ജോലി ചെയ്യുന്നതിനിടെ കുടിക്കാൻ വെള്ളം ആവശ്യപ്പെട്ടു; മേലുദ്യോഗസ്ഥന് മൂത്രം കലർത്തിയ വെള്ളം കുപ്പിയിലാക്കി നൽകി; സർക്കാർ ഓഫീസിലെ അറ്റൻ്റർ അറസ്റ്റിൽ

ഭുവനേശ്വർ: കുടിക്കാൻ വെള്ളം ചോദിച്ച മേലുദ്യോഗസ്ഥന് മൂത്രം കലർത്തിയ വെള്ളം കുപ്പിയിലാക്കി നൽകിയ സംഭവത്തിൽ അറ്റൻ്റർ അറസ്റ്റിൽ. ഒഡിഷയിലെ ഗുജപതി ജില്ലയിലെ റൂറൽ വാട്ടർ സപ്ലൈ ആൻ്റ് സാനിറ്റേഷൻ ഓഫീസിലാണ് സംഭവം. ഓഫീസിലെ അറ്റൻ്റർ ശിവ നാരായൺ നായകാണ് ഉദയഗിരി പോലീസിന്റെ പിടിയിലായത്. ഓഫീസിലെ അസിസ്റ്റൻ്റ് എക്സിക്യുട്ടീവ് എഞ്ചിനീയർ സച്ചിൻ ഗൗഡയുടെ പരാതിയിലായിരുന്നു അറസ്റ്റ്.

ഇക്കഴിഞ്ഞ ജൂലൈ 23നാണ് കേസിനാസ്പദമായ സംഭവം. ഓഫീസ് സമയം കഴിഞ്ഞും ഇരുവരും ജോലി ചെയ്യുന്നതിനിടെയാണ് സച്ചിൻ ഗൗഡ അറ്റൻ്ററായ ശിവ നാരായൺ നായകിനോട് കുടിക്കാൻ വെള്ളം ചോദിച്ചത്. ഈ സമയം ഓഫീസിൽ വെളിച്ചം കുറവായിരുന്നു. ജോലിത്തിരക്കിലായിരുന്നു സച്ചിൻ ശിവ നാരായൺ കുപ്പിയിലാക്കി കൊണ്ടുവന്ന വെള്ളം കുടിച്ചു.

പിന്നീട് ശാരീരിക അസ്വസ്ഥത അനുഭവപ്പെട്ടതിനെ തുടർന്ന് ഉദ്യോഗസ്ഥൻ ബെർഹംപുറിലെ മെഡിക്കൽ കോളേജിൽ ചികിത്സ തേടി. കുപ്പി വെള്ളത്തിൻ്റെ സാംപിൾ ലാബിൽ പരിശോധിച്ചപ്പോഴാണ് ഇതിൽ മൂത്രം കലർന്നതായി മനസിലായത്. പിന്നാലെ സച്ചിൻ പോലീസിൽ പരാതിയും നൽകുകയായിരുന്നു.