വാഹനപരിശോധനക്കിടെ രണ്ടുപേരുടെ വരവിൽ പന്തികേട്; ബൈക്ക് നിർത്തി ഇറങ്ങിയോടി; കൂടെ പോലീസും ചെയ്‌സ് ചെയ്തു; ഒടുവിൽ തെളിഞ്ഞത് ബൈക്ക് മോഷണം; യുവാക്കൾ അറസ്റ്റിൽ

തൃശൂര്‍: വാഹന പരിശോധനയ്ക്കിടെ ബൈക്ക് മോഷ്ടാക്കളെ ഓടിച്ചിട്ട് പിടികൂടി പോലീസ്. സബ് ഇന്‍സ്‌പെ്കടര്‍ സുനില്‍ കുമാറും സംഘവും അശ്വിനി ജങ്ഷന്‍ സമീപത്ത് വാഹന പരിശോധന നടത്തുന്നതിനിടെയാണ് ബൈക്ക് മോഷ്ടാക്കളായ തൃശൂര്‍ പട്ടാളം റോഡ് സ്വദേശിയായ മുത്തു (28), മാടക്കത്തറ പനമ്പിള്ളി സ്വദേശിയായ ജാതിക്കപറമ്പില്‍ തദ്ദേവൂസ് (19) എന്നിവരെ അറസ്റ്റ് ചെയ്തത്.

യുവാക്കളുടെ വരവിൽ പന്തികേട് തോന്നിയ പോലീസ് പരിശോധനക്കായി പിടിച്ചുനിർത്തി. ഉടനെ രണ്ടുപേരും ബൈക്ക് ഉപേക്ഷിച്ച് ഇറങ്ങി ഓടുകയായിരുന്നു.

കൂടെ ചെയ്‌സ് ചെയ്ത് ഓടിയാണ് പ്രതികളെ പോലീസ് അറസ്റ്റ് ചെയ്തത്. നവംബര്‍ 26 ന് പുറനാട്ടുകര സ്വദേശി പൂങ്കുന്നം റെയില്‍വേ സ്റ്റേഷന്‍ പരിസരത്ത് പാര്‍ക്കുചെയ്തിരുന്ന മോട്ടോര്‍ സൈക്കിളാണ് പ്രതികളിൽ നിന്നും കണ്ടെത്തിയത്.