ട്രെയിനില്‍ ബേംബ് വച്ചിട്ടുണ്ടെന്ന് ഭീഷണി; യാത്രക്കാരനായ യു.പി സ്വദേശി അറസ്റ്റില്‍; ചോദ്യം ചെയ്യലില്‍ വ്യാജ ഭീഷണിയെന്ന് കുറ്റസമ്മതം; 22 കോച്ചുകള്‍ പരിശോധിച്ചിട്ടിട്ടും ഒന്നും കണ്ടെത്തിയില്ല; നീണ്ടത് നാല് മണിക്കൂര്‍ നീണ്ട പരിശോധന
ബംഗളൂരു: ന്യൂഡല്‍ഹി-ബംഗളൂരു കര്‍ണാടക എക്സ്പ്രസില്‍ ബോംബ് വെച്ചെന്ന വ്യാജ ഭീഷണിയോടെ ട്രെയിന്‍ യാത്രയില്‍ വന്‍ അപകടഭീഷണയും ആശങ്കയും. ഞായറാഴ്ച രാവിലെ റെയില്‍വേ കണ്‍ട്രോള്‍ റൂമിലേക്ക് വിളിച്ചൊരാള്‍ ബോംബ് വെച്ചതായി അറിയിച്ചതോടെ വാഡി റെയില്‍വേ സ്റ്റേഷനില്‍ ട്രെയിന്‍ അടിയന്തരമായി നിര്‍ത്തിയതോടെയാണ് സംഭവത്തിന് തുടക്കം.
ഉത്തരപ്രദേശ് സ്വദേശി ദീപ് സിങ് റാത്തോഡ് (33) എന്ന യാത്രക്കാരനെയാണ് പിന്നീട് വാഡി റെയില്‍വേ പൊലീസ് പിടികൂടിയത്. ചോദ്യം ചെയ്തപ്പോള്‍ വ്യാജ ഭീഷണി മുഴക്കിയതെന്നും തെറ്റായ വിവരം നല്‍കിയതെന്നും ഇയാള്‍ സമ്മതിച്ചതായി പൊലീസ് അറിയിച്ചു. ഗുണ്ടക്കലിലേക്കുള്ള യാത്രക്കിടയിലായിരുന്നു ഇയാള്‍ ട്രെയിനിലുണ്ടായത്.
വ്യാജ ഭീഷണിയുടെ പശ്ചാത്തലത്തില്‍ ബോംബ് സ്‌ക്വാഡും ഡോഗ് സ്‌ക്വാഡും സജീവമായി രംഗത്തെത്തി. ട്രെയിനിന്റെ മുഴുവന്‍ 22 കോച്ചുകളും പരിശോധിച്ചപ്പോള്‍ യാത്രക്കാരെ കോച്ചുകളില്‍ നിന്നും ഒഴിപ്പിച്ചു. നാല് മണിക്കൂറിനുശേഷം സുരക്ഷാ പരിശോധന പൂര്‍ത്തിയാക്കിയതോടെയാണ് ട്രെയിന്‍ വീണ്ടും പുറപ്പെട്ടത്.
സ്ഫോടകവസ്തുക്കളൊന്നും കണ്ടെത്തിയില്ലെന്നും ഭീഷണി പൂര്‍ണമായും വ്യാജമാണെന്നും റെയില്‍വേ അധികൃതര്‍ സ്ഥിരീകരിച്ചു. കേസനുസരിച്ച് വാഡി റെയില്‍വേ പൊലീസ് റാത്തോഡിനെ അറസ്റ്റ് ചെയ്ത് ജുഡീഷ്യല്‍ കസ്റ്റഡിയില്‍ വിട്ടതായി എസ്ഐ എച്ച്.എസ്. വീരഭദ്രപ്പ അറിയിച്ചു. സംഭവം മൂലം ട്രെയിന്‍ യാത്രയില്‍ വലിയ കുഴപ്പവും സുരക്ഷാഭീതിയും അനുഭവപ്പെട്ടു.