കരുനാഗപ്പള്ളി സന്തോഷ് വധക്കേസിലെ മുഖ്യപ്രതി അലുവ അതുല്‍ പിടിയില്‍; അകത്തായത് തമിഴ്‌നാട്ടിലെ തിരുവള്ളൂരില്‍ നിന്ന്
കൊല്ലം: കരുനാഗപ്പള്ളി സന്തോഷ് വധക്കേസിലെ മുഖ്യപ്രതി അലുവ അതുല്‍ പിടിയില്‍. തമിഴ്‌നാട്ടിലെ തിരുവള്ളൂരില്‍ നിന്നാണ് ഇയാള്‍ പിടിയിലായത്. കുറച്ചു ദിവസം മുമ്പ് എറണാകുളത്ത് വച്ച് നടന്ന വാഹന പരിശോധനയില്‍ പൊലീസിന്റെ കണ്‍മുന്നില്‍ നിന്നാണ് ഇയാള്‍ രക്ഷപെട്ടത്. അന്ന് ഇയാള്‍ക്കൊപ്പം ഭാര്യയും കുഞ്ഞുമുണ്ടായിരുന്നു. കാറില്‍ ഭാര്യയെയും കുഞ്ഞിനെയും ഉപേക്ഷിച്ച് പ്രതി രക്ഷപെടുകയായിരുന്നു. അതിന് ശേഷം സംസ്ഥാനത്തിന് പുറത്തേക്കും അന്വേഷണം വ്യാപിപ്പിക്കുകയായിരുന്നു.
കഴിഞ്ഞ മാര്‍ച്ച് 27നാണ് കൊല നടന്നത്. കാറിലെത്തിയ ആറംഗ സംഘം സന്തോഷിനെ വീട്ടില്‍ കയറി കൊലപ്പെടുത്തുകയായിരുന്നു. കേസില്‍ ഒന്നാം പ്രതിയാണ് അലുവ അതുല്‍. ഇയാള്‍ പിടിയിലായതോടെ കേസിലെ ആറ് പ്രതികളും അറസ്റ്റിലായതായി പോലീസ് അറിയിച്ചു. ക്വട്ടേഷന്‍ നല്‍കിയെന്ന് പൊലീസ് കണ്ടെത്തിയ പങ്കജ് മേനോനും നേരത്തേ പിടിയിലായിരുന്നു.