുവെച്ചത് വൈറലായിരുന്നു. ചടങ്ങിൽ സണ്ണി ലിയോൺ സാരിയാണ് അണിഞ്ഞെത്തിയത്.

നേരത്തെയും സണ്ണി ലിയോൺ കേരളത്തിൽ എത്തിയിട്ടുണ്ട്. ഉദ്ഘാടന ചടങ്ങുകൾ അടക്കമുള്ളവയിൽ പങ്കെടുക്കാൻ അവർ മുമ്പ് വന്നിട്ടുണ്ട്. അത്തരം സന്ദർഭങ്ങളിൽ അവരെ കാണാനായി വലിയ ജനക്കൂട്ടം എത്താറുണ്ടായിരുന്നു.

ഇന്നലെ നടന്ന ചടങ്ങിൽ, കേരളത്തിൽ ഏറ്റവും ഇഷ്ടപ്പെട്ട കാര്യമെന്തെന്ന അവതാരകയുടെ ചോദ്യത്തിന് താരം മറുപടി നൽകി. കേരളത്തിലെ ജനങ്ങളെയാണ് ഏറ്റവും ഇഷ്ടപ്പെടുന്നതെന്ന് സണ്ണി ലിയോൺ വ്യക്തമാക്കി. കൂടാതെ മലയാളത്തിൽ ഓണാശംസകളും താരം നേർന്നു. പ്രശസ്തരായ താരങ്ങൾ പങ്കെടുത്ത ചടങ്ങ് ശ്രദ്ധേയമായി.