'ആദ്യം ലഹരി പിന്നെ പഠിത്തം..'; വാടകവീട്ടിലേക്ക് പോലീസ് കുതിച്ചെത്തി; പരിശോധനയിൽ കുസാറ്റിലെ വിദ്യാർത്ഥികളിൽ നിന്നും മാരക മയക്കുമരുന്ന് പിടിച്ചെടുത്തു

കൊച്ചി: കൊച്ചി ശാസ്ത്ര സാങ്കേതിക സർവകലാശാലയിലെ (കുസാറ്റ്) രണ്ട് വിദ്യാർത്ഥികൾ മാരക മയക്കുമരുന്നായ എംഡിഎംഎ പിടിച്ചെടുത്തു. മൂന്നാം വർഷ സിവിൽ എഞ്ചിനീയറിങ് വിദ്യാർത്ഥികളായ മാരാരിക്കുളം സ്വദേശി എം.പി. അതുൽ, തൃശൂർ ആളൂർ സ്വദേശി ആൽബിൻ റിബി എന്നിവരെയാണ് കളമശ്ശേരി പോലീസ് പിടികൂടിയത്. ഇവരിൽ നിന്ന് ആകെ 10.54 ഗ്രാം എംഡിഎംഎ പിടിച്ചെടുത്തു.

സർവകലാശാലയ്ക്ക് പുറത്ത് ഹിദായത്ത് നഗറിൽ ഇരുവരും വാടകയ്ക്ക് താമസിച്ചിരുന്ന വീട്ടിൽ നിന്നാണ് ഇവരെ കസ്റ്റഡിയിലെടുത്തത്. ജില്ലാ ആൻറി നാർക്കോട്ടിക് സ്പെഷ്യൽ ആക്ഷൻ ഫോഴ്‌സിന് (ഡാൻസാഫ്) ലഭിച്ച രഹസ്യവിവരത്തെ തുടർന്ന് പുലർച്ചെ നടത്തിയ പരിശോധനയിലാണ് ഇവർ പിടിയിലായത്.

പരിശോധനയിൽ അതുലിന്റെ പക്കൽ നിന്ന് 5.550 ഗ്രാമും ആൽബിന്റെ കയ്യിൽ നിന്ന് 4.99 ഗ്രാം എംഡിഎംഎയുമാണ് കണ്ടെടുത്തത്. പ്രതികളെ കളമശ്ശേരി പോലീസ് സ്റ്റേഷനിലെത്തിച്ച് അറസ്റ്റ് രേഖപ്പെടുത്തി. സംഭവത്തിൽ കൂടുതൽ അന്വേഷണം നടന്നുവരികയാണ്.