കണ്ണൂരിൽ തിയേറ്ററിലെ വാട്ടര്‍ ടാങ്ക് തകര്‍ന്ന് വീണ് അപകടം; രണ്ട് പേര്‍ക്ക് പരിക്ക്; സംഭവം ലക്കി ഭാസ്കര്‍ സിനിമ കാണുന്നതിനിടെ
കണ്ണൂര്‍: സിനിമ തിയേറ്ററിലെ വാട്ടര്‍ ടാങ്ക് തകര്‍ന്ന് വീണ് വൻ അപകടം. അപകടത്തിൽ സിനിമ കാണാനായി എത്തിയ രണ്ട് പേര്‍ക്ക് പരിക്കേറ്റു. കണ്ണൂര്‍ മട്ടന്നൂരിലെ സഹിന സിനിമാസിലെ വാട്ടര്‍ ടാങ്കാണ് തകർന്നു വീണത്.
വാട്ടര്‍ ടാങ്ക് സ്ഥാപിച്ചിരുന്ന കെട്ടിടത്തിന്‍റെ ഒരു ഭാഗം പൂർണമായി തകർന്നിട്ടുണ്ട്. വാട്ടര്‍ ടാങ്ക് തകർന്നതോടെ മുകളിൽ നിന്ന് വെള്ളം തിയേറ്ററിലേക്ക് ശക്തമായി ഒഴുകിയെത്തി. വാട്ടര്‍ ടാങ്കിനൊപ്പം കെട്ടിടത്തിലെ സിമന്‍റ് കട്ടകളും സീലിങും സീറ്റിലേക്ക് വീണാണ് സിനിമ കാണാനെത്തിയവര്‍ക്ക് പരിക്ക് പറ്റിയത്.
അപകടത്തെ തുടര്‍ന്ന് സിനിമ പ്രദര്‍ശനം തടസപ്പെടുകയും ചെയ്തു. പരിക്കേറ്റ രണ്ടുപേരെ ആശുപത്രിയിൽ പ്രവേശിപ്പിച്ചു. നായാട്ടുപാറ സ്വദേശി വിജിലാണ് പരിക്കേറ്റവരിൽ ഒരാള്‍. ദുൽഖർ സൽമാന്റെ ലക്കി ഭാസ്കര്‍ സിനിമയുടെ ഇന്‍റര്‍വെൽ കഴിഞ്ഞ് വീണ്ടും സിനിമ ആരംഭിച്ചപ്പോഴാണ് അപകടം നടന്നത്. ടാങ്ക് തകർന്ന് തീയറ്ററിന്റെ സീലിങിന് അടിയിൽ കുടുങ്ങിയ ഒരാള്‍ക്ക് ഉള്‍പ്പെടെയാണ് പരിക്കേറ്റതെന്നും സിനിമ കാണാനെത്തിയ ദൃക്‌സാക്ഷികൾ പറഞ്ഞു.