അവധിക്കായി നാട്ടിലെത്തി; വീട്ടിലെത്തുംമുമ്പെ ജീവനെടുത്ത് വാഹനാപകടം; കൊട്ടാരക്കരയില്‍ കാര്‍ നിയന്ത്രണംവിട്ട് മറിഞ്ഞ് ഡോക്ടര്‍ക്ക് ദാരുണാന്ത്യം; ഡ്രൈവര്‍ ഉറങ്ങിപ്പോയതെന്ന് സൂചന
വാഹനാപകടത്തില്‍ ഡോക്ടര്‍ക്ക് ദാരുണാന്ത്യം
കൊട്ടാരക്കര: വിദേശത്തുനിന്ന് അവധിക്കായി നാട്ടിലേക്ക് വരുകയായിരുന്ന ഡോക്ടര്‍ വാഹനാപകടത്തില്‍ മരിച്ചു. കംബംകോട് കാര്‍ നിയന്ത്രണംവിട്ട് മറിഞ്ഞുണ്ടായ അപകടത്തിലാണ് ഡോക്ടര്‍ മരിച്ചത്. പത്തനംതിട്ട ചന്ദനപ്പള്ളി സ്വദേശിനി ഡോ.ബിന്ദു ഫിലിപ്പ് (48) ആണ് മരിച്ചത്. ദുബായില്‍ നിന്ന് തിരുവനന്തപുരം വിമാനത്താവളത്തില്‍ ഇറങ്ങിയശേഷം രാവിലെ വീട്ടിലേക്ക് വരുമ്പോളായിരുന്നു അപകടം ഉണ്ടായത്.
ഡ്രൈവര്‍ ഉറങ്ങിപ്പോയതാണ് അപകടത്തിന് കാരണമെന്നാണ് വിവരം. അപകടത്തില്‍ ഡോക്ടര്‍ക്ക് ജീവന്‍ നഷ്ടപ്പെടുകയും കാര്‍ ഡ്രൈവര്‍ ബിജു ജോര്‍ജിന് പരിക്കേല്‍ക്കുകയും ചെയ്തു. ഷാര്‍ജയില്‍നിന്ന് തിരുവനന്തപുരം വിമാനത്താവളത്തിലെത്തിയ ബിന്ദു അവിടെ നിന്ന് നാട്ടിലേക്ക് പുറപ്പെട്ടപ്പോഴാണ് കാര്‍ അപകടത്തില്‍പെട്ടത്. ബിന്ദു പിന്‍സീറ്റിലാണ് ഇരുന്നത്. മൃതദേഹം ആശുപത്രിയിലേക്ക് മാറ്റി. പോസ്റ്റുമോര്‍ട്ടത്തിന് ശേഷം മൃതദേഹം കുടുംബത്തിന് വിട്ടുനല്‍കും. ഭര്‍ത്താവ്: പരേതനായ അജി പി. വര്‍ഗീസ്. മക്കള്‍: അഞ്ജലീന വീനസ്