200 രൂപ മുടക്കി എടുത്ത ലോട്ടറി ടിക്കറ്റിന് ലഭിച്ചത് ഒന്നരക്കോടിയുടെ ഒന്നാം സമ്മാനം; കൊള്ളക്കാരെ ഭയന്ന് വീടുപൂട്ടി നാടുവിട്ട് വീട്ടമ്മയും കുടുംബവും

അപ്രതീക്ഷിതമായി ജീവിതത്തില്‍ ഒന്നരക്കോടി രൂപയുടെ ഭാഗ്യം കൈവന്നതോടെ ജീവനും കയ്യില്‍ പിടിച്ച് ഓടുകയാണ് പഞ്ചാബിലെ വീട്ടമ്മയും കുടുംബവും. കൊള്ളക്കാര്‍ ഏതു നിമിഷവും ആക്രമിച്ചേക്കാം എന്ന തോന്നലില്‍ നിന്നാണ് റാം സിങും ഭാര്യ നസീബും നാടുവിട്ട് ഓടിയത്. ദിവസ വേതനക്കാരായ റാം സിങും നസീബും കോടിപതികളായ വിവരം നാട്ടിലെങ്ങും പാട്ടായതോടെയാണ് നിക്ക കള്ളി ഇല്ലാതായത്.

അടുത്തിടെ പഞ്ചാബ് സ്റ്റേറ്റ് ലോട്ടറിയുടെ ടിക്കറ്റ് 200 രൂപ മുടക്കി നസീബ് എടുത്തു. ഒന്നാം സമ്മാനവുമടിച്ചു. കോടിപതിയായ വിവഹം നാട്ടിലെങ്ങും പാട്ടായതോടെ സുരക്ഷിതാര്‍ഥം വീടുപൂട്ടി, ഫോണും സ്വിച്ച് ഓഫ് ചെയ്ത് റാം സിങും ഭാര്യയും രഹസ്യ കേന്ദ്രത്തിലേക്ക് മാറുകയായിരുന്നു. വിവരമറിഞ്ഞ ഫരീദ്‌കോട്ട് പൊലീസ് റാംസിങിനെ വിളിച്ച് സുരക്ഷ ഉറപ്പാക്കാമെന്നും പേടിക്കേണ്ടെന്നും ഉറപ്പുനല്‍കി. ആരെങ്കിലും കുടുംബത്തോടെ അപായപ്പെടുത്തിക്കളയുമെന്നും പണം തട്ടിയെടുക്കുമെന്നുമായിരുന്നു ഇവരുെട ഭയം.

കഴിഞ്ഞ രണ്ട് വര്‍ഷമായി പതിവായി 50 രൂപയുടെ ലോട്ടറി ടിക്കറ്റുകളാണ് ഇവര്‍ എടുക്കാറുള്ളതെന്ന് ലോട്ടറി വില്‍പ്പനക്കാരനായ രാജു പറയുന്നു. ഒരിക്കല്‍ പോലും അടിച്ചിട്ടുമില്ല. ഇതാദ്യമായാണ് സമ്മാനം അടിക്കുന്നത്. മൂന്ന് പെണ്‍മക്കളും ഒരു മകനുമാണ് ഇവര്‍ക്കുള്ളത്. പെണ്‍മക്കള്‍ വിവാഹിതരാണ്. മകന്‍ കര്‍ഷകനും. ലോട്ടറിയടിച്ച് കിട്ടിയ പണത്തിന് വീടുവയ്ക്കാനാണ് കുടുംബത്തിന്റെ പദ്ധതി.