മണിക്കൂറുകളായി തുടരുന്ന റെയ്ഡും ചോദ്യം ചെയ്യലും; കോഴിക്കോട്ട് വച്ച് ചോദ്യം ചെയ്തത് പോരാതെ ഗോകുലം ഗോപാലനെ ചെന്നൈയില് എത്തിച്ചും ഇഡിയുടെ ഗ്രില്ലിങ്; വിവരങ്ങള് തേടുന്നത് കോടമ്പാക്കത്തെ ഗോകുലം ചിറ്റ്സിന്റെ കോര്പറേറ്റ് ഓഫീസില് വച്ച്; പിഎംഎല്എ, ഫെമ ചട്ട ലംഘനങ്ങളില് അന്വേഷണം
ഗോകുലം ഗോപാലനെ ഇഡി ചെന്നൈയില് വച്ച് ചോദ്യം ചെയ്യുന്നു
ചെന്നൈ: ഗോകുലം ഗ്രൂപ്പ് ചെയര്മാന്ഗോകുലം ഗോപാലനെ ഇഡി ചെന്നൈയില് വച്ച് ചോദ്യം ചെയ്യുന്നു.ഗോകുലം ഗോപാലനെ ഇഡി ചെന്നൈയില് വച്ച് ചോദ്യം ചെയ്യുന്നു. കോടമ്പാക്കത്തെ ഗോകുലം ചിറ്റ്സ് ആന്ഡ് ഫിനാന്സിന്റെ കോര്പ്പറേറ്റ് ഓഫീസില് വെച്ചാണ് ഗോകുലം ഗോപാലനെ ഇഡി ഉദ്യോഗസ്ഥര് ചോദ്യം ചെയ്യുന്നത്. റെയ്ഡുമായി ബന്ധപ്പെട്ട വിവരങ്ങള് ശേഖരിക്കാന് ഗോകുലം ഗോപാലനെ ചെന്നൈയിലേക്ക് ഇഡി ഉദ്യോഗസ്ഥര് വിളിപ്പിക്കുകയായിരുന്നു.
കോഴിക്കോട് നിന്നും വൈകിട്ട് ആറേ കാലോടെയാണ് ഗോകുലം ഗോപാലന് ചെന്നൈയിലെത്തിയത്. തുടര്ന്ന് നേരെ കോടമ്പാക്കത്തെ ഓഫീസിലെത്തി. ഇവിടെ രാവിലെ മുതല് റെയ്ഡ് നടത്തുകയായിരുന്ന ഇഡി ഉദ്യോഗസ്ഥര് ഗോകുലം ഗോപാലനില് നിന്ന് വിവരങ്ങള് ശേഖരിക്കുകയാണ്. രാവിലെ കോഴിക്കോട് വച്ചും ഇഡി ഉദ്യോഗസ്ഥര് ഗോകുലം ഗോപാലനില് നിന്ന് വിവരം തേടിയിരുന്നു.
കോഴിക്കോട്ടെ ഗോകുലം ഗ്രൂപ്പിന്റെ ഓഫീസിലും ഇഡി പരിശോധന നടന്നു. 24 ന്യൂസ് ചാനലിന്റെ ഡയറക്ടര് ബോര്ഡ് യോഗം നടക്കുന്നതിനാല് ഗോകുലം ഗോപാലനും ഈ സമയത്ത് ഓഫീസിലുണ്ടായിരുന്നു. ചെന്നൈയിലെ ഓഫിസിലും വീട്ടിലും ഇഡി പരിശോധന നടക്കുന്നുണ്ട്. കോടമ്പാക്കത്ത് ഗോകുലം ചിറ്റ്സ് ആന്ഡ് ഫിനാന്സിന്റെ കോര്പറേറ്റ് ഓഫീസിലും, നീലാങ്കരയിലെ ഗോപാലന്റെ ഓഫിസിലും ആണ് രാവിലെ മുതല് പരിശോധന നടക്കുന്നത്
കോഴിക്കോട്ട് രാവിലെ പതിനൊന്നരയോടെ ആരംഭിച്ച പരിശോധന മൂന്നു മണിയോടെയാണ് അവസാനിച്ചത്. അതേസമയം, ചെന്നൈയിലെ ഗോകുലത്തിന്റെ ഓഫിസുകളില് നടത്തുന്ന പരിശോധന തുടരുകയാണ്. വിദേശനാണയ വിനിമയച്ചട്ട ലംഘനവുമായി ബന്ധപ്പെട്ട് നേരത്തേയുണ്ടായിരുന്ന കേസുകളുടെ തുടര്നടപടികളുടെ ഭാഗമായാണ് ഇഡി പരിശോധന നടത്തിയതെന്നാണ് വിവരം. എന്നാല്, ഇതുസംബന്ധിച്ച് കൂടുതല് വിശദാംശങ്ങള് പുറത്തുവിട്ടിട്ടില്ല. ആദ്യം വടകരയിലെ വീട്ടില് വച്ച് ചോദ്യം ചെയ്യാനായിരുന്നു നീക്കമെങ്കിലും ഗോകുലം ഗോപാലന് കോഴിക്കോട് കോര്പറേറ്റ് ഓഫിസിലേക്ക് എത്തുകയായിരുന്നു. വെള്ളിയാഴ്ച രാവിലെ പതിനൊന്നരയോടെയാണ് ചോദ്യം ചെയ്യല് ആരംഭിച്ചത്.
കുറച്ച് ദിവസം മുന്പ് ഗോകുലം കമ്പനിയിലേക്ക് വലിയൊരു തുക നിക്ഷേപം വന്നു. ആ തുക എവിടെ നിന്നാണ് വന്നത്, ഒരാളില് നിന്നാണോ തുക വന്നതെന്നുള്പ്പെടെയുള്ള കാര്യങ്ങളാണ് ചോദിച്ചതെന്നാണ് പ്രാഥമിക വിവരം. കോഴിക്കോട് നഗരത്തിലെ ഗോകുലത്തിന്റെ മറ്റു സ്ഥാപനങ്ങളിലും ഒരേ സമയം പരിശോധന നടന്നിരുന്നു.
അതേസമയം ഗോകുലം സ്ഥാപനങ്ങള് മൂന്ന് മാസമായി നിരീക്ഷണത്തിലാണെന്നും കേരളത്തിലും തമിഴ്നാട്ടിലുമായി 1000 കോടിയുടെ ക്രമക്കേട് നടന്നുവെന്നാണ് സംശയമെന്നും ഇഡി പറഞ്ഞു. അനധികൃതമായി വിദേശത്ത് സ്വത്ത് സമ്പാദിച്ചുവെന്നും സമീപകാല വിവാദങ്ങളുമായി പരിശോധനക്ക് ബന്ധമില്ലയെന്നും ഇഡി വ്യക്തമാക്കി. എമ്പുരാന് സിനിമ ദേശീയതലത്തില് വിവാദമായിരിക്കെയാണ് സിനിമയുടെ നിര്മാതാക്കളിലൊരാളായ ഗോകുലം ഗോപാലനെ ഇ.ഡി ചോദ്യം ചെയ്യാന് തീരുമാനിച്ചത്.
ഇതിന് മുമ്പും ഗോകുലം ഗ്രൂപ്പുമായി ബന്ധപ്പെട്ട് കള്ളപ്പണ പരിശോധന നടന്നിരുന്നു. 2017ല് നടന്ന പരിശോധനയില് 1100 കോടി രൂപയുടെ കണക്കില് പെടാത്ത വരുമാനം ഗോകുലം ഗ്രൂപ്പിന് ഉള്ളതായി വാര്ത്തകള് പുറത്തുവന്നിരുന്നു. ചിട്ടിയില് നിന്നുള്ള വരുമാനം, റിയല് എസ്റ്റേറ്റില് നിക്ഷേപിച്ചു എന്നാണ് വിശദീകരണം. ഇതിന്റെ അടിസ്ഥാത്തില് നികുതി ഇനത്തില് 330 കോടി രൂപയും നികുതി വെട്ടിച്ചതിനുള്ള പിഴയും അടക്കാന് ഗോകുലം ഗ്രൂപ്പിനോട് ആദായ നികുതി വകുപ്പ് ആവശ്യപ്പെടുകയാണ് അന്ന് ചെയ്തത്.
ഇതിന് ശേഷം സിനിമാ നിര്മ്മാണ രംഗത്തേക്ക് കടന്നപ്പോഴും ഗോകുലം നോട്ടപ്പുള്ളിയായി. അടുത്തിടെ നിരവധി തവണ ഇഡി ഗോകുലം ഗോപാലനെ ചോദ്യം ചെയ്തിരുന്നു. മഞ്ഞുമ്മല് ബോയ്സ് സിനിമയെ മറയാക്കി കള്ളപ്പണം വെളിപ്പിച്ചു എന്ന ആരോപണമാണ് ഉയര്ന്നത്. തമിഴ്നാട്ടിലെ വിതരണ ചുമതലയുണ്ടായിരുന്ന ഗോകുലം മൂവീസ് തീയറ്ററുകളുമായി ഒത്തുകളിച്ചു കള്ളപ്പണം വെളിപ്പിച്ചെന്നാണ് ആക്ഷേപം. പ്രദര്ശനത്തിന് അഞ്ചും ആറും മണിക്കൂര് മുന്പുതന്നെ ബുക്കിങ് ആപ്പില് ഹൗസ്ഫുള്ളായി കാണിക്കുന്ന ചില സിനിമകള് പകുതിയില് അധികം ഒഴിഞ്ഞ സീറ്റുകളോടെ പ്രദര്ശിപ്പിക്കുന്നതിന്റെ ചിത്രങ്ങളും വിഡിയോകളും അടക്കമാണ് ഇ.ഡിക്കു പരാതി ലഭിച്ചത്.
കള്ളപ്പണം വെളുപ്പിക്കുക എന്ന ഉദ്ദേശ്യത്തോടെ നിര്മിക്കുന്ന ഇത്തരം ചിത്രങ്ങള് ഇറങ്ങുന്നതിനു മുന്പു തന്നെ ലക്ഷക്കണക്കിനു രൂപയുടെ സൗജന്യ ടിക്കറ്റുകള് ലോബിയുടെ കൈവശം എത്തും. ഇതു മുഴുവന് സിനിമയുടെ യഥാര്ഥ ടിക്കറ്റ് കലക്ഷനായി കണക്കില് വരും എന്നതാണ് തന്ത്രം. ഇത്തരം ലോബിയുമായി സഹകരിക്കാന് തയാറാകാത്ത നിര്മാതാക്കളുടെ സിനിമകളെ തിയറ്ററില് നിന്നു പിന്വലിക്കാന് ചരടുവലിക്കുന്നതായും പരാതിയില് ഉയര്ന്നിരുന്നു. മഞ്ഞുമ്മല് ബോയ്സിന്റെ മറവില് വന് കള്ളപ്പണം വെളിപ്പിക്കല് നടന്നെന്നാണ് ആക്ഷേപം. ഈ പശ്ചാത്തലാണ് ഗോകുലത്തില് ഇഡി എത്തിയതും. അതേസമയം റിപ്പോര്ട്ടര് ചാനല് ഉടമകളുമായുള്ള ഗോകുലം ഗോപാലിന്റെ സാമ്പത്തിക ഇടപാടുകളും ഇഡി പരിശോധിക്കുന്നുണ്ടെന്നാണ് റിപ്പോര്ട്ടുകള്.
എമ്പുരാന് സിനിമയുടെ നിര്മാതാവ് കൂടിയാണ് ഗോകുലം ഗോപാലന്. സിനിമയിലെ ഗുജറാത്ത് വംശഹത്യയെ സൂചിപ്പിച്ച രംഗങ്ങള് ഹിന്ദുത്വവാദികളെ പ്രകോപിപ്പിച്ചിരുന്നു. തിയേറ്ററില് പ്രദര്ശനം തുടങ്ങിയ ചിത്രം വീണ്ടും റീ എഡിറ്റ് ചെയ്താണ് ഇപ്പോള് പ്രദര്ശിപ്പിക്കുന്നത്.
'എമ്പുരാന്' സിനിമ റിലീസായതിന് പിന്നാലെ ഗുജറാത്ത് കലാപം ചിത്രീകരിക്കുന്ന രംഗങ്ങളുടെ പേരില് സംഘ്പരിവാര് നേതാക്കള് കടുത്ത വിദ്വേഷ പ്രസ്താവനകളുമായി രംഗത്തുവന്നിരുന്നു. ലൈയ്ക്ക പ്രൊഡക്ഷന്സ് നിര്മാണത്തില് നിന്ന് പിന്മാറിയതിനെ തുടര്ന്നാണ് ഗോകുലം ഗോപാലന് 'എമ്പുരാന്' ഏറ്റെടുത്തത്. വിവാദമായതോടെ, പ്രേക്ഷകര് സ്നേഹിക്കുന്ന താരങ്ങള് അഭിനയിച്ച സിനിമ നിന്ന് പോകരുതെന്ന് കരുതിയാണ് എമ്പുരാനുമായി സഹകരിച്ചതെന്ന് ഗോകുലം ഗോപാലന് പറഞ്ഞിരുന്നു.
സിനിമ ആരെയെങ്കിലും വേദനിപ്പിച്ചിട്ടുണ്ടെങ്കില് അതില് വേണ്ട നടപടി സ്വീകരിക്കാന് സംവിധായകന് പൃഥ്വിരാജിനോട് പറഞ്ഞിട്ടുണ്ടെന്നും സിനിമ എടുക്കുന്നത് ആരെയും വേദനിപ്പിക്കാനല്ല എന്നും ഗോപാലന് വിശദീകരിച്ചിരുന്നു. പിന്നാലെ, സിനിമയില് പലരംഗങ്ങളിലും കടുംവെട്ട് നടത്തുകയും ചില ഭാഗങ്ങള് മ്യൂട്ട് ചെയ്യുകയും ചെയ്തു.