എറണാകുളത്ത് ബൈക്കും മിനി ലോറിയും കൂട്ടിയിടിച്ച് അപകടം; 22കാരന് ദാരുണാന്ത്യം

കൊച്ചി: എറണാകുളം കാലടി മരോട്ടിചുവടിൽ ബൈക്കും മിനി ലോറിയും കൂട്ടിയിടിച്ചുണ്ടായ അപകടത്തിൽ യുവാവിന് ദാരുണാന്ത്യം. ബൈക്ക് യാത്രക്കാരനായ മലയാറ്റൂർ ഇല്ലിത്തോട് സ്വദേശി സോണൽ സജി (22) ആണ് മരിച്ചത്. ജോലി കഴിഞ്ഞ് വീട്ടിലേക്ക് വരവെയാണ് അപകടമുണ്ടായത്.

ഇന്നലെ രാത്രി 12 മണിയോടെയാണ് അപകടം ഉണ്ടായത്. മിനി ലോറിയുമായുണ്ടായ കൂട്ടിയിടിയിൽ സോണലിന്റെ തലക്ക് ഗുരുതരമായി പരിക്കേറ്റിരുന്നു. തലക്കേറ്റ പരിക്കാണ് മരണ കാരണമായത്. അപകട സ്ഥലത്ത് വച്ച് തന്നെ സോണൽ മരിക്കുകയായിരുന്നു. അങ്കമാലിയിലെ ഒരു തുണിക്കടയിലെ ജീവനക്കാരനാണ്.