പുനലൂരിൽ വയോധികയെ വീട്ടുമുറ്റത്ത് പൊള്ളലേറ്റ് മരിച്ച നിലയിൽ കണ്ടെത്തി; സമീപം ഒഴിഞ്ഞ കന്നാസ്; അന്വേഷണം ആരംഭിച്ച് പോലീസ്

പുനലൂർ: കൊല്ലം പുനലൂരിൽ വയോധികയെ വീടിന്റെ മുറ്റത്ത് തീപൊള്ളലേറ്റ് മരിച്ച നിലയിൽ കണ്ടെത്തിയ സംഭവത്തിൽ അന്വേഷണം ആരംഭിച്ച് പോലീസ്. തൊളിക്കോട് മുളന്തടം ഗീതാലയത്തിൽ പ്രഭാവതി അമ്മ (63) ആണ് മരിച്ചത്. വെള്ളിയാഴ്ച രാത്രി 9 മണിയോടെയായിരുന്നു സംഭവം. മരണകാരണം വ്യക്തമായിട്ടില്ല.

വീട്ടുമുറ്റത്ത് നിന്ന് തീയും പുകയും ഉയരുന്നത് ശ്രദ്ധയിൽപ്പെട്ട അയൽവാസിയായ ബന്ധുവാണ് മൃതദേഹം ആദ്യം കണ്ടത്. ദേഹമാസകലം പൊള്ളലേറ്റ നിലയിലായിരുന്നു. വിവരമറിയിച്ചതിനെ തുടർന്ന് അധികൃതർ സ്ഥലത്തെത്തി. മൃതദേഹത്തിന് സമീപത്തുനിന്ന് ഒരു ഒഴിഞ്ഞ കന്നാസും കണ്ടെടുത്തിട്ടുണ്ട്. മൃതദേഹം ഇൻക്വസ്റ്റ് നടപടികൾ പൂർത്തിയാക്കി പുനലൂർ താലൂക്ക് ആശുപത്രി മോർച്ചറിയിലേക്ക് മാറ്റി.