ആരോഗ്യപ്പച്ചയുടെ അത്ഭുതവീര്യം ലോകത്തിന് കാട്ടിക്കൊടുത്ത 'പുഷ്പാംഗദന് മോഡലിന്റെ' ഉപജ്ഞാതാവ്; ആദിവാസി അറിവിനെ 'ജീവനി'യാക്കിയപ്പോള് ലാഭത്തിന്റെ പകുതി അവകാശികള്ക്ക് തന്നെ നല്കിയ അപൂര്വ ശാസ്ത്രജ്ഞന്; പ്രാക്കുളത്ത് നിന്ന് ഉദിച്ചുയര്ന്ന സസ്യശാസ്ത്ര മേഖലയിലെ ബഹുമുഖ പ്രതിഭ; ഡോ പല്പ്പു പുഷ്പാംഗദന് വിടവാങ്ങുമ്പോള്
തിരുവനന്തപുരം: പത്മശ്രീ പുരസ്കാര ജേതാവും ലോകപ്രശസ്ത സസ്യശാസ്ത്രജ്ഞനുമായ ഡോ. പല്പ്പു പുഷ്പാംഗദന് (81) വാര്ദ്ധക്യസഹജമായ അസുഖങ്ങളെത്തുടര്ന്ന് അന്തരിച്ചു. ശാസ്ത്രലോകത്ത് കേവലം കണ്ടുപിടുത്തങ്ങള്ക്ക അപ്പുറം ശ്രദ്ധേയനായിരുന്നു അദ്ദേഹം. കണ്ടെത്തുന്ന അറിവുകളുടെ പുതു തലമറുയ്ക്ക് പകര്ന്ന് നല്കിയ അറിവിന്റെ വിപ്ലവകാരിയായിരുന്നു അദ്ദേഹം. ലാളിത്യമാര്ന്ന പെരുമാറ്റവും ഗവേഷണത്തോടുള്ള തളരാത്ത ആവേശവും അദ്ദേഹത്തെ പ്രിയങ്കരനാക്കി. പത്മശ്രീ നല്കി രാജ്യം ആദരിച്ച ഈ പ്രതിഭയുടെ വിയോഗം ശാസ്ത്രലോകത്തിന് നികത്താനാവാത്ത നഷ്ടമാണ്.
ആരോഗ്യപ്പച്ചയും 'ജീവനി'യും: പശ്ചിമഘട്ടത്തിലെ കഠിനപാതകളിലൂടെ കാണി ഗോത്രവര്ഗ്ഗക്കാര്ക്കൊപ്പം സഞ്ചരിച്ച അദ്ദേഹം അവരുടെ ഊര്ജ്ജരഹസ്യമായ 'ആരോഗ്യപ്പച്ച' എന്ന സസ്യത്തിന്റെ ഔഷധഗുണം ശാസ്ത്രീയമായി തെളിയിച്ചു. ഇതില് നിന്ന് അദ്ദേഹം വികസിപ്പിച്ചെടുത്ത 'ജീവനി' എന്ന ഉല്പ്പന്നം ലോകമെങ്ങും പ്രശസ്തമായി. ഈ മരുന്നിന്റെ ലൈസന്സ് വിറ്റപ്പോള് ലഭിച്ച തുകയുടെ പകുതി കാണി വിഭാഗത്തിന്റെ ക്ഷേമത്തിനായി മാറ്റിവെച്ച അദ്ദേഹം 'ഇക്വിറ്റബിള് ബെനിഫിറ്റ് ഷെയറിങ്' എന്ന മാതൃക ലോകത്തിന് മുന്നില് അവതരിപ്പിച്ചു. ഈ വിപ്ലവകരമായ ചുവടുവെപ്പ് അന്താരാഷ്ട്ര തലത്തില് 'പുഷ്പാംഗദന് മോഡല്' എന്നാണ് അറിയപ്പെടുന്നത്.
കൊല്ലം ജില്ലയിലെ പ്രാക്കുളത്ത് നിന്ന് തുടങ്ങിയ അദ്ദേഹത്തിന്റെ ശാസ്ത്രയാത്ര അലിഗഡ് മുസ്ലിം യൂണിവേഴ്സിറ്റിയിലെ ഗവേഷണത്തിലൂടെയും സി.എസ്.ഐ.ആര് ലബോറട്ടറിയിലൂടെയും വളര്ന്ന് ലോകത്തിന്റെ നെറുകയിലെത്തി. ലക്നൗവിലെ നാഷണല് ബൊട്ടാണിക്കല് റിസേര്ച്ച് ഇന്സ്റ്റിറ്റ്യൂട്ട് ഡയറക്ടര്, തിരുവനന്തപുരത്തെ ട്രോപ്പിക്കല് ബൊട്ടാണിക്കല് ഗാര്ഡന് ആന്ഡ് റിസര്ച്ച് ഇന്സ്റ്റിറ്റ്യൂട്ട് ഡയറക്ടര് തുടങ്ങി പ്രമുഖ സ്ഥാനങ്ങള് അദ്ദേഹം വഹിച്ചു. എത്നോബോട്ടണി, എത്നോ ഫാര്മക്കോളജി എന്നീ മേഖലകളില് അദ്ദേഹം വികസിപ്പിച്ചെടുത്ത 15 ഉല്പ്പന്നങ്ങള്ക്ക് ഇന്ന് പേറ്റന്റുണ്ട്.
താന് നട്ടുപിടിപ്പിച്ച മരത്തിന്റെ തണലും ഫലങ്ങളും അതിന്റെ വേരുകളെ പരിപാലിച്ചവര്ക്കുകൂടി അവകാശപ്പെട്ടതാണെന്ന് അദ്ദേഹം വിശ്വസിച്ചു. ആദിവാസി സമൂഹത്തിന്റെ പാരമ്പര്യ അറിവുകളെ ചൂഷണം ചെയ്യുന്നതിന് പകരം അവരെ ശാസ്ത്രത്തിന്റെ ഗുണഭോക്താക്കളാക്കി മാറ്റിയ അദ്ദേഹത്തിന്റെ നടപടിക്ക് ഐക്യരാഷ്ട്രസഭയുടെ ഇക്വേറ്റര് ഇനിഷ്യേറ്റീവ് അവാര്ഡ് ഉള്പ്പെടെ നിരവധി അംഗീകാരങ്ങള് ലഭിച്ചിട്ടുണ്ട്.
317 ഗവേഷണ പ്രബന്ധങ്ങള് പ്രസിദ്ധീകരിച്ചിട്ടുള്ള അദ്ദേഹം സസ്യശാസ്ത്രത്തിലെ സകല ശാഖകളിലും പ്രാവീണ്യം തെളിയിച്ച വ്യക്തിയായിരുന്നു.
ഡോ. പി. പുഷ്പാംഗദന്: ശാസ്ത്രലോകത്തെ 5 വിപ്ലവകരമായ സംഭാവനകള്
1. പുഷ്പാംഗദന് മോഡല് (Equitable Benefit Sharing) ആദിവാസി ഗോത്രവര്ഗക്കാരുടെ പരമ്പരാഗത അറിവുകള് ഉപയോഗിച്ച് ഉല്പ്പന്നങ്ങള് നിര്മ്മിക്കുമ്പോള്, അതിന്റെ ലാഭവിഹിതം ആ ഗോത്രത്തിന് കൂടി ലഭ്യമാക്കുന്ന ലോകത്തിലെ ആദ്യത്തെ മാതൃകയാണിത്. ജൈവവൈവിധ്യ നിയമങ്ങളില് (Biodiversity Law) ആഗോളതലത്തില് ഈ രീതി ഇന്ന് വലിയ അംഗീകാരമുള്ള നയമാണ്.
2. ആരോഗ്യപ്പച്ചയും 'ജീവനി' ഔഷധവും കാണി ഗോത്രക്കാര് ക്ഷീണമകറ്റാന് ഉപയോഗിച്ചിരുന്ന ആരോഗ്യപ്പച്ച (Trichopus zeylanicus) എന്ന സസ്യത്തിന്റെ ഔഷധഗുണം ശാസ്ത്രീയമായി തെളിയിച്ചു. ഇതില് നിന്ന് 'ജീവനി' എന്ന പേരില് പ്രതിരോധശേഷി വര്ദ്ധിപ്പിക്കുന്ന മരുന്ന് വികസിപ്പിച്ചെടുത്തു. ആദിവാസി വിജ്ഞാനത്തെ ആധുനിക വൈദ്യശാസ്ത്രവുമായി ബന്ധിപ്പിച്ച സുപ്രധാന ചുവടുവെപ്പായിരുന്നു ഇത്.
3. എത്നോ ഫാര്മക്കോളജിയിലെ ഗവേഷണങ്ങള് പ്രാദേശികവും പാരമ്പര്യവുമായ അറിവുകളെ ഔഷധ നിര്മ്മാണത്തിനായി ഉപയോഗിക്കുന്ന ശാസ്ത്രശാഖയില് (Ethnopharmacology) വലിയ മുന്നേറ്റങ്ങള് അദ്ദേഹം നടത്തി. സസ്യങ്ങളില് നിന്ന് പുതിയ മരുന്നുകള് കണ്ടെത്തുക മാത്രമല്ല, അവയുടെ പേറ്റന്റ് നേടിയെടുത്ത് ശാസ്ത്രീയ അടിത്തറ ഉറപ്പിക്കുകയും ചെയ്തു.
4. ബയോപ്രോസ്പെക്റ്റിംഗും കണ്സര്വേഷന് ബയോളജിയും പ്രകൃതിയിലെ സസ്യസമ്പത്തില് നിന്ന് മനുഷ്യന് ഉപകാരപ്രദമായ ജൈവമൂല്യങ്ങള് കണ്ടെത്തുകയും (Bioprospecting) അതോടൊപ്പം അവയുടെ സംരക്ഷണത്തിനായി (Conservation) പദ്ധതികള് ആവിഷ്കരിക്കുകയും ചെയ്തു. ടി.ബി.ജി.ആര്.ഐ (TBGRI) ഡയറക്ടര് എന്ന നിലയില് സസ്യസംരക്ഷണത്തിനായി നിരവധി ബാങ്കുകള് സ്ഥാപിച്ചു.
5. പേറ്റന്റ് നേടിയ 15-ലധികം ഉല്പ്പന്നങ്ങള് ശാസ്ത്രീയമായ അറിവുകള് കേവലം പ്രബന്ധങ്ങളില് ഒതുക്കാതെ അവയെ ജനങ്ങളിലേക്ക് എത്തിക്കുന്നതിനായി അദ്ദേഹം പരിശ്രമിച്ചു. ഔഷധക്കൂട്ടുകളും കോസ്മെറ്റിക് ഉല്പ്പന്നങ്ങളും ഉള്പ്പെടെ അദ്ദേഹം വികസിപ്പിച്ചെടുത്ത 15-ഓളം ഉല്പ്പന്നങ്ങള് ഇന്ന് വാണിജ്യടിസ്ഥാനത്തില് വിപണിയില് ലഭ്യമാണ്.