എം.സി റോഡിൽ വീണ്ടും ജീവനെടുത്ത് അപകടം; കാറും കെ.എസ്.ആർ.ടി.സി ബസും കൂട്ടിയിടിച്ച് വൻ അപകടം; അമ്മയ്ക്ക് ദാരുണാന്ത്യം; മകന്റെ നില അതീവ ഗുരുതരം

ചടയമംഗലം: കാറും കെ.എസ്.ആർ.ടി.സി ബസും കൂട്ടിയിടിച്ചുണ്ടായ അപകടത്തിൽ വീട്ടമ്മയ്ക്ക് ദാരുണാന്ത്യം. എം.സി റോഡിൽ ചടയമംഗലത്താണ് സംഭവം നടന്നത്. കൂടെ ഉണ്ടായിരുന്ന മകനെ ഗുരുതര പരിക്കുകളോടെ ആശുപത്രിയിൽ പ്രവേശിപ്പിച്ചു. കൊല്ലം നിലമേൽ വെള്ളാമ്പാറ സ്വദേശി ശ്യാമള കുമാരിയാണ് മരിച്ചത്.

ചടയമംഗലത്തിനും ആയൂരിനും ഇടയിലുള്ള ഇളവക്കോട് ബ്ലോക്ക് ഓഫീസിന് സമീപത്തായിരുന്നു സംഭവം നടന്നത്. ചടയമംഗലത്ത് നിന്ന് കോട്ടയത്തേക്ക് പോവുകയായിരുന്ന കൊട്ടാരക്കര ഡിപ്പോയിലെ കെ.എസ്.ആർ.ടി.സി ഫാസ്റ്റ് പാസഞ്ചർ ബസും വിപരീത ദിശയിൽ ചടയമംഗലം ഭാഗത്തേക്ക് വരികയായിരുന്ന കാറുമാണ് കൂട്ടിയിടിച്ചത്.

രണ്ട് വാഹനങ്ങളും നല്ല വേഗത്തിലാണ് എത്തിയതെന്ന് കണ്ടുനിന്നവർ പറഞ്ഞു. ഇടിയുടെ ആഘാതത്തിൽ കാറിന്റെ മുൻഭാഗം പൂർണമായും തകർന്നു. അപകടത്തിൽ പരിക്കേറ്റ മകന്റെ അവസ്ഥ വളരെ ഗുരുതരമെന്നാണ് ലഭിക്കുന്ന വിവരങ്ങൾ.