അശ്രദ്ധമായി വാഹനം ഓടിച്ച് അപകടം ഉണ്ടാക്കി; കരൂര്‍ ദുരന്തത്തിനു പിന്നാലെ വിജയുടെ ഡ്രൈവര്‍ക്കെതിരെ കേസ്: അന്വേഷണം ആരംഭിച്ച് പ്രത്യേക സംഘം
കരൂര്‍ ദുരന്തത്തിനു പിന്നാലെ വിജയുടെ ഡ്രൈവര്‍ക്കെതിരെ കേസ്
ചെന്നൈ: 41 പേരുടെ മരണത്തിനിടയാക്കിയ കരൂര്‍ ദുരന്തത്തില്‍ വിജയുടെ ഡ്രൈവര്‍ക്കെതിരെ കേസ് എടുത്ത് പോലിസ്. അശ്രദ്ധമായി വാഹനം ഓടിച്ച് അപകടം ഉണ്ടാക്കിയതിനാണ് കേസ് എടുത്തത്. വിജയ് സഞ്ചരിച്ചിരുന്ന ബസ് രണ്ട് മോട്ടോര്‍ സൈക്കിളുകള്‍ ഇടിച്ച് അപകടത്തില്‍പ്പെട്ടതായുള്ള ദൃശ്യങ്ങള്‍ നേരത്തെ സമൂഹമാധ്യമങ്ങളിലൂടെ പുറത്തുവന്നിരുന്നു. ഈ രണ്ട് കേസുകളിലും എഫ്ഐആര്‍ റജിസ്റ്റര്‍ ചെയ്തിട്ടില്ലെന്ന് ഹൈക്കോടതി നേരത്തെ പറഞ്ഞിരുന്നു. ഇതിനുപിന്നാലെയാണ് കേസ് റജിസ്റ്റര്‍ ചെയ്തത്.
അപകടങ്ങളില്‍ എഫ്ഐആര്‍ റജിസ്റ്റര്‍ ചെയ്യാത്തത് എന്തുകൊണ്ടാണെന്ന് മദ്രാസ് ഹൈക്കോടതി ചോദിച്ചതിന് തൊട്ടുപിന്നാലെയാണ് വിജയ് സഞ്ചരിച്ചിരുന്ന ബസ് ഡ്രൈവര്‍ക്കെതിരെ അശ്രദ്ധമായി വാഹനമോടിച്ചതിന് പൊലീസ് കേസെടുത്തത്. ബിഎന്‍എസ് സെക്ഷന്‍ 281 പ്രകാരമാണ് കേസ്. പൊതുവഴിയില്‍ അമിതവേഗത്തില്‍ വാഹനമോടിക്കുകയോ ജീവന്‍ അപകടത്തിലാക്കുകയോ ചെയ്യുന്ന വകുപ്പുകള്‍ പ്രകാരമാണ് കേസെന്ന് പൊലീസ് അറിയിച്ചു.
അതേസമയം കരൂര്‍ ദുരന്തത്തില്‍ അന്വേഷണം നടത്തുന്നതിനായി രൂപീകരിച്ച പ്രത്യേക സംഘം അന്വേഷണം ആരംഭിച്ചു. ഐജി അസ്ര ഗാര്‍ഗിന്റെ നേതൃത്വത്തിലുള്ള സംഘമാണ് ദുരന്തം നടന്ന വേലുസാമിപുരത്ത് എത്തി അന്വേഷണം തുടങ്ങിയത്. വിജയ് എത്താന്‍ വൈകിയതാണ് തിക്കിലും തിരക്കിലും കലാശിച്ചതെന്ന വാദം സംഘം പരിശോധിക്കും.