നാഗ്പുരില്‍ വിതരണം ചെയ്ത ഭരണഘടനയില്‍ ഉള്ളടക്കമില്ല; ഉള്‍പേജുകള്‍ വെറും വെള്ളക്കടലാസ്; രാഹുല്‍ ഗാന്ധിക്കെതിരെ ബിജെപി
ഭരണഘടനയില്‍ ആമുഖം ഒഴികെ ഉള്‍പേജുകളില്‍ മറ്റൊന്നും ഇല്ല
മുംബൈ: ഭരണഘടനാ സംരക്ഷണത്തിലൂന്നി രാഹുല്‍ ഗാന്ധിയുടെ നേതൃത്വത്തില്‍ നാഗ്പുരില്‍ സംഘടിപ്പിച്ച പരിപാടിയില്‍ ഉള്ളടക്കമില്ലാത്ത ഭരണഘടന വിതരണം ചെയ്തുവെന്ന ആരോപണവുമായി ബിജെപി. മഹാരാഷ്ട്രയിലെ നാഗ്പുരില്‍ സംഘടിപ്പിച്ച പരിപാടിയിലാണ് സംഭവം.
കോണ്‍ഗ്രസ് വിതരണം ചെയ്ത, 'ഇന്ത്യന്‍ ഭരണഘടന' എന്ന് ആദ്യ പേജിലെഴുതിയ ഭരണഘനയില്‍ ആമുഖം ഒഴികെ ഉള്‍പേജുകളില്‍ മറ്റൊന്നും ഇല്ലെന്നാണ് ആരോപണം. മഹാരാഷ്ട്ര ബിജെപിയാണ് സമൂഹിക മാധ്യമങ്ങളില്‍ ഉളളടക്കമില്ലാത്ത ഭരണഘടനയുടെ വീഡിയോ പങ്കുവെച്ചത്.
മഹാരാഷ്ട്ര നിയമസഭാ തിരഞ്ഞെടുപ്പ് വരാനിരിക്കെ രാഹുലിനും കോണ്‍ഗ്രസിനുമെതിരെ ഭരണഘടനാ വിരുദ്ധ ചാപ്പ കുത്താനായി ബിജെപി ഈ വിഷയം തിരഞ്ഞെടുത്തിരിക്കുകയാണ് എന്നും ആരോപണമുണ്ട്.
പരിപാടിയില്‍ രാഹുല്‍ കൊണ്ടുവന്ന ഭരണഘടനയുടെ നിറവും വിമര്‍ശനങ്ങള്‍ക്കിടയാക്കിയിട്ടുണ്ട്. ചുവപ്പ് നിറമുള്ള ഭരണഘടനയുമായി രാഹുല്‍ എത്തിയത് അര്‍ബന്‍ നക്സലുകളോടും അരാചകവാദികളോടുമുള്ള രാഹുലിന്റെ ചായ്വിനെയാണ് സൂചിപ്പിക്കുന്നതെന്ന് മഹരാഷ്ട്ര ഉപമുഖ്യമന്ത്രി ദേവേന്ദ്ര ഫഡ്നാവിസ് കുറ്റപ്പെടുത്തി.