മദ്യലഹരിയില്‍ അമിതവേഗത്തില്‍ കാറോടിച്ച സംഭവം; നടന്‍ ഗണപതിക്ക് എതിരെ കേസെടുത്ത് കളമശേരി പൊലീസ്

കൊച്ചി: മദ്യപിച്ച് അമിത വേഗത്തില്‍ കാറോടിച്ച നടന്‍ ഗണപതിക്ക് എതിരെ കേസെടുത്ത് കളമശ്ശേരി പൊലീസ്. ഇന്നലെ രാത്രിയാണ് കേസിനാസ്പദമായ സംഭവം നടന്നത്. ആലുവയില്‍ നിന്ന് അമിത വേഗത്തിലെത്തിയ കാര്‍ കളമശ്ശേരിയില്‍ വച്ച് പൊലീസ് തടയുകയായിരുന്നു. പിന്നാലെ നടന്‍ ഗണപതിയുടെ അറസ്റ്റ് രേഖപ്പെടുത്തുകയും ജാമ്യത്തില്‍ വിടുകയുമായിരുന്നു.

കണ്ണൂര്‍ പയ്യന്നൂര്‍ സ്വദേശി ഗണപതിയെയാണ് (29) കളമശ്ശേരി പൊലീസ് അറസ്റ്റ് ചെയ്തത്. ശനിയാഴ്ച രാത്രി എട്ടിന് കളമശ്ശേരി ഗണപതി ക്ഷേത്രത്തിന് സമീപത്താണ് പിടിയിലായത്. ആലുവ ഭാഗത്തുനിന്ന് അമിതവേഗത്തില്‍ അപകടകരമാംവിധം കാര്‍ ഓടിച്ചുവരുന്നതായ വിവരം ലഭിച്ചതനുസരിച്ച് കാര്‍ തടയുകയായിരുന്നു.

തുടര്‍ന്നുള്ള പരിശോധനയിലാണ് വാഹനം ഓടിച്ചിരുന്ന ഗണപതി മദ്യപിച്ചിരുന്നതായി മനസ്സിലാക്കിയത്?. വാഹനമടക്കം കസ്റ്റഡിയിലെടുത്തു. കണ്ണൂര്‍, തിരുവനന്തപുരം സ്വദേശികളായ മൂന്നുപേര്‍ക്കൊപ്പമാണ് ഇയാള്‍ സഞ്ചരിച്ചതെന്ന് പൊലീസ് പറഞ്ഞു.