വാട്ട്സാപ്പ്, ടെലിഗ്രാം എന്നിവ ഉള്‍പ്പെടെ ഉപയോഗിക്കാന്‍ ആക്ടീവ് സിം കാര്‍ഡുമായി ബന്ധിപ്പിക്കണം; സൈബര്‍ സുരക്ഷാ ഭേദഗതി നിയമങ്ങളുടെ ഭാഗമായി ഉത്തരവ്
വാട്ട്സാപ്പ്, ടെലിഗ്രാം എന്നിവ ഉള്‍പ്പെടെ ഉപയോഗിക്കാന്‍ ആക്ടീവ് സിം കാര്‍ഡുമായി ബന്ധിപ്പിക്കണം
ന്യൂഡല്‍ഹി: വാട്ട്സാപ്പ്, ടെലിഗ്രാം, സിഗ്‌നല്‍, സ്നാപ്ചാറ്റ്, ഷെയര്‍ചാറ്റ്, ജിയോചാറ്റ്, അരട്ടായി, ജോഷ് തുടങ്ങിയ ജനപ്രിയ മെസേജിംഗ് ആപ്പുകള്‍ ഉപയോഗിക്കുന്നതിന് സുപ്രധാന നിര്‍ദേശവുമായി ടെലികമ്മ്യൂണിക്കേഷന്‍ വകുപ്പ് (ഡിഒടി). ആക്ടീവ് സിം കാര്‍ഡ് ഇല്ലാതെ ഉപയോക്താക്കള്‍ക്ക് ഇത്തരം പ്ലാറ്റ്‌ഫോമുകളുടെ സേവനം അസാധ്യമാക്കാനാണ് നീക്കം നടക്കുന്നത്. ഇന്ത്യയുടെ പുതിയ ടെലികമ്മ്യൂണിക്കേഷന്‍ സൈബര്‍ സുരക്ഷാ ഭേദഗതി നിയമങ്ങങ്ങളുടെ ഭാഗമാണ് ഇത്തരമൊരു ഉത്തരവ്.
പുതിയ മാര്‍ഗനിര്‍ദേശപ്രകാരം ആപ്ലിക്കേഷനുമായി ബന്ധിപ്പിച്ചിരിക്കുന്ന മൊബൈല്‍ നമ്പറുള്ള സിംകാര്‍ഡ് ഫോണില്‍ ആക്ടീവല്ലെങ്കില്‍ ആപ്പുകള്‍ പ്രവര്‍ത്തിപ്പിക്കാനാകില്ല. ഇത്തരം പ്ലാറ്റ്‌ഫോമുകള്‍ ഈ നിര്‍ദേശം 90 ദിവസത്തിനുള്ളില്‍ നടപ്പിലാക്കണം. വെബ് ബ്രൗസര്‍ വഴി ലോഗിന്‍ ചെയ്യുന്ന ഉപയോക്താക്കളെ ഓരോ ആറ് മണിക്കൂറിലും പ്ലാറ്റ്ഫോമുകളില്‍ നിന്ന് ലോഗ് ഔട്ട് ചെയ്യേണ്ടതുണ്ടെന്നും ഡിഒടി നിര്‍ദേശിക്കുന്നു. കൂടാതെ ഒരു ഝഞ കോഡ് വഴി വീണ്ടും ഓതന്റിക്കേഷന്‍ നടത്തേണ്ടതുണ്ട്.
വിവിധ ആപ്ലിക്കേഷനുകള്‍ ഉപയോഗിക്കുമ്പോള്‍ സജീവവും പരിശോധിച്ചുറപ്പിച്ചതുമായ ഒരു സിമ്മുമായി ബന്ധിപ്പിക്കേണ്ടതുണ്ട്. അതിനാല്‍ വിദൂരത്തിലിരുന്ന് കുറ്റവാളികള്‍ ആപ്പുകള്‍ ചൂഷണം ചെയ്യുന്നത് തടയുമെന്ന് ടെലികമ്യൂണിക്കേഷന്‍ വകുപ്പ് പറയുന്നു. നിലവില്‍ മിക്ക ആപ്ലിക്കേഷന്‍ സേവനങ്ങളും ഒരു ഉപയോക്താവിന്റെ മൊബൈല്‍ നമ്പര്‍ ഇന്‍സ്റ്റാളേഷന്‍ സമയത്ത് മാത്രമാണ് പരിശോധിച്ച് ഉറപ്പ് വരുത്തുന്നത്. അതുവഴി ഇവ ദുരുപയോഗം ചെയ്യാനുള്ള സാധ്യത വര്‍ധിപ്പിക്കും. അതിനുശേഷം സിം നീക്കം ചെയ്യുകയോ നിര്‍ജ്ജീവമാക്കുകയോ ചെയ്താലും ആപ്പ് പ്രവര്‍ത്തിക്കും. ഈ പഴുതടയ്ക്കുകയാണ് ലക്ഷ്യമെന്ന് ഡിഒടി പറഞ്ഞു.