മുക്കുപണ്ട പണയ കേസില്‍ റിമാന്‍ഡിലായ കേരള ഗ്രാമീണ്‍ ബാങ്ക് അസി.മാനേജര്‍ ഡിജിറ്റല്‍ ബാങ്കിങ്ങില്‍ നടത്തിയത് വന്‍ ക്രമക്കേട്; സോഫ്റ്റ് വെയറില്‍ വ്യാജമായി ഫയലുകളുണ്ടാക്കി തട്ടിയത് ഒന്നര കോടിയോളം; തട്ടിപ്പു പണം ഭാര്യയുടെയും അമ്മയുടെയും അക്കൗണ്ടിലേക്ക് മാറ്റി; സുജേഷിനെ വീണ്ടും അറസ്റ്റു ചെയ്യും
മുക്കുപണ്ട പണയ കേസില്‍ റിമാന്‍ഡിലായ കേരള ഗ്രാമീണ്‍ ബാങ്ക് അസി.മാനേജര്‍ ഡിജിറ്റല്‍ ബാങ്കിങ്ങില്‍ നടത്തിയത് വന്‍ ക്രമക്കേട്;
കണ്ണൂര്‍: കേരള ഗ്രാമീണ്‍ ബാങ്കില്‍ പണയം വെച്ച സ്വര്‍ണം കവര്‍ന്ന് പകരം മുക്കുപണ്ടം പണയം വെച്ച് വന്‍ തട്ടിപ്പ് നടത്തിയ ബാങ്ക് ഉദ്യോഗസ്ഥന്‍ സുജേഷ് കോടികള്‍ തട്ടിയെടുത്തായി പരാതി. നേരത്തെ ജോലി ചെയ്ത പള്ളിക്കുന്നിലെ കേരളാ ഗ്രാമീണ്‍ ബാങ്കിലെ ഡിജിറ്റല്‍ ബാങ്കിങ് സര്‍വീസ് ഓഫീസില്‍ അസി.മാനേജരായി ജോലി ചെയ്യവേയാണ് 1, 46,31733രൂപ ഇയാള്‍ വിവിധ ഘട്ടങ്ങളിലായി തട്ടിയെടുത്തത്.
ബാങ്കില്‍ ജോലി ചെയ്തിരുന്ന 2020 ജൂലായ് ഒന്നുമുതല്‍ 2024 ജൂണ്‍ 23 വരെയുള്ള കാലയളവിലാണ് കോടികളുടെ തട്ടിപ്പ് നടത്തിയത്. ബാങ്കിന്റെ കോര്‍ ബാങ്കിങ്ങ് സൊല്യുഷന്‍ സോഫ്റ്റ് വെയറില്‍ വ്യാജമായി ഫയലുകളുണ്ടാക്കിയാണ് തട്ടിപ്പ് നടത്തിയത്. വിവിധ കേന്ദ്ര-സംസ്ഥാന സര്‍ക്കാര്‍ പദ്ധതികളില്‍ അര്‍ഹരായവര്‍ക്ക് നാഷനല്‍ പെയ്‌മെന്റ് കോര്‍പറേഷന്‍ ഓഫ് ഇന്ത്യ നല്‍കുന്ന തുകയില്‍ ഏജന്‍സിയായ ബാങ്കിന് ലഭിക്കേണ്ട വിഹിതമാണ് ബാങ്കിനെ കബളിപ്പിച്ച് പണം സുജേഷ് സ്വന്തം അക്കൗണ്ടിലേക്കും ഭാര്യയുടെയും അമ്മയുടെയും അക്കൗണ്ടിലേക്കും മാറ്റിയത്.
ബാങ്കിന്റെ സീനിയര്‍ മാനേജര്‍ എന്‍ നന്ദകുമാര്‍ കണ്ണൂര്‍ ടൗണ്‍ പൊലിസ് സ്റ്റേഷനില്‍ നല്‍കിയ പരാതിയെ തുടര്‍ന്നാണ് പൊലിസ് കേസെടുത്തത്. ബാങ്കില്‍ സഹജീവനക്കാരോട് കൂടുതല്‍ അടുത്ത് ഇട പെടാത്ത പ്രകൃതക്കാരനായ സുജേഷ് ജോലിയില്‍ അതിസമര്‍ത്ഥനായിരുന്നു. ഇതിലൂടെ ഉയര്‍ന്ന ഉദ്യോഗസ്ഥരുടെ വിശ്വാസം ആര്‍ജ്ജിച്ച ഇയാള്‍ അവിടെ തന്നെ നാലു വര്‍ഷത്തോളം തുടര്‍ച്ചയായി ജോലി ചെയ്യാനുള്ള സാഹചര്യമുണ്ടാക്കിയെടുത്തു.
കഴിഞ്ഞ മാസം ജീവനക്കാരന്‍ പൊലിസ് പിടിയിലായതിന് ശേഷം പൊലിസ് നേരത്തെ ജോലി ചെയ്ത സ്ഥലങ്ങളില്‍ അന്വേഷണം വ്യാപിപ്പിക്കുകയായിരുന്നു. ഇതോടെയാണ് കോടികളുടെ വെട്ടിപ്പ് പുറത്തുവന്നത്. അടുത്ത ദിവസം തന്നെ തട്ടിപ്പ് കേസില്‍ റിമാന്‍ഡില്‍ കഴിയുന്ന സുജേഷിന്റെ അറസ്റ്റ് വീണ്ടും രേഖപ്പെടുത്തുമെന്ന് അന്വേഷണ ഉദ്യോഗസ്ഥനായ ശ്രീജിത്ത് കൊടേരി അറിയിച്ചു.
കേരള ഗ്രാമീണ്‍ ബാങ്ക് താഴെ ചൊവ്വ ബ്രാഞ്ചിലെ അസി.മാനേജരായ കണ്ണാടിപറമ്പിലെ വി. സുജേഷ്34 ലക്ഷം രൂപ വിലവരുന്ന സ്വര്‍ണാഭരണങ്ങളാണ് ബാങ്ക് ലോക്കറില്‍ നിന്നും കൈവശപ്പെടുത്തി പകരം തിരൂര്‍ പൊന്ന് ലോക്കറില്‍ വയ്ക്കുകയായിരുന്നു. ബാങ്കില്‍ നിന്നെടുത്ത സ്വര്‍ണം വിവിധ സ്വകാര്യ ബാങ്കുകളില്‍ പണയം വെച്ചാണ് പണം സമ്പാദിച്ചത്.
കൂടുതല്‍ പണം ഉണ്ടാക്കാനായി ഈ പണം ഷെയര്‍ ട്രേഡിങ്ങിലും മറ്റും നിക്ഷേപിച്ചുവെങ്കിലും ഇതില്‍ സാമ്പത്തിക നഷ്ടം സംഭവിച്ചുവെന്നാണ് പ്രതി പറയുന്നത്. 2024 ജൂണ്‍ മാസത്തിലാണ് താഴെ ചൊവ്വ ബ്രാഞ്ചില്‍ അസി.മാനേജരായി സുജേഷ് ചുമതലയേറ്റത്. വന്‍ സാമ്പത്തിക ക്രമക്കേടുകള്‍ പുറത്തുവന്നതിനെ തുടര്‍ന്ന് സുജേഷിനെ ജോലിയില്‍ നിന്നും പുറത്താക്കിയിരുന്നു.