ഭാര്യയുടെ സുഹൃത്തും ഭര്‍ത്താവും തമ്മില്‍ തര്‍ക്കം; അമ്മായിയമ്മയെ വിരട്ടാന്‍ ഐപിഎസുകാരനായി; വഴിയില്‍ എസ്എച്ച്ഒയ്ക്ക് തോന്നിയ സംശയം; 50കാരന്‍ അറസ്റ്റില്‍
പൊലീസ് വേഷം കെട്ടിയ 50കാരന്‍ അറസ്റ്റില്‍
ആഗ്ര: ഭാര്യയുടെ സുഹൃത്തും ഭര്‍ത്താവും തമ്മിലുള്ള തര്‍ക്കം പരിഹരിക്കാന്‍ പൊലീസ് വേഷം കെട്ടിയ 50കാരന്‍ പിടിയില്‍. ലളിത്പൂര്‍ ജില്ലയിലെ താമസക്കാരനായ ഹേമന്ത് ബുന്ദേലയാണ് പിടിയിലായത്. പതിവ് പട്രോളിങ്ങിനിടെ കാറില്‍ ഇരിക്കുകയായിരുന്ന ഹേമന്ത് ബുന്ദേല എസ്പി റാങ്കിലുള്ള പൊലീസ് യൂണിഫോം ധരിച്ചിരിക്കുന്നത് എസ്എച്ച്ഒ ജലേസര്‍ സുധീര്‍ കുമാറിന്റെ ശ്രദ്ധയില്‍പ്പെടുകയായിരുന്നു.
സൂക്ഷ്മമായി പരിശോധിച്ചപ്പോള്‍, ഹേമന്ത് ധരിച്ചിരുന്ന തൊപ്പി ധരിച്ചിട്ടുള്ള യൂണീഫോമിന്റെ റാങ്കിന് അനുസൃതമല്ലെന്ന് കുമാര്‍ കണ്ടെത്തി. സുധീര്‍ കുമാര്‍ ഉടന്‍ തന്നെ വിവരം സര്‍ക്കിള്‍ ഓഫീസര്‍ നിതീഷ് ഗാര്‍ഗിനെ അറിയിച്ചു.
ഇരു ഉദ്യോഗസ്ഥരും ബുന്ദേലയെ ചോദ്യം ചെയ്തപ്പോള്‍, അയാള്‍ കുറ്റം സമ്മതിക്കുകയും ഭാര്യയുടെ സുഹൃത്തിന്റെ അമ്മായിയമ്മയെ സമ്മര്‍ദ്ദത്തിലാക്കാന്‍ ഒരു ഐപിഎസ് ഉദ്യോഗസ്ഥനെ ആള്‍മാറാട്ടം നടത്തിയതാണെന്ന് വെളിപ്പെടുത്തുകയും ചെയ്തു.
ഭാരതീയ നിയമ സംഹിത സെക്ഷന്‍ 204 പ്രകാരം ഹേമന്തിനെതിരെ ഒരു കേസ് ഫയല്‍ ചെയ്യുകയും അറസ്റ്റ് രേഖപ്പെടുത്തുകയും ചെയ്തതായി സര്‍ക്കിള്‍ ഓഫീസര്‍ നിതീഷ് ഗാര്‍ഗ് പറഞ്ഞു. ഹേമന്ത് ധരിച്ചിരുന്ന യൂണിഫോമും ധരിച്ചിരുന്ന മെഡലുകളും റിബണുകളും പിടിച്ചെടുത്തിട്ടുണ്ട്. ഇവ എങ്ങനെയാണ് ലഭിച്ചതെന്ന് അറിയുന്നതിനായി അന്വേഷണം തുടരുകയാണെന്നും അദ്ദേഹം കൂട്ടിച്ചേര്‍ത്തു.