അങ്ങ് കിഴക്ക് അറേബ്യൻ മരുഭൂമി കണ്ടപ്പോൾ തോന്നിയ ദീർഘവീക്ഷണം; രാവും പകലുമില്ലാതെ നല്ല നാളെക്കായി പ്രവർത്തിച്ച വ്യക്തിത്വം; ഇന്ന് കാണുന്ന ദുബായ് ക്ലോക്ക് ടവർ, വിമാനത്താവളം എല്ലാം കയ്യൊപ്പ്; യുഎഇ യിലെ പ്രമുഖ വ്യവസായി ഹുസൈൻ അബ്ദുറഹ്‌മാൻ ഖാൻസാഹബ് വിടവാങ്ങുമ്പോൾ
ദുബായ്: യുഎഇയുടെ അടിസ്ഥാന സൗകര്യ വികസനത്തിൽ നിർണായക പങ്കുവഹിച്ച പ്രമുഖ വ്യവസായിയും ഖാൻസാഹബ് കമ്പനിയുടെ മുൻ ചെയർമാനുമായ ഹുസൈൻ അബ്ദുറഹ്‌മാൻ ഖാൻസാഹബ് അന്തരിച്ചു. യുഎഇയുടെ വളർച്ചയുടെ നാൾവഴികളിൽ മായാത്ത മുദ്ര പതിപ്പിച്ച അദ്ദേഹത്തിന്റെ വിയോഗത്തിൽ ദുബൈ ഭരണാധികാരി ശൈഖ് മുഹമ്മദ് ഉൾപ്പെടെയുള്ളവർ അനുശോചനം രേഖപ്പെടുത്തി. യുഎഇയുടെ അടിസ്ഥാന സൗകര്യങ്ങളുടെ വഴികാട്ടി എന്നാണ് ശൈഖ് മുഹമ്മദ് അദ്ദേഹത്തെ വിശേഷിപ്പിച്ചത്.
ഹുസൈൻ അബ്ദുറഹ്‌മാൻ ഖാൻസാഹബും അദ്ദേഹത്തിന്റെ നേതൃത്വത്തിലുണ്ടായിരുന്ന ഖാൻസാഹബ് എന്ന സ്ഥാപനവും യുഎഇയുടെ വികസന ചരിത്രത്തിൽ വലിയ സംഭാവനകൾ നൽകിയിട്ടുണ്ട്. 1935-ൽ അദ്ദേഹത്തിന്റെ അമ്മാവൻ ഖാൻസാഹബ് ഹുസൈനാണ് ബ്രിട്ടീഷ് സർക്കാരുമായി സഹകരിച്ച് ഖാൻസാഹബ് എന്ന കോൺട്രാക്ടിങ് സ്ഥാപനം ആരംഭിച്ചത്. പിന്നീട് ഈ സ്ഥാപനത്തിന്റെ വളർച്ചയിൽ ഹുസൈൻ അബ്ദുറഹ്‌മാൻ ഖാൻസാഹബ് ഒരു പ്രധാന പങ്കുവഹിച്ചു.
ഖാൻസാഹബ് കമ്പനിയുടെ ചരിത്രപരമായ സംഭാവനകളിൽ പ്രധാനം യുഎഇയിലെ ആദ്യത്തെ റോഡിന്റെ നിർമ്മാണമാണ്. ഷാർജയിൽ നിന്ന് റാസൽഖൈമയിലേക്കുള്ള ഈ റോഡ്, രാജ്യത്തിന്റെ ഗതാഗത സംവിധാനത്തിന് ഒരു വലിയ മുന്നേറ്റമായിരുന്നു. തുടർന്ന്, ദുബൈ ക്ലോക്ക് ടവർ റൗണ്ട് എബൗട്ട്, ഷാർജ സെന്റ്. മേരീസ് ചർച്ച്, ഷാർജ വിമാനത്താവളം തുടങ്ങിയ പ്രധാന നിർമ്മിതികളിലും ഖാൻസാഹബ് പങ്കാളികളായി. യുഎഇയുടെ തന്നെ അഭിമാന സ്തംഭങ്ങളിൽ ഒന്നായ ദുബൈയിലെ മാൾ ഓഫ് ദി എമിറേറ്റ്സ് വരെയുള്ള നിർമ്മാണ പ്രവർത്തനങ്ങളിലും ഇവർ തങ്ങളുടെ സാന്നിധ്യമറിയിച്ചു.
ഹുസൈൻ അബ്ദുറഹ്‌മാൻ ഖാൻസാഹബ് 1954 മുതൽ 2016 വരെ ദീർഘകാലം ഖാൻസാഹബ് കമ്പനിയുടെ ചെയർമാനായി സേവനമനുഷ്ഠിച്ചു. അദ്ദേഹത്തിന്റെ ദീർഘവീക്ഷണവും നേതൃത്വപാടവവുമാണ് സ്ഥാപനത്തെ ഈ നിലയിലേക്ക് ഉയർത്തിയത്. യുഎഇയുടെ ആധുനികവൽക്കരണത്തിന്റെയും അടിസ്ഥാന സൗകര്യ വികസനത്തിന്റെയും ആദ്യകാലങ്ങളിൽ അദ്ദേഹം നൽകിയ സംഭാവനകൾ വിലമതിക്കാനാവാത്തതാണ്. അദ്ദേഹത്തിന്റെ വേർപാട് രാജ്യത്തിന് ഒരു വലിയ നഷ്ടമായി കണക്കാക്കപ്പെടുന്നു.