യാത്രിയോം...കൃപയാ ധ്യാൻ ദിജിയെ..; 'ദീപാവലി' സ്പെഷ്യൽ ട്രെയിനുകൾ പ്രഖ്യാപിച്ച് റെയിൽവേ; ബെം​ഗളുരുവിൽ നിന്ന് കൊല്ലത്തേക്കും തിരിച്ചും രണ്ട് ട്രെയിനുകൾ; വിവരങ്ങൾ അറിയാം..

ബംഗളൂരു: ദീപാവലി ആഘോഷങ്ങളുടെ ഭാഗമായി റെയിൽവേ യാത്രക്കാർക്ക് സൗകര്യമൊരുക്കുന്നതിനായി ബംഗളൂരുവിൽ നിന്ന് കൊല്ലത്തേക്കും തിരിച്ചും പ്രത്യേക ട്രെയിൻ സർവീസുകൾ പ്രഖ്യാപിച്ചു. ഈ റൂട്ടിലെ യാത്രക്കാരുടെ വലിയ തിരക്ക് കണക്കിലെടുത്താണ് റെയിൽവേയുടെ ഈ നടപടി.

പ്രഖ്യാപിച്ച പ്രത്യേക ട്രെയിനുകളിൽ രണ്ട് എക്സ്പ്രസ് സർവീസുകളാണ് ഉൾപ്പെടുന്നത്. എസ്എംവിടി ബംഗളൂരു-കൊല്ലം എക്സ്പ്രസ് (06561) ഒക്ടോബർ 16ന് ഉച്ചയ്ക്ക് 3 മണിക്ക് ബംഗളൂരുവിൽ നിന്ന് പുറപ്പെടും. ഈ ട്രെയിൻ പാലക്കാട്, കോട്ടയം വഴിയാണ് കൊല്ലത്തേക്ക് സർവീസ് നടത്തുന്നത്. തിരിച്ചുള്ള യാത്രക്കാരുടെ സൗകര്യത്തിനായി കൊല്ലം-എസ്എംവിടി ബംഗളൂരു സ്പെഷ്യൽ എക്സ്പ്രസ് (06562) ഒക്ടോബർ 17ന് രാവിലെ 10.45ന് കൊല്ലത്ത് നിന്ന് ബംഗളൂരുവിലേക്ക് പുറപ്പെടും.

കൂടാതെ, ദീപാവലി ആഘോഷങ്ങൾക്ക് ശേഷം നാട്ടിലേക്ക് മടങ്ങുന്നവരെയും പരിഗണിച്ച് മറ്റൊരു സർവീസ് കൂടി പ്രഖ്യാപിച്ചിട്ടുണ്ട്. എസ്എംവിടി ബംഗളൂരു-കൊല്ലം എക്സ്പ്രസ് (06567) ഒക്ടോബർ 21ന് രാത്രി 11 മണിക്ക് ബംഗളൂരുവിൽ നിന്ന് പുറപ്പെടും. ഇതിന് പുറമെ, കൊല്ലം-ബെംഗളൂരു കന്റോൺമെന്റ് എക്സ്പ്രസ് (06568) ഒക്ടോബർ 22ന് വൈകിട്ട് 5 മണിക്ക് കൊല്ലത്ത് നിന്ന് ബംഗളൂരുവിലേക്ക് സർവീസ് നടത്തും. ഈ ട്രെയിനുകളും പാലക്കാട്, കോട്ടയം വഴിയായിരിക്കും സർവീസ് നടത്തുക. ദീപാവലി യാത്രക്കാരുടെ തിരക്ക് നിയന്ത്രിക്കാനും സുഗമമായ യാത്ര ഉറപ്പാക്കാനും ഈ പ്രത്യേക ട്രെയിനുകൾ സഹായിക്കുമെന്നാണ് പ്രതീക്ഷിക്കുന്നത്.