താന്‍ 'മഹ്ദി ഇമാം' ആണെന്ന് പറഞ്ഞ് വിശ്വസിപ്പിക്കുന്ന യൂട്യൂബ് ചാനലിന് നിരവധി ഫോളോവേഴ്‌സ്; കല്‍പ്പകഞ്ചേരി കേസിലെ യുവതിയുടെ അടുത്ത ബന്ധുവിനെ പീഡിപ്പിച്ചത് ഇമാം എന്ന് വിശ്വസിപ്പിച്ച്; 'മിറാക്കിള്‍ പാത്ത്' അകത്തായി; സജില്‍ ചെറുപാണക്കാട് വ്യാജ സിദ്ധന്‍; ഇനിയും പരാതി വന്നേക്കും
കൊളത്തൂര്‍: ദിവ്യഗര്‍ഭം ധരിപ്പിക്കാമെന്ന് പറഞ്ഞ് യുവതിയെ ബലാത്സംഗം ചെയ്ത കേസില്‍ ഒളിവില്‍ ആയിരുന്ന വ്യാജ സിദ്ധന്‍ അറസ്റ്റു ചെയ്തത് നിര്‍ണ്ണായക നീക്കങ്ങളിലൂടെ. സജില്‍ ചെറുപാണക്കാട് എന്നയാളെയാണ് പോലീസ് പിടികൂടിയത്. നെടുമങ്ങാട് നിന്നും കൊളത്തൂര്‍ പോലീസാണ് പ്രതിയെ കസ്റ്റഡിയിലെടുത്തത്.
ഒളിവില്‍ കഴിയവെയാണ് പ്രതി പോലീസിന്റെ പിടിയിലായത്. 'മിറാക്കിള്‍ പാത്ത്' എന്ന യൂട്യൂബ് ചാനലിന്റെ ഉടമയാണ് സജില്‍ ചെറുപാണക്കാട്. സംഭവത്തില്‍ അന്വേഷണം ആരംഭിച്ചെന്നും കൂടുതല്‍ പരാതികള്‍ ഉണ്ടാകാന്‍ സാധ്യതയുണ്ടെന്നും പോലീസ് അറിയിച്ചു. പ്രതി ആഭിചാരക്രിയകള്‍ ചെയ്യുന്ന ആളാണെന്ന് വിശ്വസിപ്പിച്ചാണ് പരാതിക്കാരിയായ യുവതിയെ പരിചയപ്പെട്ടത്. പ്രതി യൂട്യൂബ് ചാനലിലൂടെ ഇമാമാണെന്ന വ്യാജേന ആത്മീയമായ വീഡിയോകളാണ് പോസ്റ്റ് ചെയ്തിരുന്നത്. ഇതിനിടെയാണ് യുവതിയെ പരിചയപ്പെടുന്നത്.
ദിവ്യഗര്‍ഭം ധരിപ്പിക്കാമെന്ന് വാഗ്ദാനം ചെയ്ത് ആഭിചാരക്രിയ ചെയ്യാനെന്ന വ്യാജേന യുവതിയുടെ വാടക വീട്ടിലെത്തിയ പ്രതി അതിക്രമിച്ച് കയറി യുവതിയെ പീഡിപ്പിക്കുകയായിരുന്നു. കൊളത്തൂര്‍ സ്റ്റേഷന്‍ പരിധിയില്‍ വാടകയ്ക്ക് താമസിക്കുന്ന പരാതിക്കാരിയെ ആഭിചാരക്രിയകള്‍ ചെയ്യുന്ന ആളാണെന്ന് വിശ്വസിപ്പിച്ചു. തുടര്‍ന്ന്, പരാതിക്കാരി താമസിക്കുന്ന ക്വാര്‍ട്ടേഴ്‌സില്‍ അതിക്രമിച്ച് കയറി ബലാത്സംഗംചെയ്യുകയായിരുന്നു. സജിലിനെതിരെ കല്‍പ്പകഞ്ചേരി സ്റ്റേഷനിലും സമാന കേസുണ്ട്. ഈ കേസിലെ പരാതിക്കാരിയുടെ അടുത്ത ബന്ധുവിനെയാണ് ഇയാള്‍ ബലാത്സംഗംചെയ്തത്. താന്‍ 'മഹ്ദി ഇമാം' ആണെന്ന് പറഞ്ഞ് വിശ്വസിപ്പിക്കുന്ന യൂട്യൂബ് ചാനലിന് നിരവധി ഫോളോവേഴ്‌സ് ഉണ്ട്.
കൊളത്തൂര്‍ പോലീസ് സ്റ്റേഷനില്‍ കേസ് രജിസ്റ്റര്‍ ചെയ്തത് അറിഞ്ഞ് പ്രതി ഒളിവില്‍ പോയിരുന്നു. മലപ്പുറം ജില്ല പോലീസ് മേധാവി ആര്‍ വിശ്വനാഥിന്റെ മേല്‍ നോട്ടത്തില്‍ പെരിന്തല്‍മണ്ണ ഡിവൈ.എസ്പി എ.പ്രേംജിത്തിന്റെ നിര്‍ദ്ദേശാനുസരണം കൊളത്തൂര്‍ പോലീസ് ഇന്‍സ്‌പെക്ടര്‍ ജി.പ്രൈജുവിന്റെ നേതൃത്വത്തില്‍ സിപിഒമാരായ സുധീഷ്,നജ്മുദ്ദീന്‍, ബിജു, സുധീഷ് മേല്‍മുറി, വനിതാ സിപിഒ ഗ്രേസ് എന്നിവര്‍ അടങ്ങിയ അന്വേഷണ സംഘമാണ് പ്രതിയെ നെടുമങ്ങാട് നിന്നും അറസ്റ്റ് ചെയ്തത്.