'എടാ മോനെ..'; സെന്റ് ഓഫിന് ഓളമുണ്ടാക്കണം; ഗ്രൗണ്ടിൽ കാറുകളുമായി അഭ്യാസപ്രകടനം; ഡ്രിഫ്ട് ചെയ്ത് കറക്കി ഓടിക്കുന്നതിനിടയിൽ കാറുകൾ തമ്മിൽ കൂട്ടിയിടിച്ചു; പിള്ളേര് കുതറിയോടി;നടപടിയുമായി പോലീസ്
കൽപറ്റ: വയനാട് കൽപ്പറ്റയിൽ സെന്റ് ഓഫ് പരിപാടി ഒന്ന് കൊഴുപ്പിക്കാൻ വാടകയ്ക്ക് എടുത്ത കാറുകളുമായി പിള്ളേരുടെ അഭ്യാസപ്രകടനം. കൽപറ്റ എൻഎസ്എസ് ഹയർ സെക്കൻഡറി സ്കൂൾ ഗ്രൗണ്ടിലാണ് കാറുമായി വിദ്യാർത്ഥികൾ അഭ്യാസപ്രകടനം നടത്തിയത്. തുടർന്ന് പരാതിയുടെ അടിസ്ഥാനത്തിൽ പോലീസ് വാഹനങ്ങൾ പിടിച്ചെടുക്കുകയും ചെയ്തു.
അപകടമുണ്ടാക്കുന്ന തരത്തിൽ തലങ്ങും വിലങ്ങും ഓടിച്ച ആറ് വാഹനങ്ങളാണ് കൽപ്പറ്റ പൊലീസ് കസ്റ്റഡിയിലെടുത്തത്. പിന്നാലെ വാഹനവുമായി അഭ്യാസ പ്രകടനം നടത്തിയതിന് വിദ്യാർത്ഥികൾക്കെതിരെയും ആർ സി ഉടമകൾക്കെതിരെയും കേസ് രജിസ്റ്റർ ചെയ്തു.
ഹയർ സെക്കൻഡറി വിദ്യാർത്ഥികളുടെ സെൻറ് ഓഫ് ചടങ്ങിനു ശേഷം ആണ് ചില വിദ്യാർത്ഥികൾ കാറുമായി ഗ്രൗണ്ടിലേക്ക് എത്തിയത്. വാടകക്ക് എടുത്ത ആഡംബര കാറുകൾ വരെ കൂട്ടത്തിലുള്ളതായാണ് വിവരം. ഗ്രൗണ്ടിൽ തലങ്ങും വിലങ്ങും അപകടകരമായ വിധത്തിൽ കാറുകൾ ഓടിക്കുകയായിരുന്നു. ചില അധ്യാപകരും സംഭവത്തിന് ദൃക്സാക്ഷികൾ ആയിരുന്നു. അതിവേഗത്തിൽ വാഹനം കറക്കി ഓടിക്കുന്നതിനിടയിൽ രണ്ടു കാറുകൾ കൂട്ടിയിടിക്കുന്നത് ഇതുമായി ബന്ധപ്പെട്ട് പ്രചരിച്ച വീഡിയോയിൽ ഉണ്ട്.
കാറുകൾ കൂട്ടിയിടിച്ചതോടെ സ്കൂൾ അധികൃതർ ഗേറ്റ് അടച്ച് പൊലീസിനെ വിവരമറിയിക്കുകയായിരുന്നു. കാറോടിച്ചിരുന്ന ആറു പേർക്കും ലൈസൻസ് ഉണ്ടെങ്കിലും നിയമലംഘനത്തിന് മുഴുവൻ വാഹനങ്ങളും പോലീസ് കസ്റ്റഡിയിൽ എടുക്കുകയായിരുന്നു.