ഓവർ ബ്രിഡ്ജിന് മുകളിൽ വച്ച് അപകടത്തിൽപ്പെട്ടു; ആരും തിരിഞ്ഞു നോക്കാതെ രക്തംവാർന്ന് റോഡിൽ കിടന്ന യുവാവിന് രക്ഷകനായി എത്തിയത് ധനമന്ത്രി

കൊല്ലം: കൊല്ലം കടപ്പാക്കട റെയിൽവേ ഓവർ ബ്രിഡ്ജിന് മുകളിൽ ബൈക്ക് അപകടത്തിൽപ്പെട്ട് രക്തം വാർന്ന് റോഡിൽ കിടന്ന യുവാവിന് ധനമന്ത്രി കെ.എൻ. ബാലഗോപാൽ രക്ഷകനായി.

കൊല്ലത്തെ എൽ.ഡി.എഫ്. യോഗം കഴിഞ്ഞ് രാത്രി പത്ത് മണിയോടെ കൊട്ടാരക്കരയിലേക്ക് മടങ്ങും വഴിയാണ് മന്ത്രി പരിക്കേറ്റ അയത്തിൽ സ്വദേശി ഗ്ലാഡ് വിനെ കണ്ടത്. ഉടൻ തന്നെ മന്ത്രി വാഹനം നിർത്തി കൺട്രോൾ റൂമിൽ വിളിച്ചു പോലീസിനെ വരുത്തി.

തുടർന്ന് പോലീസിനൊപ്പം യുവാവിനെ ആശുപത്രിയിലേക്ക് അയക്കുകയായിരുന്നു. തലയ്ക്കും കൈയ്ക്കും പരിക്കേറ്റ ഗ്ലാഡ് വിൻ നിലവിൽ സ്വകാര്യ ആശുപത്രിയിൽ ചികിത്സയിലാണ്. മന്ത്രിയുടെ സമയോചിതമായ ഇടപെടലാണ് യുവാവിന് സഹായകമായത്.