രാത്രി വീടിന്റെ പൂട്ട് പൊളിച്ചെത്തിയ പോലീസ്; മുറിക്കുള്ളിലെ ദാരുണ കാഴ്ച കണ്ട് നടുക്കം; രക്തത്തിൽ കുളിച്ച് ആകെ വികൃതമായി കിടക്കുന്ന രണ്ടു മൃതദേഹങ്ങൾ; സമീപത്ത് വസ്ത്രങ്ങളും കത്രികയും; അരുംകൊലയുടെ കാരണം കേട്ട് ഞെട്ടൽ മാറാതെ നാട്ടുകാർ

ഡൽഹി: മകന്റെ പതിനഞ്ചാം ജന്മദിനത്തോടനുബന്ധിച്ച് ബന്ധുക്കൾ നൽകിയ സമ്മാനങ്ങളെച്ചൊല്ലിയുണ്ടായ തർക്കത്തെ തുടർന്ന് യുവാവ് ഭാര്യയെയും അമ്മായിയമ്മയെയും കൊലപ്പെടുത്തി. ഡൽഹിയിലെ രോഹിണി സെക്ടർ 17-ൽ നടന്ന ദാരുണമായ സംഭവത്തിൽ കുസും സിൻഹ (63), ഇവരുടെ മകളായ പ്രിയ (34) എന്നിവരാണ് കൊല്ലപ്പെട്ടത്. സംഭവവുമായി ബന്ധപ്പെട്ട് പ്രിയയുടെ ഭർത്താവ് യോഗേഷിനെ പൊലീസ് അറസ്റ്റ് ചെയ്തു.

കഴിഞ്ഞ ഓഗസ്റ്റ് 28-ന് മകൻ ചിരാഗിന്റെ പിറന്നാൾ ആഘോഷിക്കാൻ വേണ്ടിയാണ് കുസും സിൻഹ മകളുടെ വീട്ടിലെത്തിയത്. ആഘോഷങ്ങൾക്ക് ശേഷം ഓഗസ്റ്റ് 30-ന് തിരികെപ്പോകുമെന്ന് പറഞ്ഞിരുന്നെങ്കിലും, അമ്മയെ കാണാതിരുന്നതോടെയാണ് പ്രിയയുടെ സഹോദരൻ മേഘ് സിൻഹ ആശങ്കയോടെ പൊലീസിനെ സമീപിച്ചത്. ഫോണിൽ ബന്ധപ്പെടാൻ ശ്രമിച്ചിട്ടും ഫലമുണ്ടായില്ല. തുടർന്ന് പ്രിയയുടെ വീട്ടിലെത്തിയ മേഘ്, പുറത്തുനിന്ന് പൂട്ടിയിട്ടിരിക്കുന്ന വാതിലിനടുത്തായി രക്തക്കറകൾ കണ്ടു. പൂട്ട് തകർത്ത് അകത്തുകടന്നപ്പോഴാണ് അമ്മയെയും സഹോദരിയെയും രക്തത്തിൽ കുളിച്ച നിലയിൽ കണ്ടെത്തിയത്. അപ്പോൾ യോഗേഷും മക്കളും വീട്ടിലുണ്ടായിരുന്നില്ല.

വിവരമറിഞ്ഞെത്തിയ കെഎൻകെ മാർഗ് പൊലീസ് പ്രതി യോഗേഷിനെ മണിക്കൂറുകൾക്കകം അറസ്റ്റ് ചെയ്തു. ഇയാളുടെ വസ്ത്രങ്ങളിൽ രക്തക്കറകൾ കണ്ടെത്തുകയും, കൊലപാതകത്തിന് ഉപയോഗിച്ച കത്രിക കണ്ടെടുക്കുകയും ചെയ്തു. കുടുംബ വഴക്കാണ് കൊലപാതകത്തിലേക്ക് നയിച്ചതെന്ന് പൊലീസ് അറിയിച്ചു. മകന് ലഭിച്ച സമ്മാനങ്ങളെച്ചൊല്ലി ഭാര്യയുമായി തർക്കമുണ്ടായെന്നും, തന്റെ വീട്ടുകാർ സമ്മാനം നൽകിയില്ലെന്ന് പ്രിയ കുറ്റപ്പെടുത്തിയെന്നും യോഗേഷ് പൊലീസിന് മൊഴി നൽകി. ഇതിനിടെ ഇടപെടാൻ ശ്രമിച്ച പ്രിയയുടെ അമ്മയെയും താൻ കൊലപ്പെടുത്തിയെന്ന് ഇയാൾ സമ്മതിച്ചു.

പ്രിയയും യോഗേഷും തമ്മിൽ സ്ഥിരമായി തർക്കങ്ങളുണ്ടാവാറുണ്ടായിരുന്നുവെന്നും, സമ്മാനത്തെച്ചൊല്ലിയുള്ള തർക്കം അതിന്റെ അവസാനഘട്ടമായിരുന്നുവെന്നും പൊലീസ് വ്യക്തമാക്കി. കൊലപാതകങ്ങൾക്ക് ശേഷം രണ്ട് മക്കളെയും കൂട്ടി പൊലീസിന്റെ കണ്ണിൽപ്പെടാതെ രക്ഷപ്പെടാനാണ് യോഗേഷ് ശ്രമിച്ചിരുന്നത്. ഈ ക്രൂരമായ കൊലപാതകം കുടുംബങ്ങൾക്കിടയിലെ നിലനിന്നിരുന്ന വഷളായ ബന്ധങ്ങളെയാണ് തുറന്നുകാട്ടുന്നത്.